In dumënia ai 10.03.2013 él gnü organisé dal Uniun dl Sport Amatoriala da La Val la secunda gara de schi alpinism y da jí a pé in memorial de Alexander Ellecosta.
Ince sce le tëmp ne é nia propi stè massa bel el garatè na bela manifestaziun. Le dé á metü man dales 8.00 canche i concurënć á podü jí dal Bar Sport a se tó i numeri por la gara. Dales 10 á spo metü man la gara, cun la partenza ite a Spëscia. I atleć plü svelti á atira piá ia cun en gran druch, bel dô da na mesora röia le prüm al travert. I atri che urô sla tó en pü plü cun la calma é ruvá sö dô na picera ora. Le travêrt é indô sté dala ütia "Ranch da Andrè".
Dales 12.00 él gnü tigní spo la Santa Mëssa da Siur Franz Sottara, ulache an á ince aldí de beles supliches, lites dant da deplü jogn. Dô la mëssa, tratan che la marëna gnô sön mësa él stè Viktor da Al Plan che se á sunè de beles cianties. Dô la marëna él spo gnü premié dal presidënt dl Uniun Alton Alex, Ellecosta Toni y dal raprejentant dla Cassa Raiffeisen Clara Erwin i partezipanć ala gara. Ala fin ti él ćiamò gnü surandè na picera recordanza ala familia Ellecosta.
En gran giulan ti vá a düć chiche á daidè organisé chësta bela iniziativa, che gnará zigü tignida inant, dô la bela esperiënza fata in dumënia.
Por udëi la tlassifica drüca: Tlassifica_2_Memorial_Alexander_Ellecosta.pdf