2ª partida de campionat rit. - Falzes
I ladins va sot tla prüma pert de partida y ne é nia plö bugn de recuperé le svantaje.
Le La Val ne é nia bogn de porté tl ciamp dl Falzes la grinta mostrada cuntra le Pretau le fin dl’edema denant. I padruns de ciasa se porta in vantaje bel tl pröm tëmp y mantëgn le resultat invarié cina la fin.
Le pröm gol toma bel ti prüms menüc dla partida. Dal limit vëgn l’atacant lascé sú a trá cuntra porta, Sepl pro de desfanté la trata mo sön la rebatüda röia ciamó en sogadú dal Falzes a apogé te rëi ladina. Le ciamp pesoch da Falzes ne é nia d aiüt por i ladins che ne abina nia le dërt ritm de jüch. Insciö radopiëia le Falzes le resultat ala cherd’ora cun na passaja alta amez por l’atacant che controlëia a dovëi y tira sëch al jore sura Sepl it cuntra porta. Na ocajiun di ladins sön trata dal ciantun al 25^ cun Stefan che pro de ce mo le portier deloj le curan sura porta fora. Dan la fin dl pröm tëmp ne devënta trames döes scuadres nia plö prigoroses y va tla palsa sön le 2-0.
Le alenadú dl La Val müda val toch dla formaziun dla secunda pert y chësc porta ince sü früc. Ara va da tigní sö i aversars y a soghé le palé te area aversara. Gunot mëss i sogadús protesté cuntra les dezijiuns dl mandl fosch, che ne é nia tres a üna cun les sogades sön le fí de forajüch. Scialdi tres ne röia insciö nia i ladins pro porta a trá y mëss pié ia l’aziun danü.
Al 70^ ti sciampa Franz ala defenjiun y passa a Michele che röia sú cuntra porta. Avisa ala trata vëgnel metü fora de ecuiliber dal defensur aversar y toma a tera. L’arbiter ne archita nia le jüch y vëgn metü a düra proa da les protestes di ghesc: al se tëgn indere toch a süa dezijiun.
Ti ultims vint menüc ne gareta nia le gol y insciö pó i padruns de ciasa se mët al sigü i trëi punc. Por le La Val na pordüda antia che pó ma fa da insegnamënt por les proscimes partides.
Falzes – La Val 2-0
Formaziun La Val: 1. Sepl Kantioler, 2. Paolo Vallazza, 3. Alan Ellecosta (dal 45^ Kevin Kastlunger), 4. Michele Campei, 5. Christian Terza, 6. Philip Moling, 7. Felix Nagler (dal 70^ Marco Ellecosta), 8. Stefan Sottara - capitan, 9. Franz Tolpeit, 10. Mattia Mutschlechner (dal 45^ Manuel Ties), 11. Alex Rubatscher (dal 80^ Thomas Oberlechner)
Proscima partida: In duman sabeda dales 16:00 a a Uttenheim cuntra la scuadra de ciasa
Atri resultac de chësc fin dl'edema:
Allievi (Val Badia): Val Badia - Neugries B 0-4
Giovanissimi (Mareo/La Val): Feldthurns - Mareo 6-2
U-12 (La Val): Valdaora - La Val 7-0
