4ª partida de campionat - Falzes

La Val incunta le Falzes te chësta cuarta partida da d’altonn. Por resté inant a cé dla tlassifica adori a düc i cosc na devënta. Na partida interessanta cina l’ultim menüt cun protagonist l’arbiter che partësc fora bëgn catordesc gheles y trëi cöcenes.

La partida mët man cun les formaziuns che se stüdia jö y ciara de soghé cun paziënza le palé. Vigni tan é i ladins che vega en pü deplö y costruësc ince val aziun, indere mai dër prigoroses. Al é indere le diretur de jüch che mët man da partí fora amoniziuns por fai da nia. Insciö él tosc le nervosism che se fej sintí te ciamp. Gran ocajiuns dan le prüm tëmp ne éle nia da mostré sö, insciö sun va i sogadús derevers te cabina sön le resultat de 0 a 0.

Atramënter é le secundo tëmp, cun le La Val che resta püch do le mëteman in diesc, do che Franz vëgn desgort dal ciamp por soma de amoniziuns. Tosc do é le Falzes che drüca deplö y röia a desgropé le resultat al 55^. Cun en bel passaje filtrat röia l’atacant sú dan porta ladina y tira bel plan le curan sön le pé de porta lunch. I ghesc ciafa insciö coraje y mët a düra proa la defenjiun ladina, che se para cun determinaziun y röia al 80^ a avalié le resultat. Sön trata dal ciantun apogëia Martin P., apëna rové te ciamp, le palé te rëi aversara y deura insciö danü le resultat. Ti ultims diesc menüc nen suzedel de vigni curú; l’arbiter perd daldöt la direziun dla partida y partësc fora gheles ai sogadus te ciamp y te panchina, sënza iustificaziuns. Al 86^ spo le fal eclatant, l’atacant dl Falzes röia te area, toma a tera dassú, lê sö impé y toma ciamó en iade. Düt chësc sot i edli dl’arbiter che sciüra y mostra sön le punt di önescmetri dan le publich y i sogadus de ciasa che ne crëi nia a ci che ái alda. Sciöche al ne bastass nia ti mostra chësc la secunda cherta ghela a Max che mëss ince lascé le ciamp. La trata é fortunada por le Falzes che va in vantaje. I ultims menüc é ma plö en marcé y en infern por l’arbiter, che fej atira le poch y taia la corda.

Sciode por i trëi punc lasciá al Falzes, che cun en pü de determinaziun lapró ess podü resté te ciasa a La Val.

La Val – Falzes   1-2

Formaziun La Val: 1. Sepl Kantioler, 2. Simon Campei, 3. Max Nagler, 4. Martin Menazzi Marcelo, 5. Paolo Vallazza - capitan, 6. Christian Terza, 7. Felix Nagler (dal 45^ Alex Miribung), 8. Bruno Zanoguera, 9. Philip Moling (dal 75^ Martin Ploner), 10. Franz Tolpeit, 11. Campei Michele

Alenadù La Val: Klaus Gräber

Proscima partida: La Val süga duman sabeda dales 16:00 a Pretau cuntra la scuadra de ciasa

Atri resultac:

Altherren (La Val) = Perca – La Val  0-1

U-15 (La Val - Mareo) = La Val – Pro Team 3-6

Giovanissimi (Mareo/La Val) = Mareo – Barbian/Villanders  1-11

U-12 (La Val) = La Val  - Obopuschtra Löwen 2-2

U-11 (La Val) = La Val – Perca  2-1