US LA VAL
 
 
     
 

U.S. La Val scri storia: CAMPIUNS DLA PROVINZIA 2011

Stampa PDF

_MG_91541In dumënia ai 05 de Jügn á la scuadra da La Val scrit storia sciöche prüma scuadra ladina da tres, che davagna la finala de Copa Provinzia. La partida é stada en "crimi" sciöche an disc tl calcio. Do en svantaje de 2 a 0, é buna la scuadra da La Val da recuperé, davagnan 3 a 2 al 122° menüt.

 

En gran spirit da combatimënt de düta la scuadra y di tröć tifosi gnüs a ćiarè á portè les beles copes tl paîsc da La Val. La Val á mesü combater cun en grüm de partides, superan de bugn aversars sciöche Wiesen y Oberland, por rové tla finala de copa. Ala fin al paié la möia!!!!! L travert (ruvé ti prüms 5 tl campionat) che le comité dl U.S. La Val á metü por la sajun 2010/2011 é gnü superé de cotan. Cun le bun 4° post rajunt te campionat y CAMPIUNS DLA PROVINCIA, stlüsc jö La Val na buniscima sajun 2010/2011.

La partida de finala cuntra Plaus á metü man dër mal por La Val. Bel dô püć menüć se ciafa La Val en gol, sön en angolo direto te porta. Le pal é ruvé tl incrocio lunch superan düta l'area, colpa magari é zigü ince stè en pü le vënt te chel mumënt, che á devié le pal tl incrocio. La Val ne é nia buna da fá jüch o aziuns prigoroses, an vëiga che i sogadusc da Plaus é na marcia en plü. Ai vëgn ite plü dürz ti contrasti y La Val se tëm en pü. A mesa le prüm tëmp ti garetel ćiamò le secundo gol a Plaus. Sön na bela aziun é en centrocampist bun da fá en bel passaggio filtrante a en so atacant, che é bun da se infilé danter la difesa da La Val. Cun en tiro plan mo bel angolè él bun da superé Merch, le pal se infilëia dlungia le palo lunch ite. Chësc gol ti taia les giames ai soagadusc da La Val. Le prüm tëmp se stlüsc jö sön le 2 a 0 por Plaus. La Val mina che la partida é ruvada, mo danter la palsa tl prüm y secundo tëmp é le capitano Alex Alton y le manager Klaus Rubatscher che ti dá na scassada a düta la scuadra, cun parores che á fat efet.

La Val vá ite te campo cun en atra convinziun y mostra che ai crëi ćiamò tla vitoria. (Tratan él ince ruvé sön le campo l'alenatur Scalzini Marco, che ne á nia sciafié da gní por en impëgn personal). Ai é bugn da fá tres plü druch cuntra i aversars y insciö garetel a mesa le secundo tëmp le 2 a 1 por La Val. Sön na bela poniziun de Sottara Werner röia Ploner Werner sön le pal. Cun en bel colp de cé el bun da mëter le pal dlungia le palo ite. Chësc gol ti da indô speranzes a La Val. Ai é bugn da sughé cun la pala basa cambian tröp le jüch da üna na fascia ia dal atra. Na bela poniziun de Sottara Freddy röia püch dlungia l'incrocio ia. La Val sënt che al vëgn le pareggio a mumënć. Tl recupero dla partida ti garetel spo le 2 a 2 a La Val, che porta insciö les dös scuadres ai tëmps suplementars. Rubatscher Romeo é bun da superé en defensur  sön la fascia, en gran tiro röia sön la traversa y spo le pal röia a mesa l'area. Alex Elzenbaumer é bun da tó al volo le pal y cun na gran cordinaziun fejel spo le 2 a 2. En gol che scinca i tëmps suplementars.

I cambi y la tattica de Micky Frenes y Klaus Rubatscher (cina che le alenadú é ruvé te campo) á porté sü früć!!!

Ti dui tëmps suplementars él püch jüch, an udô che düć i sogadusc ê dër stanć. Florian Rubatscher éss ćiamò albü la poscibilité da stlü jö la partida tl prüm tëmp suplementar. Al röia da sú cuntra le portiers, só bel palonetto röia de püch dlungia le palo ia. Mo al 122° mëtl man la festa dl U.S. La Val. Na poniziun röia sön le portier, al ne é nia bun da se tigní le pal tles mans, Franzi Verginer é le plü scvelto da ruvé sön le pal y é bun da tra la pala te porta. Chësc gol ti scinca la copa a La Val y l'artbiter sciüra la fin dla partida.

Dedô él ma plü gnü fat festa por la vitoria!!!!!!!!

La formaziun titolara dla partida:

finalevsplaus

In cürt ćiamò les sostituziuns dla partida:

al 60° Alex Elzenbaumer por Castlunger Marco

al 75° Sottara Stefan por Nagler Max

al 80° Tavella Thomas por Werner Ploner

Por ćiarè ales foto dla paritda y dla festa drüca: FOTO

 

Sponsoren

logo_M2_Srl posta raika1.plata seve decor1.plata Logo_moritz_01 patrick1.plata helmut1.plata ploner1.plata

Login



      Uniun Sport Amatoriala La Val, San Senese 1, I-39030 La Val
      info@uslaval.it - C.F. 81009280215 - ©