US LA VAL
 
 
     
 

La Val te FINALA de Copa Provinzia

Stampa PDF

copaIn mercui ai 11 de Má él gnü sughé la 2° partida de Semifinale de Copa Provinzia. La partida é gnüda sugada te ćiasa, cuntra la scuadra da Wiesen, che La Val á bel incunté dui iadi te chësta sajun (üna pordüda y üna davagnada a tavolino). Gnü sughé él dales 20:00 da sera, na partida ria sön la cherta. 

 

Dô la gran prestaziun dla prüma partida cuntra Oberland (cun la lungia trasferta söl Reschen, davagnada 2 a 1) é stá bugn La Val da bater ince Wiesen cun en bel 3 a 1. Insciö se porta La Val sön 6 punti y ne ti lascia degüna oportunité plü ales atres dös scuadres da passè le turno. Cun chësta vitoria, scri U.S. La Val storia tl calcio dla Val Badia, sciöche prüma scuadra dla Val Badia che röia te na finala de Copa Provinzia. Proscimo mercui ai 18/05 saral ćiamò l' ritorno tra Plaus y Kurtinig (andata: 4 a 1 por Plaus). Plaus é terzultimi te campionat, porchël á La Val na gran oportunité da davagné la Copa, almanco sön la cherta. Sce La Val é bugn da davagné la Copa, spo röi ti spareggi por jí sö te 2. categoria. I spareggi vëgn fać cun les 3 secundes scuadres ti atri gironi. Na partida sëcia che vel la cualificaziun por la 2. categoria. Al pó ester che ince na terza scuadra vai sö tles 4, an mëss udëi sciöche ara vá cun i campionać plü alć, dailo él ćiamò les dös scuadres che á pordü i spareggi che po fa na partida y chiche davagna dailó vá ince sö.

La partida cuntra Wiesen:

Bel da mëter man savô La Val che Wiesen foss gnüs cun en gran druch, ince por via che ai á pordü tl ritorno de campionat a tavolino. Mo La Val ne se á nia lascè druché zoruch, mo ai á vëi tut la partida tles mans. Le prüm gol ti gareta bel dô da 5 menüć a La Val cun Rubatscher Romeo. Na bela pala metüda ite da Daniel Frenes röia sön le rigore, Romeo tira de prüma y le pal röia sön le palo cürt. Le bel tiro bas y angolè ne ti lascia degüna oportunité al portier da Wiesen. Püch dedô él le capitano Alex Alton che porta süa scuadra sön le 2 a 0. En bel angolo batü da Frenes Daniel röia sön le cinch, Alex stacchëia y mët le pal sön le palo lunch, en bel gol de testa che vel le 2 a 0. La Val ó stlü jö la partida, mo le terzo gol ne vá nia plü ite. Daniel Frenes röia  ince da sú cuntra le portier sön en bel passaggio filtrante de Sottara Freddy. Mo le "tirocross" röia dlungia la porta ia. En per de tiri fora dl area de Stefan y Freddy röia ince depüch sura porta fora. En per de pales inatives ne vëgn gnanca sfrutades da La Val, deplü iadi mancel en sogadú sön le palo lunch. Mo La Val fesc la partida ince sce Wiesen vëgn tres plü stersc, suradüt un de sü atacanć che á ince sughé te Oberliga vëgn der prigorus. Al fesc dui tiri che va depüch dlungia le palo ia. Mo dan che le prüm tëmp se stlüsc jö ti garetel al Wiesen impó ćiamò le 2 a 1. Na pala che resta tl area, sön en angolo, ne vëgn nia trata dmez lunć assa. Spo röia en sogadú dl Wiesen sön la pala y tira te porta. Le palo röia sot le giames fora de dui defensurs y spo te porta, Merch ne á degüna chance da le parè, deache al é ince gnü stupè. Le prüm tëmp se stlüsc jö sön le 2 a 1.

 

Tl secundo tëmp é Wiesen plü prigorusc. Bel da mëter man feji na traversa. Sön na mischia indô te area vëgnel fat en tiro sön la traversa, Ploner Werner é spo ćiamó bun da tra dmez la pala. La Val mëss porvè da fá indo só jüch, scno vëgn Wiesen massa stersc. Chësc ti gareta bun a La Val. Daniel Frenes é bun deplü iadi da saltè le defensur y se portè te area o fá de bi crosc ite a mez, mo le gol ne vëgn nia. Na gran parada sön en gran tiro fora dl area ti gareta a Merch, che é bun da juré sö tl incrocio y devié la pala sön le palo y spo te angolo. Mo sön le 75° ti garetel impó ćiamò a La Val le 3 a 1 che stlüsc jö la partida. Sön en bel contropiede, inesché da Sottara Stefan cun en passaggio filtrante, röia Daniel dan area, le portier vëgn fora, spo Daniel passa ite a mez ualche al é Rubatscher Florian che pó ma plü apogé te porta. 

 

La partida se stlüsc jö sön le 3 a 1 por La Val. Da sotolineé él ince la gran prestaziun dla difesa, che á fat na gran partida, deache le Wiesen é cunesciü cun sü bugn y gran atacanć che süga dant.  

 

 

La formaziun titolara dla partida:

 

copalavalvswiesen 

 

 

 

 

 

 

In cürt ćiamò les sostituziuns dla partida:

 

al 70° Elenabaumer Alex por Sottara Freddy

 

Al 80° Castlunger Marco por Rubatscher Florian

 

 

Sponsoren

logo_M2_Srl raiffeisen miribung seve decor auto_vallazza Frenes_Patrick Plana_Ladina

Login



      Uniun Sport Amatoriala La Val, San Senese 1, I-39030 La Val
      info@uslaval.it - C.F. 81009280215 - ©