US LA VAL
 
 
     
 

Veronika: 15 agn dedicà al palê

Stampa PDF

veronikaVeronika Moling, che é stada öna dles mius śogadësses de palê dl SSV Porsenù por set agn é passada chësc ann al CF Südtirol Damen, na scuadra de serie A2. Por Veronika é chësc n som che se realisëia. Veronika vëgn cunscidrada öna dles śogadësses plü stersces de Südtirol y do Iris Steinmayr él secunda jona badiota che po se vistì la malia dl CF Südtirol Damen. Te na intervista nes cunta Veronika de süa vita da śogadëssa de palê.

Can aste pa metü man da śoghé al palê?

I à metü man da śoghé al palê cun i mituns da La Val canche i â ot agn. I à śoghé a La Val por cin'agn alalungia. Da mëte man, canche mi geniturs â salpü che i urô śoghé al palê, spo ne êi bëgn nia massa cuntënć, mo iö ne me à nia lascè demotivé. Śëgn che i sun rovada tan inant à mia familia dër ligrëza.

Ći ó pa dì por te le sport dal palê?

Le palê é mia vita. I ne sà nia ći che i fajess śëgn sce i ne fóss nia jüda inant sön chësta strada. I ne sun nia buna da me imaginé mia vita zënza.

Te ći scuadres aste pa śoghé?

Dô avëi lascè la scuadra di mituns, ài śoghé por trëi agn cun la scuadra dles ëres dla Val Badia. Canche i sun rovada a Porsenù a scora ai metü man da soghé pro la scuadra feminila SSV Porsenù olache i  à śoghé por set agn. Chësc é le 15ejimo ann che i śoghi al palê y chësc ann ai inće cambié scuadra: i sun passada dal SSV Porsenù al CF Südtirol  Damen (conesciü inće sciöche Vintl).

Ćiodì este pa passada dal SSV Porsenù al CF Südtirol Damen?

Le CF Südtirol Damen, dô cater agn te serie B, à davagné l'ann passè le campionat y é insciö rové te serie A2. I à tres albü la ligrëza da rové inant, da rové plü alalt. De jenà âi iö bele dit de sce al SSV Porsenù. Canche l'aministradù dl CF Südtirol Damen me â telefonè por me damanè da passè al'atra scuadra, spo ne savoi atira nia ći fà. I à ponsé do dî, al é stè na dezijiun ria da tó. Mi alenadù (dl SSV Porsenù ndr) me à daidé dër tröp te chël momënt. La poscibilité da rové te na scuadra de serie A2 ne an nia vigne dé. I à spo damanè ai alenadusc dl CF Südtirol Damen sce al ê la poscibilité, te na scuadra de n livel tan alt, da podëi inće jì deperpo a scora. Ëi m'à dit de sce y iö dit de sce ad ëi.

Podéss chësta tüa pasciun forsc inće deventè na profesciun?

Chël é ri da dì, deache le palê dles ëres ne é baldi nia ćiamò dër conesciü. Chilò da nos, dantadöt tla Val Badia, él bëgn ri, che al pois deventè na profesciun. Mo sce i sun buna da jì inant sön chësta strada podéssel bëgn inće deventè n bel dé na profesciun.

Te savessel bel da śoghé al palê da profescionista?

Al me savess bëgn bel, mo al n'é sigü nia na profesciun che an po fà por düta la vita.

Ći laur oresseste pa fa?

I oress deventè assistënta dles porsones dejables.

Ći scores aste pa fat?

I à frecuentè la scora alta por le sozial a Porsenù. Dedô essi orü jì inant a Desproch tl'université dl sport, mo baldi ne ai nia passè l'ejam de amisciun: a ê inće na proa da nodè y chël ne é nia n sport te chël che i sun dër buna. Tratan l'invern ài spo laorè sciöche maestra dai schi; n pez ài inće fat la molera. Śëgn sunsi tla scora provinziala por les profesciuns soziales "Hannah Arendt" a Balsan, che i stlujarà jö de merz.

Ći sensaziun aste pa porvè da cambié scuadra? Te manćera la scuadra dl SSV Porsenù?

La scuadra dl SSV Porsenù me manćia dër, deache ëra é stada mia pröma scuadra. I à vit tröpes esperiënzes cun chësta scuadra y inće cun les śogadësses, che me é dagnëra stades dlungia. Al me manćia inće dër tröp mi alenadù, che me à tres daidé y che me à dè la forza da jì inant. I và gonot a ćiarè pro che mies ex colleghes śoga, deache inće mia só śoga lapro. Mo i sun impò sigüda da avëi tut la dërta dezijun.

Ći sensaziun proeste pa canche te fejes n goal?

Fà n goal ó dì fà n bëgn ala scuadra. Y spo él inće dër na gran ligrëza podëi odëi che i sun buna da śoghé al palê.

Aste val'portafortüna?

Mi portafortüna é le numer set, scebëgn che i ne à mai albü na malia cun chësc numer. Dan vigne partita pënsi iö al numer set, n numer che me à bele plü gonot portè fortüna.

Da ći scuadra tëgneste pa?

I tignî dala juventus. Śëgn tëgni ma plü ala scuadra te chëra che i śoghi.

Aste tö n idol?

N idol ne ai mai albü, deache sce an à n idol pron dagnëra da ti fà dô. An crësce y impara trö' de plü sce an crëi te sè instësc.

Ći te aspeteste pa da chësta pröma sajun pro le CF Südtirol Damen?

Le campionat da chësc ann sarà dër ri, porchël messarai dër me impegné. Sce la scuadra tëgn adöm spo vara sigü da arjunje n bun resultat. La cossa che i speri deplü é che i ne me feji nia mè.

Co ćiara pa fora n dé tipich de na śogadëssa de palê?

Tratan les edemes de preparaziun messunse se alenè danmisdé y domisdé. Da sëra podunse se relassè te idromassaje o te sauna y chël é le plü bel. Scenò é i alenamënć trëi iadi al'edema y le fin dl'edema él na partida. Le palê me tol dër tröp tëmp, mo i à ligrëza y porchël le feji ion.

Te as dit che tüa só śoga pro la scuadra feminila dl SSV Porsenù, pro chëra che tö as inće śoghé set agn. Aste bele śoghé n iade cuntra ëra?

Tratan le tëmp de preparaziun a Sterzing él stè n'amichevole cuntra le SSV Porsenù. Iö ne à nia podü śoghé, deache i me à fat me dan da n valgügn mëisc. Te döes edemes saràl le partida de Copa cuntra le Porsenú y dailò messarai plü sigü śoghé cuntra mia só.

Ći efet te fej pa śoghé cuntra tüa só?

Al é n vantaje, deache i sà sciöche ëra śoga. Ëra śoga sön la pert dërta y iö sön la pert ciampa, porchël se gnunse adincuntra. Al sarà sigü na bela batalia.

Él n problem por te avëi püch tëmp lëde?

Nou, dessigü nia. Le palê é düt por me y i ne podess mai renunzié a śoghé.

Él n problem por te ester gonot demez da ćiasa?

Iö a ćiasa sunsi püch. Al é bel n grüm de agn che i viri demez. I và ion bindicé a ćiasa por odëi sciöche ara ti và a mia mama, a mi pere y a mi fredesc, mo i ne foss sigü mai buna da vir chilò. Le palê é mia vita y tla Val Badia é les poscibilites da śoghé dër püces, porchël me pënsi che i ne gnarà nia zoruch a ćiasa canche i arà rové da jì a scora.

Ćiun é pa to som plü gran?

Mi plü som gran é chël da rové a śoghé tla scuadra nazionala. Dan da dui agn me ai bele damanè da fà pert dla nazionala under 21, mo i ê bele massa vedla. Plü co intant ne pënsi nia ai soms, deache i ne ó nia me fà ilujiuns, scenò dedô me stai mal. I la lasci gnì sciöche ëra vëgn.

Ćiun é pa tü obietifs por le dagnì?

Iö ó ciafè n post de laur olache i me stà saurì y śoghé inant al palê. Bel me savessel inće da deventè alenadëssa di mituns. I à bele alenè por n cürt tëmp i mituns sot ai 10 agn chilò a La Val y al me à salpü dër bel. (Katia Pizzinini/La Usc di Ladins 2009)

Luglio_2009_100-1

(fonte: La Usc di Ladins)

 

Sponsoren

logo_M2_Srl raiffeisen miribung seve decor auto_vallazza Frenes_Patrick Plana_Ladina

Login



      Uniun Sport Amatoriala La Val, San Senese 1, I-39030 La Val
      info@uslaval.it - C.F. 81009280215 - ©