Festa de 50 agn Uniun dl Sport da La Val

La Uniun dl Sport da La Val á complí mez secul de vita. Le iubileum é gnü festejé la domënia 31 de otober a La Val.

Le sport fej tignì adüm, fej cresce amizizies, insëgna valurs y fej bun a anima y corp. Les uniuns dal sport é scores de vita, da pici insö y á porchel en gran pëis tla vita soziala de vigne paisc che á la fortüna da avëi na te istituziun.

Üna de chestes é ince l’Uniun dl Sport da La Val, che pó in chësc ann ciaré zoruch a 50 agn de ativité. Te chësc ultim mez seco él gnü fat y arjunt dër tröp te chësc vers y al é sté tresfora porsones che s’á identifiché te chisc valurs. Cotan de porsones á lauré cun idealism, impëgn y dediziun por tröc agn alalungia y á contribuí cun só sorvij al bëgn de düta la comunité.

LA FESTA

La festa de 50 agn é gnüda spostada ala fin de otober, por gaujes liades ala pandemia, do che ala fin de setëmber él rót for a La Val cotan de caji positifs dal virus. Cuntënc de avëi podü organisé le iubileum, á i funzionars dl’Uniun podü i dé le bëgngnü sot la gran tenda scialdada metüda sö aposta por l’ocajiun, a na bela cumpëda de jënt, danter sogadus, autorités, familiars y simpatisanc.

A dé le prüm salüt ai presënc é sté le presidënt dl’Uniun Alex Alton, avisa 50 agn dedô, da canche so pere Tino Alton é gnü lité sciöche prüm presidënt cun l’inciaria de fa pié ia la storia dl’Uniun. Al á alzé fora l’importanza dl spirit de volontariat y á rengrazié sü predezesurs por l’impëgn y le laur fat tratan düc chisc agn, sciöche ince só comité y düc chi co contribuësc cun en sorvij a bëgn dl’Uniun.

A tó le microfon tla man y condüje i salüc da pert dles autorites é spo Diego Clara d’Al Plan che n’es á porté zeruch dl tëmp, se cuntan sura la storia dl’Uniun cun fac interesanc y evënc de piz. Al é spo passé a lí dant ai presënc la lëtra ruvada adalerch da pert dl presidënt dla junta provinziala Arno Kompatscher, nia presënt ala festa por atri impëgns. Tl test él parores de rengraziamënt por i tröc volontars che dëida tl’uniun, sciöche ince l’importanza por le laur che é gnü fat, che öga da fundamënta por le dagní.

Sön paiun él spo gnü invié l’ ombolt da La Val Angel Miribung y l’assesur ai jogn y al sport Felix Nagler, che adüm á sotrisé la valüta che l’Uniun porta por nosc paîsc, che contribuësc insciö ala cuntentëza y ala cualité de nosta comunité. I rapresentanc de comun á lascé lerch ince a valgünes informaziuns sura le proiet de revalutaziun dla zona sportiva. Le ciamp sintetich atual toma tosc fora dl’omologaziun dla federaziun y in plö él nezesciar da renové totalmënter le fabricat costruí tl’ann 1995, che mëss tresfora gní adortoré sö a gauja de infiltraziuns dl’ega y por instabilité. Le proiet, bel gnü scrit fora y asegné al davagnadú dl concurs, ti jará adincuntra prinzipalmënter ai jogn, cun le fin de costruí en zënter sportif multifunzional che ti va adincuntra ales proscimes generaziuns y ai jogn, che pó insciö se abiné y sté adüm, pratican de vigni sort de ativites. Ala pert de chësc proiet é ince le sorvij ai jogn Val Badia che á daimprüma insö colaboré cun le fin de costruí na ciasa por i jogn che pó insciö anuzé la strotüra cun i locai dl sport.

Presënt ala festa é ince le Vize Presidënt dl Consëi Provinzial y compaesan Manfred Vallazza, che á ince viüt para le crësce dl’Uniun y á insciö podü ti cunté ai presënc sües esperiënzes personales y s’á sofermé sön le valur dl tigní adüm por arjunje traverc de grup.

Sciöche rapresentanc dla Federaziun dl jüch dal palé y dl VSS da Balsan é ince ruvá adalerch Siegfried Stocker y Nagler Richard, che á porté dant statistiches interesantes di ultims 50 agn de storia dl palé, cuntan sö i numri de partides davagnades, pordödes, goi fac y ciafá. Al é spo gnü rengrazié i funzionars y aodé düt le miú por le dagní al’uniun.

En ocajiun dl’aniversar él ci gnü arjigné de nü vestimënt por düc i mëmbri dl’Uniun. Le kit de guant nü é en gran pert gnü finanzié dai sponsor, a chi che al ti va en gran giulan por le sostëgn!

Te 50 agn de storia á l’Uniun dl Sport da La Val arjunt dër tröp, al é sté alc y basc, desfides y gran sodesfaziuns. Por imortalé düc chisc momënc y por i dé la parora ai funzionars y atlec che á viüt para ativamënter la storia dl’uniun á le comité tut la dezijiun de lascé mët adüm en film. Diego Clara d’Al Plan y süa troupe s’á dé da fa por realisé le documentar, che cunta cun imajes, filmac y intervistes, la storia dl’Uniun dal mëteman cina aldedaincö.

Por l’ocajiun éle ince gnü metü a jí en concurs da dessigné por mituns y mitans dla scora elementara y mesana. La domanda chi mituns á ciaré de respogn cun en só dessëgn é stada: ci ó pa dí o ci epa port e le sport? I dessëgns ruvá adalerch é spo gnüs valutá da na iuria y é gnüs premiá tratan le domisdé dla festa. In plö él ci gnü surandé valgünes onoranzes de begnmirit: Monica Ploner (11 agn -3 legislatüres- pro le comité), Micky Frenes (11 agn -3 legislatüres- pro le comité) y Werner Sottara (15 agn pro la prüma scuadra).

Cun gran plajëi podunse ves mostré le film sura i 50 agn de nosta Uniun: 50agn U.S. La Val