1ª partida de campionat rit. - Uttenheim

Le La Val va in vantaje tla prüma pert mo dëida i aversars rosedé le resultat, ti scincan insciö i trëi punc tla prüma partida.

I sogadús da La Val é bele da valgünes edemes che ai s’alenëia sön le ciamp de Plans, la pücia nëi tomada y les temperatüres cialdines á pormetü de scomencé bele da atira cun la preparaziun sön le ciamp sintetich a La Val. Cun le tanch ciarié de nöies forzes s’á spo la formaziun presenté l’ultim fin dl’edema a se mosoré tla prüma partida de retüda tl campionat de 3a categoria rode C cuntra le Uttenheim, scuadra sön le cherta tla pert alta dla tlassifica, che pó se sughé le salt de categoria.

I prüms vint menüc dla partida é le La Val che comanda, i sogadus röia te ciamp cun la dërta mentalité y fej na buna presciun sön i aversars, ruvan a bunes contlujiuns dan porta. Al 13^ se porta spo i ladins in vantaje cun le gol de Alex Rubatscher “Ruba” da Al Plan: al tôl le palé y le porta cuntra porta, cun na udlada vëighel le portier fora de porta y pro na trata a giré che ti gareta ince. Le curan che cogora insciö te porta ti scinca le vantaje ai padruns de ciasa. Püch do pëia ia na crossada dal defensur Thomas cuntra sön l atacant Philip che röia dan porta a rebat de ce de püch sura fora. Do le vantaje indere se destüda la determinaziun ladina che ti fej insciö post al’avanzamënt aversar. Bele al 21^ ti garetel de avalié le resultat sön na dijatenziun dla defejiun de ciasa. Le palé ruvé amez area vëgn apogé dal defensur tles mans dl portier: por l’arbiter ó di chësc trata de puniziun te area. Le mür defensif metü sö ne é nia bun de desfanté la trata. Le 1-1 deura sö danü la partida y ince La Val se desceda indo, les ocajiuns ne é indere nia massa prigoroses.

Tla secunda pert vëigun na reaziun dla formaziun de ciasa, i palés vëgn contrastá a dovëi y ince la convinziun é indo chëra ti prüms menüc dla partida. Fora de en cil sarëgn indere ti vëgnel conzedü ai aversars le vantaje sön en taî d’arjënt. Le passaje massa debl da pert dl mezciamp röia al portier ladin che pro da le trá demez mo Rebat avisa ados al’atacant dl’Uttenheim. Chësc á ma plö bria de ciaré sciöche le curan röia te rëi.

Le La Val pro ciamó da se refá tl’ultima cherd’ora cun val sostituziuns frësches, che porta düta la scuadra a sughé plö ofensif, mo concretamënter ne basta nia a avalié o rosedé le resultat. La pordüda é insciö ria da azeté, mo bele tla proscima partida incunta le La Val la scuadra da Rina, daulache ai ará indo l’ocajiun da se refá.

La Val – Uttenheim   1-2

Formaziun La Val: 1. Sepl Kantioler, 2. Natan Colletta (dal 60^ Felix Nagler), 3.Thomas Ploner, 4. Simon Campei, 5. Paolo Vallazza, 6. Alex Ploner, 7. Mattia Mutschlechner (dal 77^ Martin Miribung), 8. Stefan Sottara – capitan, 9. Alex Rubatscher, 10. Alex Elzenbaumer, 11. Philip Moling (dal 70^ Martin Ploner)

Alenadú: Costabiei Patrick

Proscima partida: La Val in duman sabeda dales 16:00 le derby a Rina cuntra la scuadra de ciasa.

Atri resultac de chësc fin dl'edema:

U-15: San Laurenz – Val Badia 0-2

U-11: Obopuschtra Jugend – La Val 9-5