Na batosta pesocia cuntra le San Iöre Amateure, che concretisëia cun furbizia vigni aziun costruida.

 

Na domënia da desmuntié por la scuadra da La Val, che vëgn rosedada cun en resultat plö che tler por i aversars. A fa na gran desfarënzia pro le San Iöre é indo en iade le talënt d’esperiënza T. Piffrader, che ti lascia al mür defensif püces poscibilites dl’archité sö y castighëia a dovëi sön vigni ocajiun de tra sön porta.

I prüms vint menüc pëia ia ince bun i ladins, tignin sö i aversars y davagnan val picia ocajiun dan porta. Al 23^ toma spo le pröm gol por le San Iöre, Piffrader sciampa da na pert jö y passa al limit por le compagn che plazëia bun le curan dlungia le pé de porta ite. Dui menüc dedo röia indo en palé amez dala medema posiziun, Brugger röia indo da dô pro a splundré le palé te rëi. Al 32^ concuistëia i aversars le palé al limit y passa a Piffrader amez area, che controlëia sënza problems y tira te rëi.

Na duscia frëida por i ladins, che perd intensité y se destüda ia. I prüms 20 menüc dla secunda pert pensa le medem Piffrader o mostré dütes sües cualites, naota él bun de trá fora na trata dai önescmetri che vëgn indere spo trata dlungia ia. Püch do al 51^ se fejel passé le curan dal ciantun y se tira lateral sön la riga dl limit por rové spo a le trá bass dlungia le pé de porta ite. Bel le medemo gol él bun da fa al 63^. Ciamó atira dedo röia süa trata de puniziun a rebat cuntra la stangia de porta ladina. Por val menüc é sëgn i ghesc che se fej inant y röia al gol cun Alex M. che apogëia le palé te porta sön na rebatüda dl portier. Valgünes ocajiuns cun trates dal limit di gareta ince ciamó ai ladins, mo che ne é nia plö d’intan prigoroses.

I ultims trëi goi por le San Iöre toma ti ultims trëi menüc, i goi é de Niederbrunner, Piffrader y Oberlechner. En fin de campionat da dementé por i sogadús da La Val, che va sëgn tla palsa da d’isté. Chesc ó dí recuperé forzes, s’organisé danü por rové arjigná al’altonn por le nü campionat.

San Iöre Amateure – La Val 8-1

Formaziun La Val: 1. Sepl Kantioler (dal 55^ Nathan Massa), 2. Marco Miribung (dal 45^ Natan Colletta), 3.Alex Ploner, 4. Paolo Vallazza, 5. Simon Campei, 6. Felix Nagler, 7. Christian Terza, 8. Stefan Sottara – capitan, 9. Martin Miribung (dal 45^ Alex Rubatscher), 10. Philip Moling (dal 45^ Alex Miribung), 11. Mattia Mutschlechner

Gol por La Val: Alex Miribung al 78^

Atri resultac de chësc fin dl'edema:

Altherren: Welsberg – La Val 8-0
U-15: Val Badia – Aldein 2-1