7ª partida de campionat - Sterzing
Le scomenciamënt dl secundo tëmp é fatal por le La Val, che vëgn rosedé dala formaziun dl Sterzing.
Nia en bun mumënt por la prüma scuadra da La Val, che mëss dlotí na pordüda pesocia fora de ciasa. La scuadra dl Sterzing s’á in chësc ann indo scrit it do da tröc agn al campionat FIGC cun na formaziun jona y determinada. I ladins á albü gran dificolté, cis tla secunda pert olache i aversars ti peta bëgn cinch iadi l’ajei.
La partida pëia ia ala pêr, cun le jüch scialdi a mez ciamp. I aversars é bugn de se fa inant a tra fora ince valch ocajiun dan porta, mo sënza ester plö cotan prigorusc. I sogadús é posizioná bun te ciamp y tëgn sö le jüch aversar cina püch dan la fin dl pröm tëmp, canche en atacant röia a rebat de ce le palé te porta sön na trata dal ciantun. Le vantaje aversar püch dan i pröms carantecinch menüc fej me.
Tla secunda pert resta i ladins cun le ce te cabina. Tl tëmp de diesc menüc, plö avisa dal 50^ inant röia le curan bëgn trëi iadi te porta ladina. I sogadús dl Sterzing süga fora te dütes trëi les ocajiuns bun i ghesc y castighëia a dovëi dan porta. I trëi goi ti taia les iames ai sogadus che ne é nia plö bugn de reagí. Insciö stlüj ciamó jö l’atacant Königsrainer al 80^ y 90^ cun dui de bí goi: al driblëia a dovëi la defenjiun y tira trami dui iadi de prezijiun lunch dlungia le pé de porta ite. Na batosta por la formaziun ladina che mëss ciaré y se focusé ala partida te ciasa cuntra le Perca, daulache la priorité é i trëi punc.
Sterzing – La Val 6-0
Formaziun La Val: 1. Giovanni Erlacher, 2. Simon Campei (dal 62^ Thomas Ploner), 3.Paolo Vallazza, 4. Max Nagler - capitan, 5. Alan Ellecosta (dal 75^ Alexander Complojer), 6. Philip Moling, 7. Christian Terza (dal 45^ Alex Rubatscher), 8. Felix Nagler (dal 73^ Alex Ploner), 9. Manuel Ties (dal 45^ Mattia Mutschlechner), 10. Alex Elzenbaumer, 11. Alex Miribung
Alenadus: Patrick Costabiei y Albert Castlunger
Proscima partida: In duman sabeda dales 15:30 te ciasa cuntra le Perca
Atri resultac de chësc fin dl'edema:
Altherren: Welsberg – La Val 3-0
Allievi (Val Badia): Gsies – Val Badia 1-4
Giovanissimi (Mareo): Mareo – Pfalzen 3-2
U-12 (La Val): Obopuschtra Jugend – La Val 9-4
U-10 (La Val): Steinhaus – La Val 1-2
