5ª partida de campionat rit. - San Iöre Amt.
Le La Val ti lascia i punc al San Iöre, do na partida bataliada cina l’ultim menüt.
Ala scuadra da La Val ti á toché in chësc ultim fin dl’edema da jí a San Iöre a se mosoré cuntra la scuadra de ciasa. En aversar sterch, che batalieia a ce dla tlassifica y che po fa afidamënt sön val sogadú de gran esperiënza. Lapró ciamó en gran ciamp dal palé y na temperatüra cialdina: düc i indredienc por na sabeda domisdé de batalia. Insciö era ince stada, i ladins tëgn bót mo vëgn castigá atira dal mëteman dl secundo tëmp cun na morvëia dl numer set.
Le La Val mët atira man bun y manacia de tra fora bele ti prüms menüc en önescmetri por en fal sön l’atacant. L’arbiter ne s’infida indere nia da le conzed. Le San Iöre manacia ince ala cherd’ora da deslié le resultat cun na gran trata da na pert ite cuntra porta, le palé rebat cuntra le pé y passa fora la linea de porta. Sciöche bele dles partides da denant, vëgn le jüch dl San Iöre costruì sön le numer set Tommy Piffrader cun de vigne sort de passajes.Le sogadú é indere limité dal defensur Michel C. che ti lascia pücia lerch a sües morvëies. Por ne lascé nia pro al goal fej ince Sepl valgünes gran parades, sciöche chera al 35^ cuntra le stach de ce dl’atacant sön trata dal ciantun.
I sogadus va tla palsa a recuperé forzes sön le resultat de 0-0.
Püch dal mëtaman dl secundo tëmp ti sciampa Piffrader da na pert jö y mët amez na crossada ejemplara por le fré Alex che röia a rebat sech de ce le palé te porta. Le San Iöre ciafa coraje y pro inant da ataché, le mür di ladins è indo bun posizioné y ne lascia na sciampé valch cina le 80^ canche na crossada röia amez area y l’atacant Seeber röia por pröm lassura, controlëia bun le curan y taia fora le portier dl La Val, al á ma plö bria dal apogé te porta. Tramres les formaziun é als ultimes forzes y al ne sozeda nia plö de interessant. Por i ladins en resultat aje, ai pó indere ciaré zeruch a na bela prestaziun de grup, che ti da forza por le proscim fin dl’edema.
San Iöre Amateure – La Val 2-0
Formaziun La Val: 1. Sepl Kantioler, 2. Paolo Vallazza, 3. Kevin Kastlunger, 4. Michele Campei, 5. Alex Miribung (dal 65^ Alan Ellecosta), 6. Christian Terza, 7. Franz Tolpeit, 8. Stefan Sottara - capitan, 9. Manuel Ties (dal 45^ Alex Rubatscher), 10. Natan Colletta (dal 45^ Philip Moling), 11. Marco Ellecosta
Proscima partida: In duman sabeda dales 15:30 te ciasa cuntra le ACD Val Badia
Atri resultac de chësc fin dl'edema:
Altherren (La Val): La Val – Dietenheim 0-1
Allievi (Val Badia): Vahrn – Val Badia 3-1
Giovanissimi (Mareo/La Val): Botner – Mareo 11-1
