US LA VAL
 
 
     
 

9ª partida de campionat rit. - Gitschberg

Stampa PDF

La_Val_Rina

La Val se refesc te ciasa cuntra le Gitschberg/Jochtal y se mët insciö i ultims trëi punc te gaiofa.






Cun la fin de ma se röia en gran pert i campionac dl palé d’aisciüda. Insciö ince por la scuadra da La Val, che á milité te chësta ultima sajun tl rode C de terza categoria. En ann nia daldüt saurí, cun 4 devëntes, 1 en per y 12 pordüdes. Impó é le grup sté compat y á batalié cina l’ultim sciüre por vigni punt, sciöche ince cuntra le Gitschberg l’ultim fin dl’edema de campionat. Stlü jö le campionat cun na devënta ê le compit, che do na bela prestaziun de grup é ince garaté.

La partida mët man cun les döes formaziuns che se stüdia jö, impormó ala cherd’ora ti gareta al La Val la prüma gran ocajiun che é ince gnüda concretisada. Sön na passaja dal mezciamp röia l’atacant Matti sú cuntra porta, al tol le mosüres y tira bass sot le giames fora dl’portier dl Gitschberg por le 1 a 0. Chësc gol ti porta coraje ai ladins che süga inant cun determinaziun, impó é i aversars che tegn bót y defenn bun süa pert de ciamp. Al 33^ costruësc i ghesc na aziun y süga fora la mür ladin, la trata dl’atacant rebat indere sëch cuntra porta. En prüm tëmp ecuilibré cun i ultims menüc de jüch che ne pîta nia gran ocajiuns al publich ruvé adalerch.

Val sostituziun dla formaziun ladina dess porté sü früc y daidé a sigilé le resultat. Chësc mëss indere aspeté. A bóc fej i ladins druch sön la defenjiun dl Gitschberg, che mëss aretré y se stlü por tigní bót ai inserimënc da na pert ite de Michele. Plö iadi röia chesc jö da pé de ciamp y pro de crosé amez por i cumpagns che röia indere massa tardis sön le curan. I sogadus vegn nervusc, cun le resultat malsigü cina le 84^, canche la formaziun de ciasa davagna na puniziun al limit dl’area. Le pé de Felix é cialt y porchël él vël che se presentëia ala trata. Cun segurëza y dezijiun tira Felix le palé a giré sön le pé lunch de porta y por le portier é chësc fatal. La bela trata di porta le 2 a 0 ala scuadra de ciasa y insciö ince la devënta finala de campionat.

Insciö s’a ruvé ince chesc campionat por le La Val che va sëgn tla palsa da d’isté a recuperé val forzes po en ater ann. I tolun l’ocajiun por rengrazié i sostenidús che é tres presënc ales partides, i sponsor y vignun de os che á fat en sorvij por nosta scuadra, giulan!


La Val – Gitschberg/Jochtal  2-0


Formaziun La Val: 1. Alex Pedevilla, 2. Natan Colletta (dal 60^ Ellecosta Alan), 3. Michele Campei, 4. Paolo Vallazza, 5. Kevin Kastlunger (dal 65^ Alan Ellecosta), 6. Christian Terza (dal 45^ Alex Rubatscher), 7. Felix Nagler, 8. Franz Tolpeit (dal 89^ Maximilian De Lorenzo Meo), 9. Philip Moling (dal 67^ Manuel Ties), 10. Max Nagler, 11. Mattia Mutschlechner (dal 79^ Simon Campei)

Alenadus: Patrick Costabiei y Albert Castlunger


Atri resultac de chësc fin dl'edema:

Altherren (La Val): La Val – Welsbert  0-1

Allievi (Val Badia): Neugries B – Val Badia  6-2

Giovanissimi (Mareo/La Val): Mareo – Feldthurns  4-3

 

Sponsoren

logo_M2_Srl raiffeisen miribung seve decor auto_vallazza Frenes_Patrick Plana_Ladina

Login



      Uniun Sport Amatoriala La Val, San Senese 1, I-39030 La Val
      info@uslaval.it - C.F. 81009280215 - ©