2ª partida de campionat - Falzes

Le La Val mostra na gran reaziun tla secunda pert dla partida y oj le resultat davagn i prüms trëi punc dla sajun te ciasa.

Sön le calënder dl’ultim fin dl‘edema él i aversars dl Falzes, scuadra tomada jö dala 2 categoria la sajun denant.

I ghesc mostra da atira na gran determinaziun. La presciun cuntra la defenjiun ladinia é grana y i padruns de ciasa se stënta a costruí le jüch. Al 25^ perd le mezciamp n palé püch fora dal‘area, l‘atacant dl Falzes mosöra a dovëi y tira sëch a giré sot l‘incrujiada de porta. Sepl pro de abiné le curan mo ne n‘á baldi degüna poscibilité. Le La Val davagna ince val ocajiun dan porta, mo ne é indî nia prigorus. Les döes formaziuns va te cabina a palsé do i prüms carantecinch menüc cun le Falzes in vantaje por 1 a 0. Les parores dl alenadú y val mudaziun ala formaziun á dessigü contribuí ala reaziun di sogadús tla secunda pert.

Ti prüms menüc é ciamó le Falzes che cumana le jüch, la defenjiun ladina laora cun determinaziun por desfanté l’atach aversar. Parüda fej ince Luca Pescollderung, che é indo gnü zeruch sön le ciamp da jüch do bëgn dui agn de palsa. Al 60^ se oj spo daldüt la partida. Le presciun aversara da dô y i padruns de ciasa mët man de abiné i palés y a costruí de beles aziuns de jüch. Al 75^ gareta na combinaziun sön trata de puniziun por La Val, Stefan röia sön le ciantun y crossëia amez, Franz röia a dërt post y stachëia alt de ce por rebat le curan te porta. Avalié le resultat ó dí nöia forza y grinta lapró. Insciö era ince jüda, al 86^ él Alex E. che abina le palé y crossëia amez daulache Felix tira al jore dlungia le pé de porta it. La ligrëza é grana, sides por le vantaje y sides por la bela reaziun de grup che mancia da zacotan de partides. Ma inant insciö!

La Val – Falzes   2-1

Formaziun La Val: 1. Sepl Kantioler, 2. Thomas Ploner (dal 73^ Alan Erlacher), 3.Alex Ploner, 4. Paolo Vallazza, 5. Luca Pescollderung, 6. Philip Moling (dal 46^ Alex Miribung), 7. Christian Terza , 8. Stefan Sottara – capitan, 9. Alex Elzenbaumer, 10. Franz Tolpeit, 11. Mattia Mutschlechner (dal 62^ Felix Nagler)

Goi por La Val: Franz Tolpeit al 75^, Felix Nagler al 86^

Proscima partida: In duman sabeda dales 15:30 a Stegen cuntra le Dietenheim

Atri resultac de chësc fin dl'edema:

Aliefs (Val Badia): Schabs – Val Badia  2-2

Jogn B (Mareo/La Val): Mareo – Reichach 5-3

U-12: La Val – Alta Badia  1-1

U-10: La Val – San Iöre  3-1