5ª partida de campionat - Pretau

Prestaziun debla cuntra le Pretau, La Val “mëss” ma s’acontenté cun un en punt sú.

Por La Val é les partides cuntra i aversars plö debli sön la cherta entres les plö riés. Insciö ince chëra dl ultim fin dl’edema, olache le Pretau é ruvé adalerch sön le ciamp Plans por combat y porté a ciasa na devënta. Ince sce i ladins va do püc menüc in vantaje se refesc i aversars tl secundo tëmp y avaliëia ciamó le resultat.

Bele tl 2^ menüt ciafa Michele en palé sorví dal mezciamp, röia sú dan porta y tira dlungia ia. Al 8^ él spo Felix che sciampa a man dërta jö y crossëia bass amez por Phlip che á ma plö bria de apogé te rëi por le vantaje. Da atira capësciun che la partida gnará interessanta, tl ciamp él tensciun y l’arbiter mët tosc man da partí fora chertes gheles por de vigni sort de pici fai. Le Pretau é ince prigorus cun valgünes trates dal limit cuntra porta ladina, chiló é Giovanni che fej bun só laur. Al 30^ pëia ia deplö aziuns indolater cuntra la defenjiun aversara y intres sciüra l’arbiter por posiziuns de forajüch inesistëntes. Gran ocajiuns da gol ne éle nia plö da alzé fora dan la fin dl pröm tëmp.

Tla secunda pert mët man l’aversar de fa druch cun na formaziun plö ofensif y da atira se stënta i padruns de ciasa de fa pié ia l’aziun. Impormó al 55^ röia Franz dan porta, pro de superé le portier mo abina mal le palé de ciamp y tira dlungia ia. Al 72^ vëgn l’atacant aversar ataché mal y toma ia por tera, l’arbiter mostra insciö atira sön le punt di önescmetri y ti conzed l’ocajiun de avalié le resultat ai aversars che vëgn ince concretisada. Le scenar se scialda tres deplö y al pëia ia en gran sciosciüre te ciamp. Le sciür dl mandl fosch é da aldí sön vigni pic contrast nia prigorus y insciö vëgn le jüch tresfora archité. Da derzé fora valch él ma plö püc menüc de tëmp y chisc ne basta nia por le gol dl vantaje. Insciö mëss les döes formaziuns se partí i punc. Chësc iade al mancé la orenté de orëi davagné la partida, chëra che i ladins spera de porté al derby da in duman cuntra i maroi.

La Val – Pretau 1-1

Formaziun La Val: 1. Giovanni Erlacher, 2. Simon Campei, 3. Egon Frenes, 4. Christian Terza - capitan, 5. Paolo Vallazza, 6. Bruno Zanoguera (dal 65^ Natan Colletta), 7. Felix Nagler, 8. Stefan Sottara, 9. Franz Tolpeit, 10. Michele Campei, 11. Philip Moling (dal 46^ Alex Miribung)

Gol por La Val: Philip Moling al 8^

Proscima partida: Duman a Al Plan dales 17:00 cuntra le Mareo B

Atri resultac:

Altherren (La Val) : La Val – Milland  3-0

U-15 (La Val-Mareo) : La Val – Val Badia  3-2

U-11 (La Val) = Vahrn – La Val 3-0