7ª partida de campionat - Sterzing
Le Sterzing mëss se asuié la devënta cuntra le La Val, che ti tëgn bót cina püc menüc ala fin dla partida.
Üna dles scuadres favorites a fa le salt de categoria te chësta sajun te terza categoria é dessigü le Sterzing, che s’á scrit ite te nosc rode l’ann denant. Ruvé adalerch a La Val a sughé se stënta ince i plö stersc y chësc an odü ince la sabeda da denant. I ladins tëgn bót y süga ince en bel jüch, la fortüna ne é indere nia da süa pert y mëss insciö ti de para i trëi punc.
Al é i ghesc che deura la partida cun en gran druch, cis sön les ripartënzes esi bindebo prigorusc. I sogadus ladins deperpo fala passaji sigüsc y mëss insciö ti salté do ai aversars. Prigorusc esi spo sta al 20^ olache le capitan dl Sterzing röia da na pert ite te area y tira a bót sigü cuntra l’incrujada dla porta ladina. Dal’atra pert éle al 28^ Philip che driblëia la defenjiun y pro ince a tra cuntra porta, le sterch portier indere para cun segurté.
La secunda pert é plö interessanta y sëgn é le La Val che á só bun momënt y süga scialdi te mezciamp aversar. Al é indere i ghesc che pënsa a desgropé le resultat y jí in vantaje al 59^. L’atacant Hofer se fej trú cuntra le limit dl’area y tira sëch bass dlungia le pé de porta ite. Duscia frëida por i padruns de ciasa, la reaziun é indere buna y al 65^ röia Michele da na pert jö, dan porta prol la trata al jora che ti röia de püch sura porta fora. Al 78^ röia l’aziun ladina te area, püch dan concretisé le gol vëgn l’atacant contrasté y toma a tera. L’arbiter conzed le önescmetri che vëgn trasformé a bót sigü da Stefan. Insciö é la partida ala pêr y indo daurida, cun ma plö diesc menüc ala fin. Al ne passa tröp tëmp che na crossada te area ladina é fatala por la formaziun. Le defensur pro da tra demez al jore la palé alt mo chësc rimbalzëia avisa sön só brac. La mascima punizun é insciö inevitabla y chësta vëgn ince trasformada dal capitan Dolliana.
I püc menüc ne basta nia a avalié le resultat lascian i sogadus da La Val sënza punc y cun na saú antia tla bocia.
La Val – Sterzing 1-2
Formaziun La Val: 1. Sepl Kantioler, 2. Natan Colletta (dal 75^ Maximilian De Lorenzo), 3. Simon Campei, 4. Martin Menazzi Marcelo, 5. Paolo Vallazza, 6. Christian Terza - capitan, 7. Felix Nagler (al 65^ Bruno Zanoguera), 7. Felix Nagler, 8. Stefan Sottara, 9. Philip Moling (dal 60^ Martin Ploner), 10. Franz Tolpeit, 11. Campei Michele
Alenadù La Val: Klaus Gräber
Proscima partida: La Val süga duman sabeda dales 15:30 a Valdaora cuntra la scuadra de ciasa
Atri resultac:
U-15 (La Val - Mareo) = Alta Badia – La Val 0-2
Giovanissimi (Mareo/La Val) = Leifers – Mareo 8-1
U-12 (La Val) = Steinhaus - La Val 3-1
U-11 (La Val) = Rina/San Martin – La Val 1-1
