US LA VAL
 
 
     
 

Campo vedl

Stampa PDF

 

Realisaziun de na zona dl sport

An á messü aspetè tröc agn

Bele dai ultims agn 70 incá á i funzio­nars dl'Uniun tres porvè da portè inant la rea­lisaziun de na zona dl sport por le paîsc da La Val. Por arjunje chësc fin êl sambëgn n grüm de dificoltês y impedimënc’ da sur­passè, mo ch'ara ess inultima duré tan dî, ne se ess magari degügn aspetè laôta. Dantadüt la jënt jona sintî la nezescité da avëi a desposiziun na tè infrastrotüra y propi por le bëgn di jogn y di mituns mes­sâra gní realisada. Sce an pënsa che alde­da­incö él a La Val 1.230 abitanc’ y che le 50% de chisc é sot a 30 agn y 22% dla po­po­laziun é plü jona de 15 agn, spo él evi­dënt che na zona por l'sport jê veramënter debojëgn y ch'al ê gran ora da realisé chësta infrastrotüra.

Propostes portades dant dal "comitê por la zona dl sport"

Le consëi d'aministraziun dl'Uniun â nominé tla sentada di 01.05.1980 n comitê por fistidíe da portè inant la pratica por la realisaziun de na zona dl sport. Te chësc comitê él gnü nominé Sepl Sottara (presi­dënt), Giuvani Comploi (vize-presidënt), Sepl Tavella, Otmar Moling, Tino Alton y Paul Alton. Bele por le medemo ann da d'al­tonn á le comitê, adüm cun le consëi d'ami­­ni­straziun dl'Uniun dl Sport, laurè fò­ra n val­günes propostes de posc’ adatá por la realisaziun de na zona dl sport, cun la valu­taziun di aspec’ positîfs y negatîfs. Al ê gnü ponsè a indüt sis ubicaziuns des­va­líes söl teri­tore comunal. Les döes propostes che parô plü realistiches ê i posc’ "Plans" y "Pidrô" (Plan dl Galber). La preferënza dl comi­tê ê laôta orientada ala secunda pro­po­sta, por gauja di mëndri cosc’ de realisa­ziun, dla maiú lerch sciöche ince dles mius con­diziuns climatiches. I atri cater posc’ che gnê tuc’ en con­sci­draziun ê "Alcialc", "Piculin" (sot la dlijia, ola­che al é spo gnü realisé la zona d'espan­siun), "Cestun" y "Pidrô" (olache al é sëgn la zona artejanala nöia). Chëstes propostes ê bele atira gnüdes lasciades tomè, propi dea­che val' posc’ ê bele resservá a d'atres opres o deache la lerch a desposiziun ê massa picera.

La zona dl sport "Plans"

FIL00348

Dô che al é gnü tröc’ agn patajè por ciafè le post adatè, olache al ê ince meso da ciafè le grunt a n prisc da ciafié, él tl ann 1989 gnü laurè fòra dal Ing. Leopold Clara n prüm proiet de mascima por la realisa­ziun de na zona dl sport tla localité "Plans". Bele l'ann dô á le Geom. Rinaldo Crepaz ar­jigné n proiet plü detaié, che preodô danter l'ater ince la realisaziun de n'abitaziun y de locai plurivalënc’. Deache chësc proiet ne n'á nia ciafè le bëgnstè da pert di ofizi pro­vinziai, é le medemo ciamò en chël ann gnü reelaborè dal Arch. Osvald Valentini, olache la cuba­türa é gnüda diminuida das­sënn. Aladô de chësc proiet che é atira gnü apro­vè, él spo gnü realisé la zona dl sport cun chëstes infrastrotüres:

-    Plaza dal palè de 100 x 60 m cun funz de saurun. La plaza dal palè é ince zir­con­dada da na sí y por podëi soghé y se alenè ince dasëra él gnü fat n implant d'ilu­minaziun cun na potënza totala de 20 KW.

-    Frabicat sportîf cun trëi locai da se mudé, trëi magazînns, n local por l'Aiüt Alpin y n pice bar. Sö sot al tët él ciamò n local che pò gní adorè sciöche fitness-center.

-    Döes plazes da tennis, üna cun funz de tera cöcena y l'atra cun funz sintetich, rea­lisades dala Pro Loco da La Val, cun n implant d'iluminaziun da 12 KW.

Le grunt nezesciar de 1,5 ha ti é gnü espro­prié ala vijinanza "Lunz-Taéla-Rü" al prîsc de 285 miliuns.

Mëis de má 1992: i laûrs vëgn metüs man

I prüms laûrs d'escavaziun por la realisaziun dla plaza dal palè é gnüs metüs man ai 27.05.1992. I laûrs á podü gní portá inant en gran pert ciamò intratan le me­de­mo ann y é gnüs rová tl mëis de jügn 1993. Tl medemo tëmp él ince gnü metü man i laûrs de costruziun dl frabicat sportîf. I locai da se mudé é gnüs ultimá por le sco­men­­ciamënt dl campionat 1994/95, i atri laûrs intratan l'aisciüda 1995. I laûrs por la rea­lisaziun dles plazes da tennis é gnüs metüs man intratan l'aisciüda 1994 y rová te püc’ mëisc. Bele ala fin de agost an podü mëte man de soghé a tennis. Tratan la sajun da d'altonn 1994 él ince gnü metü en funziun l'implant d'ilumina­ziun. Por le refornimënt d'ega él gnü ôt ada­lerch l'ega da na funtana sö dlungia la pista dla lüsa "Furnela". En chësta ocajiun él stè l'Uniun dl Sport che á fat cun l'aiüt de vo­lon­tars deplü laûrs en economía. Ince l'are­da­mënt di locai da se mudé y dl bar é gnü surantut dal'Uniun dl Sport, che á ciafè por chësc fin n contribut dal Comun. Le cost final por la realisaziun dla zona, tuta fòra la soma por l'espropriaziun dl grunt, amunta a indüt 1 miliard y 944 mi­liuns.

Inauguraziun dla zona dl sport "Plans"

FIL03962

La domënia, ai 6 de agost 1995 é stada n gran dé de festa por l'U.S. La Val: al é gnü inaugurè y surandè a süa destinaziun la zona dl sport "Plans". La festa, oganisada dal'Uniun dl Sport adüm cun la Pro Loco, á metü man cun na sfilada dla musiga da La Val, che á acumpagné les scuadres dl palè di gragn y di mituns, i rapresentanc’ dl Aiüt Alpin y düc’ i ghesc’ íte tla plaza dal palè. Dô che la musiga á albü sonè n valgünes cian­ties á les autoritês rovades adalerch tut la parora. N gran onur por i organisadus é stada la presënza dl presidënt dla junta pro­vinziala, Luis Durnwalder, che sciöche an sá vëgn dagnëra dër gion a La Val. Dô les parores dl ombolt, Carlo Miribung, dl presidënt dl'Uniun dl Sport, Pio Ploner, dl assessur de comun por l'sport y turism, Arnold Alton, dl manajadú dl VSS, Manfred von Call, y sambëgn ince dl presidënt dla junta provinziala, Luis Durnwalder él spo stè siur curat, Heinrich Perathoner che é passè ala bendisciun dla zona nöia. Le presidënt dla junta provinziala á spo daurí ofizialmënter la zona dl sport nöia cun le tai dla vëta. Spo é düc’ canc’ jüs söla te­ras­­sa, olache al é gnü arjigné ca dala Pro Loco n bun buffet cun de vigni sort de patüc da mangé y da bëre. Plü tert él gnü fat na gara de tiri dai 11 metri, olache i ghesc d'onur adüm cun i aconsiadus de Comun á podü mëte en mostra süa mira da trá le palè. La gara é gnüda davagnada dal asses­sur Arnold Alton y dal aconsiadú Gottlieb Moling. La festa é spo jüda inant cun döes partides dl palè. Tla prüma partida s'á la scuadra di D-Jogn da La Val, che â da püch con­cuisté le 3. post provinzial, mosoré cun na seleziun dla Val Badia metüda adüm en gran pert da sogadus dl Mareo y da n val­gügn sogadus dl'Alta Badia. Le resultat de 4 : 1 por la scuadra de ciasa á ciamò n iade confermè le bun livel arjunt dai mituns da La Val. Por la secunda partida él gnü invié la scuadra da Rina, che â davagné le campio­nat de 2. categoría 1994/95, a sfidé na se­leziun dla Val Badia. Al é gnü soghé dër na bela partida, a chëra che por gajua dla plöia ne n'él nia stè dër tröpa jënt a ciarè prò. Le re­sultat n pü' sorprendënt de 3 : 1 por la se­leziun metüda adüm da Rinaldo Ploner é stè mirité, en conscidraziun dles tröpes oca­jiuns da gol che la scuadra á albü. Dasëra, canche la plöia a por fortüna lascè de tomè dal cîl, é la festa ciamò jüda inant fina dô mesanöt fòra cun les beles cianties da bal dl Fanes Trio.

In injunta valgünes foto dl campo vedl y dla festa dl' inauguraziun.


Pur udei les foto clicca. FOTO
 

Sponsoren

logo_M2_Srl raiffeisen miribung seve decor auto_vallazza Frenes_Patrick Plana_Ladina

Login



      Uniun Sport Amatoriala La Val, San Senese 1, I-39030 La Val
      info@uslaval.it - C.F. 81009280215 - ©