US LA VAL
 
 
     
 

5° partida camp. 2011/2012 por La Val

Stampa PDF

3.cat2011_2012In dumënia ai 02 de Otober él gnü sughé la cuinta partida dl campionat 2011/2012 de  3° categoria por La Val. La partida é gnüda sugada fora de ćiasa cuntra la scuadra da Mühlwald. En campo cunesciü, ulache al é ma na bataglia. La Val ne porta gnanca chësc turno trëi punć a ćiasa, insciö vá inant la burta serie de sconfites, cun la terza partida zënza punć.

 

Tl prüm tëmp á La Val porvè da sughé cun en ater modulo 4-2-3-1. Cun i dui centrocampisć Ivan y Freddy che restâ dan la difesa y spo les fasces che drucâ sö deplü a sostëgn dl atacant sú Florian. Mo bel ti prüms menüć an udü che La Val se stentâ en püch da sughé bun la pala. Ince magari por via dl burt campo da erba cun en grüm de büsc che fajô insciö plü rî le control dla pala. Mo la partida é impó ala parai da mëter man.

Florian é le prüm che devënta prigorus cun na bela poniziun, che atoca bel avisa la traversa y vá sura fora. Deplü iadi röia i sogadusc tl area dl Mühlwald mo spo mancel l'ultima fredëza da tra te porta o passè ite a mez. I aversarsc prô scialdi cun lanci lunć ai atacanć, da mëter in dificulté i difensursc da La Val. Mo ti contrasti de cé á prësc tres La Val la miú.

Mo spo mëtl man le gran cajin dl arbiter dër jonn (che é bel conesciü te chësc campionat, ulache al á sciuré fora en grüm de sogadusc cun amoniziuns y fischian dër mal). Al vëgn fischié en rigore cuntra La Val. Sön en calcio de puniziun röia la pala al portier da La Val, Sepl vëgn fora mo dui sogadusc dl Mühlwald le blochëia (foss stè netto fallo sön le portier). En ater atacant dl Mühlwald se lascia jí te na mischia jö portera. L'arbiter fischia le rigore, "inesistente". Al vëgn damanè da pert dl La Val chiche á fat le fallo al aribiter. Mo al disc che al ne sa nia, mo rigore al impó fischié. Insciö se porta le Mühlwald sön le 1 a 0.

An cunësc bel avisa che la partida ti sciampa fora dles man al arbiter y insciö mëtl man da partí fora gheles sön falli che ne foss gnanca. Al 35° fischiel cinamai la fin dl prüm tëmp y pëia ite ti spogliatoi. Mo spo se rëndl impó cunt che ara vá ćiamò inant 10 menüć. An pó sceco dí che en te arbiter ne á mai ćiamò abiné La Val, veramënter da sun sciampè. Dan che le prüm tëmp se ruvas tirel ćiamó fora na secunda ghela sön na cossa che degügn sá y sciüra fora en sogadú dl Mühlwald por soma de amoniziuns.

Sön na bela testa de disimpegno de Alex Alton röia Florian da sú cuntra le portier, le difensur é ćiamò bun da le scbilancè en püch y insciö ne atoca nia cis bun Florian la pala, ince magari deache al ê sön le dërt. Le prüm tëmp se stlüsc jö sön le 1 a 0. Insce sce l'arbiter á fat süa gran pert, La Val mëss ince udëi che ai ne á nia fat assá por jí in vantaje.

Tl secundo tëmp prô La Val da jí zoruch sön le 4-4-2. Al vëgn sughé 10 menüć y le Mühlwald fesc le 2 a 0. Cun na gran poniziun de potënza püch defora dal'area. Sepl röia sön le pal mo al ne é nia bun dala devié fora dl düt y la pala röia bel avisa dlungia l'palo ite. Mo La Val crëi impó ćiamò, almanco sön le pareggio. Ai mët man da sughé en pü cun la pala basa y jö portera. Mo le gol gareta impò sön na puniziun. Le pal röia a Alex Alton, che cun en colp de testa é bun da fá gol. La poniziun é gnüda batüda scnela, insciö é stada la difesa dl Mühlwald nia preparada. Püch dedô ti garetel le pareggio a La Val. Dô en bel dribbling de Florian, vëgnel mazè jö te area, rigore netiscimo. Florian se prejentëia sön i 11 metri y fesc gol. La Val á indô la partida tles mans. Le arbiter mët man da ne capí indô nia, al fischia adüm en pössl mat, ince chi da Mühlwald ne capësc gonot nia ciche al é o por cí che al fischia. Depü fuorigiochi inejistenti vëgn fischiá a La Val, ulache an éss podü jí da susc cuntra le portier. Freddy pro ince da fá gol, sön en bel tacco de Romeo ciafel la pala fora dl'area, al é bun cun en paleggio da se tra inant, mo le tiro al volo röia depüch dlungia le palo ia. Deplü sogadusc mët man da sun ciantè sö un cun l'ater, insciö vëiga Ivan Tschaffert ince la secunda ghela y vëgn sciuré fora.

Le Mühlwald ciafa indô insciö coraje, dô avëi sughé düt le secundo tëmp in 10. Ala fin dla partida ti garetel insciö le 3 a 2, sön ne mischia te area vëgnel sburlé dmez en difensur, le arbiter ne vëiga nia y le atacant tira te porta dala picera area.

La partida se stlüsc jö sön le 3 a 2 por Mühlwald.

Na partida influenzada zigü dal arbiter che á fischié adüm en patüć mat, mai udü val de te.

 

 


Cun chisc trëi punć lasciá sön trú toma zoruch La Val al 9° post te tlassifica.

 

 

La formaziun titolara: Kantioler Sepl, Tavella Thomas, Alton Alex, Tavella Jordan, Sottara Werner, Frenes Michael, Tschaffert Ivan, Sottara Freddy, Rubatscher Romeo, Verginer Frnazi y Rubatscher Florian.

 

 

 

Sostituziuns:  

 

Moling David por Verginer Franzi

 

Elzenbaumer Alex por Frenes Michael

 

La proscima partida saral le derby da Rît, speran che al se prejentëies en bun arbiter y che al sides na partida plü bela da ciarè prô por i tifosi.


 

 

Por udëi i atri resultać drüca (ince di atri campionać ulache sogadusc da La Val süga para) drüca: resultać
 

Sponsoren

logo_M2_Srl raiffeisen miribung seve decor auto_vallazza Frenes_Patrick Plana_Ladina

Login



      Uniun Sport Amatoriala La Val, San Senese 1, I-39030 La Val
      info@uslaval.it - C.F. 81009280215 - ©