8ª partida de campionat - Valdaora
En punt sú dala saú antia arjunt cuntra le Valdaora.
La partida cuntra le Valdaora vëgn antizipada al vëndres sëra sön le ciamp dl San Laurënz a gauja dl fin dl’edema lunch y la mancianza de sogadús.
La partida mët man cun en gran druch da tramres perts, le ciamp é tles mius condiziuns y le palé slisurëia sön le sintetich che al é en plajëi . Sön na dijatenziun di ghesc ladins castighëia le Valdaora cun en bel gol sön na combinaziun danter l’atach puster. Chësc suzed al 30^, püch do vëgn Stefan contrasté te area aversara y tira fora na trata dai önescmetri y na desgorta dal ciamp dl defensur aversar por dopla amoniziun. Michele se presentëia sigü ala trata y la trasformëia ince. Le prüm tëmp de jüch se röia sön le resultat de 1 a 1.
Tla secunda pert mët La Val la dërta convinziun te ciamp y à sön le pé n’ocajiun d’or por jí in vantaje. Michele crossëia bass amez por Maxi che röia püch dan porta por apogé le curan te porta, le palé vëgn indere abiné mal y röia daldüt dlungia porta ia. Atira do röia l’aziun cuntra porta ladina y sëgn castighëia le Valdaora cun na trata bassa sot les giames de Sepl ite. Al ne passa nia tröc menüc che Max, apëna ruvé te ciamp, vëgn desgort dal ciamp cun cherta cöcena por en fal inozënt. Sön le miú momënt é i ladins in svantaje y cun en sogadú demanco: la düra lege dl soghé al palé.
Ai ne la da nia sö y ai pro inant de chirí le per, che toma spo al 70^: Franz ti sciampa ala defenjiun, röia te area y vëgn contrasté dala defenjiun de ciasa. L’arbiter mostra atira le punt dla mascima puniziun. Cun les ultimes forzes trasformëia Michele indo la trata y le resultat é indo sön le per. Ti ultims menüc de jüch ne sozedl nia tröp y do na batalia mëss les formaziuns se partí i punc.
La Val – Valdaora 2-2
Formaziun La Val: 1. Sepl Kantioler, 2. Egon Frenes (dal 80^ Michael Ties), 3. Natan Colletta (dal 45^ Max Nagler), 4. Christian Terza - capitan, 5. Paolo Vallazza, 6. Bruno Zanoguera, 7. Philip Moling, 8. Stefan Sottara, 9. Franz Tolpeit, 10. Michele Campei, 11. Maximilian Di Lorenzo Meo (dal 55^ Alexander Complojer)
Goi por La Val: Michele Campei 43^ y 76^
Proscima partida: In domënia dales 15:30 a Perca cuntra la scuadra de ciasa
Atri resultac:
Altherren (La Val): Plose – La Val 2-0
U-15 (La Val-Mareo) : Obopuschtra Löwen – La Val 3-1
U-12 (La Val) = Steinhaus – La Val 0-3
U-11 (La Val) = Latzfons – La Val 4-1
