US LA VAL
 
 
     
 

Derby da Rît campionat 2012/13

Stampa PDF

3.cat_2012_2013In dumënia ai 30 de Setëmber él gnü sughé le prüm Derby da Rît dl campionat 2012/2013 de  3° categoria. La partida é gnüda sugada te ćiasa a La Val. 2 agn á La Val três davagné le Derby, sides te ćiasa che fora de ćiasa. Mo chësc iad mëss La Val se acuntentè cun en pareggio.

Le derby é la partida plü sintida tl campionat dla scuadra da La Val. Bel dan la partida ê düć i sogadusc bel conzentrá te spogliatoio, ponsan dô ciche al ti é gnü dit dal alenadú da fá te campo. Insciö á metü man dër bun le derby por La Val. Bel ti prüms menüć é Florian che porta in vantaggio La Val. Sön en bel lancio dala fascia jö de Werner, röia la pala sura le difensur fora. Florian ti vá dlungia ia in velozité. Al se porta contra la porta dl Mareo y cun en gran tiro de sinistro sön le palo lunch ne ti lascel degüna chance al portier. Che resta ma plü chit. La pala röia bel avisa dlungia le palo lunch ite. En bel gol de Florian che ti dá ince gran segurëza a düć i sogadusc da La Val.

 

La Val á la partida tles mans da mët man. Ince ite a mez esi bugn da recuperé en grüm de pales, ince de cé. La Val prô da sughé cun la pala jö portera, deache cun les pales altes é le Mareo avantagé, deache düć i defensurs dl Mareo é bimbo de gragn y se fesc insciö plü saurí. Le Mareo é ma prigorus sön les pales inatives. Prësc vigni aziun pëia ia da lanci dl portier dl Mareo cina sö dan l'area da La Val. Düć chisc lanci lunć á zigü contribuí a en burt derby, ulache le jüch é gnü metü en pü sön la pert.

Insciö nasc ince le 1 a 1 dl Mareo. Sön la fascia röiel ite sön le secundo palo na bela poniziun de Kaneider Denis, Werner che ó trá demez la pala vëgn sburlé da en atacant, mo le arbiter che ê dlungia ne á nia fischié le fallo. Insciö röiel cun le scnëdl sön le pal y ne é nia bun da trá demez bel la pala. La Pala resta tl cinch y en sogadú dl Mareo é plü asvelto da apogé ite la pala te porta.

Le prüm tëmp se stllüsc jö sön le 1 a 1.

 

Tl secundo tëmp é düć che se aspeta en jüch plü bel, mo al suzed bel avisa le contrario. An vëiga plü degun jüch. La pala vëgn ma plü splundrada da porta a porta. I sogadusc vëgn ince três plü nervösc. Le arbiter ne á gnanca plü la partida tles mans y fischia scialdi düt ma plü por le Mareo. A mesa le secundo tëmp é en atacant dl Mareo che röia cuntra porta sú, mo al ne é nia bun da trá bel la pala, le esterno röia dlungia porta ia, na gran chance por le Mareo, che ne vëgn nia sfrutada. 20 menüć dala fin el spo en defensur dl Mareo che toma jö portera, dô che al se a ciafè na gomitada tl piet. Bunamënter é stá trami dui i sogadusc de colpa, deache le defensur ê bel tratan düta la partida cun ginochiades tles giames y tl spiné dl atacant. Insciö á pordü la paziënza le sogadú da La Val. Le arbiter ne á nia udü le fallo de raziun. Al á dè ca na gran cajin, düć che é saltá ite te campo, mo por fortüna ne él nia stè na rissa y düć se á indô calmè ia.

 

15 menüć dan la fin dla partida vëgnel ćiamò espulso Ivan, por soma de amoniziuns.

 


La partida se stlüsc jö sön le 1 a 1. Cun chësc punt davagné resta La Val al 8° post te tlassifica. Proscima partida é in sabda ai 06.10.2012 fora de ćiasa cuntra la scuadra da Raas.

 

La formaziun titolara: Kantioler Sepl, Valentin Elmar, Alton Alex, Vallazza Paolo, Sottara Werner, Frenes Micky, Sottara Freddy, Sottara Stefan, Tschaffert Ivan, Miribung Alexander y Rubatscher Florian.

 

 

Sostituziuns:

Castlunger Marco por Valentin Elmar

Miribung Adrian por Miribung Alexander

Tavella Thomas por Frenes Micky 

 

 

Por udëi i atri resultać drüca (ince di atri campionać ulache sogadusc da La Val süga para) drüca: resultać

 

Sponsoren

logo_M2_Srl posta raika1.plata seve decor1.plata Logo_moritz_01 patrick1.plata helmut1.plata ploner1.plata

Login



      Uniun Sport Amatoriala La Val, San Senese 1, I-39030 La Val
      info@uslaval.it - C.F. 81009280215 - ©