4ª partida de campionat - Rina
Derby ladin a reis ötes, combatü indere cina l’ultim menüt!
A ti fa da cornisc al prüm derby ladin te chesta nöia sajun é sté le tëmp malsigü, cun le vënt che á soflé por gran pert dla partida. Impó é ruvé adalerch a La Val en bel publich de apascioná, che ne á nia urü se fa sciampé chësta partida. Da üna na pert le Rina, che do les prümes trei partides á bele coiü adüm set punc, dal’atra per le La Val, al mumënt ciamó sënza punc de gaiofa. Por chisc ultims dessigü na maiú desfida y ocajiun por ciaré de cöie i prüms früc dla sajun. Ala fin ti él gnü pité ai sostenitus en derby combatü cun val ocajiuns plö tleres por le Rina.
Tla prüma cherd’ora dla partida é La Val che comana le jüch, davagnan plö trates dal ciantun y val puniziun dal limit dl’area. Al 10^ röia na crossada alta tl’area dl Rina, l’atacant da La Val röia tardí lunch a trá le palé sura porta fora. Bel plan é le Rina co fej presciun, al 18^ ti sciampa Franz T. da na pert jö y crossëia bass amez, Daniel F. röia a dërt post y spizureia de püch le curan dlungia porta ia. Al 28^ controlëia ciamó Franz en bel palé te area da La Val, pro la trata bassa sön le pé lunch, Sepl é reatif y deloj le palé cun la piza di dëic te ciantun. Dedô se conzentrëia le jüch scialdi amez ciamp y les ocajiuns tleres da jí in vantaje é püces da mostré sö.
Do la palsa tol le Rina le jüch tles mans y drüca i padruns de ciasa te süa mezciamp. Al 58^ te n cajin amesa area rebat le palé trat da Daniel sön le pé de porta, l’atacant Dennis G. pro ciamó de tra sterch te porta mo le defensur Michele C. ruvé a dërt post sön la linea salva le resultat. La tenjiun mët man de se fa sintí y le spirit combatif dl Rina á la miú sön les sogades dla scuadra da La Val, che pro de avanzé cun determinaziun cuntra la porta aversara. Al 72^ conzed l’arbiter na puniziun a 20 metri dalunc dala porta dl Rina, Philipp vega de giré le curan sura le mür ite, chiló mëss le portier Huber se destrá por desfanté la trata. Tl’ultima cherd’ora pon ciamó alzé fora valgünes trates prigoroses di aversars, daulache le potier Sepl á msü se de da fa por evité le svantaje. L’arbiter sciüra insciö tosc la fin di nonanta menüc y fej jí i sogadus sot la duscia cialda. Da alzé fora na buna prestaziun dl La Val a confront dles ultimes partides, cuntra en aversar combatif y determiné a porté a ciasa la devënta cina la fin.
La Val – Rina 0-0
Formaziun La Val: 1. Sepl Kantioler, 2. Thomas Ploner, 3. Michele Campei, 4. Ivan Tschaffert, 5. Paolo, 6. Luca Bernardi, 7. Alex Elzenbaumer, 8. Stefan Sottara – capitan, 9. Christian Terza, 10. Moling Philipp (dal 59^ Martin Menazzi), 11. Martin Ploner
Formaziun Rina: 1. Manuel Huber, 2. Michael Rungger, 3. Alfons Facchini, 4. David Huber, 5. Hanspeter Rungger, 6. Thomas Huber, 7. Stefan Rungger (dal 55^ Lorenz Rungger), 8. Dennis Gasser (dal 75^ Manfred Promberger), 9. Klaus Promberger - capitan, 10. Franz Tolpeit, 11. Daniel Frenes (dal 69^ Lois Pedevilla)
Proscimes partides: La Val süga in sabeda ai 10 de otober dales 15:30 a Pretau cuntra la scuadra de ciasa deperpo che Rina süga la domënia dales 15:30 te ciasa cuntra le Raas.
Atri resultac:
Altherren (La Val): Rodenech – La Val : 1-0
Juniores (Mareo): Porsenù – Mareo : 6-0
Giovanissimi (Val Badia): Burnech – Val Badia : 6-0
U-13 (La Val): San Laurenz – La Val : 11-1
U-10 (La Val): Uttenheim – La Val : 15-4
