2ª partida de campionat - Rina

En bel publich de spetadus é ruvé adalerch a La Val l’ultim fin dl’edema por le derby ladin. La devënta é tlera por i ghesc, che mët bun trëi iadi le palé te porta dl La Val.

Tratan l‘ultima edema él gnü a se dé bëgn dui derby ladins indolater. Le La Val y le Rina s‘á mosoré naota le mercui de Copa Provinzia y la sabeda spo te campionat, tres a La Val. Te tramres döes incuntades é sté le Rina le favorit, purtan a ciasa la devënta tla lotaria di önescmetri le mercui y i trëi punc te campionat la sabeda, cun en resultat tler. La partida de campionat é sënzater plö sintida, porchël che ince en bel publich é ruvé adalerch a ciaré pró, respetan les disposiziuns di protocoi covid atualmënter varëntes.

Tla pröma mesora se stüdia jö les döes formaziuns, do che i alenadús á porvé da adaté le jüch Ciaran zeruch ala partida dl mercui. La tenjiun se fej ince sintí tles iames ti prüms menüc de jüch y gran ocajiuns ne él nia da odëi. Purmó al 25^ la prüma por La Val: sön trata dal ciantun röia Stefan a spizuré cun le pé le curan sön le pé de porta, le portier Kosta é chiló reatif a desfanté la trata. Al 41^ spo le vantaje dl Rina, sön na dejatenziun röia le palé te area y le sogadú Mellauner spizurëia de cé sot la stangia de porta ite. Püch dan la fin dl pröm tëmp ti sciampa ciamó Alex E. ala defenjiun aversara y tira lunch a giré cuntra porta, le palé röia indere de n pulan dlungia ia. Le gol dan la fin dl pröm tëmp ti öga dër al Rina che pó jí tla palsa cun le vantaje.

Al scomenciamënt dla secunda pert röia i padruns de ciasa plö determiná te ciamp, mostran vöia de osc le resultat. Indô ti mët le Rina indere i bastuns amesa les iames y insciö röia le radopl al 58^: le capitan Promberger vëgn sorví al limit y tira sëch alt cuntra porta, segnan n gran gol por le Rina. Sciöche da scialdi vigni derby se fej ince sintí le nervosism, che porta pro an sughé grô y a scrai tra cumpagns sön le ciamp, le mandl fosch á indere la direziun tles mans y mantëgn insciö la partida sot a contorl. Impó ne pêrd le La Val nia la speranza y pro deavalié le resultat, val puniziun, trata y ocajiun salta ince fora, mo ne basta nia. A ti taié definitivamënter les iames al La Val é spo la puniziun dal limit de David Huber al 79^: la trata é de potënza y de prezijiun tl‘incrujiada de porta, Nathan pro a se destrá mo ne röia nia a deloj le curan te ciantun.

Le tripl vantaje fej me mo Le La Val ne ó nia la dé sö, purvan ciamó a fa le gol dla bandiera. I ghesc se para indere cun savëi y fej süa la devënta. Cun les ocajiuns anuzades a dovëi se porta le Rina insciö a ciasa i trëi punc, por Le La Val na pordüda ria da dlotí, conscidran ince l‘eliminaziun dl mercui dala Copa Provinzia.

La Val - Rina 0-3

Formaziun La Val: 1. Sepl Kantioler (dal 17^ Nathan Massa), 2. Thomas Ploner, 3. Alan Erlacher, 4. Max Nagler, 5. Paolo Vallazza, 6. Alex Ploner (dal 81^ Complojer Walter), 7. Felix Nagler (dal 46^ Christian Terza), 8. Stefan Sottara-capitan, 9. Martin Ploner (dal 75^ Marco Miribung), 10. Alex Elzenbaumer, 11. Philip Moling (dal 66^ Simon Campei)

Proscima partida: La Val süga süa proscima partida in sabeda dales 15:00 a Wiesn cuntra la scuadra de ciasa