US LA VAL
 
 
     
 

Ritorno 1º turno de Copa Provinzia 2013/2014

Stampa PDF


foto_scuadra

In mercui ai 11 de setëmber él gnü sughé le ritorno dl 1° turno dla Copa Provinzia 2013/2014 de  3° categoria por La Val. La partida é indô gnüda sugada cuntra la scuadra da Aicha, fora de ćiasa. Dô le pareggio dl 2 a 2 dl’andata, é La Val che mëss fa n bun resultat por passè inant.

Sön le pice ćiamp dl’ Aicha an pudü udëi cina ala fin na partida dër combatüda. I tëmps regolamentai se röia sön le 2 a 2 y purchël ésun passà a trà i önescmetri. Merch gran protagonist dla serata, é bun de nun parè 2 y contribuësc insciö ala devënta.

Bel da mëter man pon udëi la scuadra da La Val conzentrada y determinada a purtè a ćiasa la devënta. Deache le ćiamp è bindebo strënt él la scuadra che süga cun n modulo plö offensiv, cun 3 atacanć.

Cun de beles combinaziuns é La Val che röia plö iadi dan porta aversara, mo le ultim passaje o i tiri ne röia nia a conclujiun. Do n chert d’ora él le Aicha che mët man de detè i ritmi, cun n bel tiro él n sogadù aversar che atoca la stangia de porta. La Val se stënta n pü a tignì sö le pal y da stè sö cun düta la scuadra. N’atra gran ocajiun dl’Aicha é stè le tiro da bun 30 metri che röia bel avisa sön le palo alt dla porta. Dan che le prüm tëmp se röia, él ciamò David che salva in extremis le gol dl 1 – 0 por la scuadra aversara. Sön n bel lancio éle n sogadù aversar che è bun da mëter le pal de cé cuntra porta, por fortüna è David bun da trà demez le pal.

Le prüm tëmp se stlüsc jö sön le 0 a 0.

Tl secundo tëmp é la scuadra da La Val che se descëda indo y va te ćiamp cun plö determinaziun. I sogadusc da La Val süga le pal bas y é bugn de se alzè deplü, insciö éle ince i centrocampisć che po’ se alzè a sostëgn di atacanć.

Le arbiter fej ince süa pert, sciuran n grüm de fuori giochi che ne foss nia stà. Avisa canche al parô che le gol gniss a mumënć, éle le Aicha che é bun de segnè. N sogadù dl’Aicha se davagna le pal fora dl’area sön rimpallo, chësc passa ite amez y l’atacant, sù dan le portier, é bun de segnè le 1 a 0.

Sëgn vëgnera plü ria por La Val da recuperè le resultat y passè insciö le turno. Mo impo éle la scuadra che crëi inant y bel avisa püch dedo éle n defensur aversar che fej n fallo te area sön Micky ,chësc se mët le pal sön le punto dl rigore é segnëia insciö le 1 a 1. La nervosité é grana y te ćiamp vëgnel ma plö scraié y partì fora gheles da pert dl’ arbiter jonn. Chësc ultim sciüra ince fora le alenadù Floriani por na protesta.

La scuadra da La Val fej inant n gran druch, sön n angolo éle ince Stefan che à na gran ocajiun de cé, mo le pal ti röia bel avisa ados al portier aversar.

Al 80ejim ti garetl spo le gol dl 2 a1 por La Val. Sön la riga de fondo éle Freddy y Stefan che fej na bela combinaziun, le pal vëgn metü ite bas y Paolo Vallazza röia tl dërt mumënt lassura y siglëia insciö le 2 a 1. Sëgn é La Val che passa an modulo plö defensiv. Le arbiter mostra sö i 4 menüc de recupero y avisa a trëi menüc da la fin éle la scuadra aversara che atachëia dassënn y pareggëia insciö cun n gran tiro tl set. Te n gran cajin al limit de area ne vëgn le pal nia spazzè lunć y insciö éle n sogadù che l’abina y pò trà te porta.

Püch dedo él ciamò l’arbiter che ti mostra la cöcena al defensur aversar Elmar Valentin pur na sbürla sön l’aversar. La Val les pro ciamò dütes mo le arbiter sciüra la fin, les scuadres messarà se fa fora la devënta ai rigori.

Le portier Merch, gran protagonist, é bun de parè bëgn 2 rigori. I rigori por La Val vëgn trasformà da Stefan, Freddy, Alex y Micky. Insciö é La Val che porta a ćiasa la devënta de 6 a 3 y pò passè al proscim turno che gnara bunamënter sughé ciamò dan la palsa da d invern.

 

La proscima partida de campionat é in sabeda a Niederdorf dales 16:00.


Formaziun titolara: Merch Vallazza, Paolo Vallazza, Alex Alton, Werner Sottara, Marco Castlunger, Stefan Sottara, Freddy Sottara, David Moling, Micky Frenes, Romeo Rubatscher y Alexander Miribung.


Sostituziuns:

Romeo Rubatscher por Manuel Stampfer

Werner Sottara por Elmar Valentin

David Moling por Egon Frenes


Alenadù: Floriani Claudio


Por udëi i resultać de copa dles atres scuadres drüca: risultati.pdf


 

Sponsoren

logo_M2_Srl raiffeisen miribung seve decor auto_vallazza Frenes_Patrick Plana_Ladina

Login



      Uniun Sport Amatoriala La Val, San Senese 1, I-39030 La Val
      info@uslaval.it - C.F. 81009280215 - ©