F.C. Südtirol - Alperia Junior Camp 2019

L'Uniun Sport La Val, en colaboraziun cun le F.C. Südtirol, à organisé dai 22 ai 26 de messé 2019 la secunda ediziun dl’ „Alperia Junior camp“ de n’edema por düć i mituns dla valada che á interesc a soghé al palé.

I mituns á albü la ocajiun da podëi imparé da alenadus profescionisc, che á alené cotan de scuadres de alt livel. I alenadus dl F.C. Südtirol, á gran capazites y conoscënzes sura l’monn dl palê mo sá ince co motivé y dëidé i mituns emotivamënter.

Al camp á partezipé indüt 42 mituns/mitans. Le pröm de, le lünesc, él vigne sogadú che á podü pié dô na tascia cun de vigni sort de guant por i alenamënc. Dô les presentaziuns di alenadus é i sogadus gnüs partis sö te trëi grups por scomencé cun i alenamënc. Bele atira án odü che i mituns â n gran interesc a imparé valch de nü. Tartan chisc dis intensifs i él gnü insigné les tecniches fondamentales dl jüch dl palé, sciöche an fej da archité, porté y passé indortöra le palé. Danmisdé se conzentrâ i alenamenc sön la tecnica y domisdé pudô i sogadús porvé fora só savëi te partides a tema.

Le camp é gnü stlüt jö le vëndres domisdé cun en torné final y na picia premaziun, olache vigni sogadú á podü pié dô n atestat de partezipaziun y na zetula d’entrada por jí a ciaré na partida dl Südtirol. I miús sogadús de vigni grup é gnüs premiá cun en bonn por podëi vijité le zënter di alenamënc dl Südtirol y por podëi partezipé ativamënter pro en alenamënt dla prüma scuadra.

N gran giulan ti va ai organisadûs y acompagnadus che ê presënc por vigni nezescité sön le ciamp dl palé, al hotel Posta a Pidrô por avëi dé albergh ai alenadûs y al Hotel Alcialc a La Val por avëi fistidié dla marëna. N ringraziamënt particular ti é ince jü ai cater sponsors che á dé n contribut finanziar ala manifestaziun: M2 Srl, Raiffeisen, Studio Bassot y Assoziaziun Turistica La Val, cun chësc aiüt él ince sté meso de tigní valgamia basses les cuotes de iscriziun.

I alenadús instësc s’é congratulé por le garaté dl camp y s’á dejidré de podëi tigní inant chësta colaboraziun ince ti proscimi agn.