6ª partida campionat 2013/14
In dumënia 6 de Otober él gnü sughé la sesta partida dl campionat 2013/14 de 3ª categoria por La Val. Do la parité dl'andata dl secundo turno de Copa Provinzia da in mercui é La Val che davagna la partida cuntra la scuadra da Olang sön le ćiamp dal sport a La Val.
La scuadra lascia udëi na bela prestaziun, suradüt dl prüm tëmp daulache al é tumè düc i trei goi por La Val.
La partida mët man y a sughé bun é atira la scuadra jona da Olang che tëgn le pal bas y cun de beles combinaziuns esi bugn de se fà inant ruvan ince a tra te porta. Le assedio düra però ma püc menüć, i sogadus da La Val se posizionëia indo bun te ćiamp y mët man de lascè udëi sò jüch. La prüma ocajiun é Alex E. che à, al ciafa le pal sön n cross bas mo al röia mal lassura y tira le pal de püch sura porta fora. Püc menüć dedô tomel spo le prüm gol, sön na puniziun fora dl area éle le medemo Alex E. che cun na bela combinaziun cun Micky é bun de trà n bel tiro teso sön le palo lunch.
Le resultat é sbloché y i sogadus da La Val ciafa ciamò plü coraje, al ne passa nia tröp tëmp che Alex A. radopiëia le resultat cun n bel gol. Sön na puniziun de Micky da na pert abinel le pal al volo y le piazëia dlungia le palo it. Atira dedô éle n defensur aversar che fej n burt fallo sön Micky te area, chësc ne vëgn bëgn no udü dal arbiter, che fej jì inant le jüch. Tartan düt le prüm tëmp ne é la scuadra da Olang nia prigorosa, al é la scuadra da la Val che à la partida tles mans.
Le terzo gol toma spo püch dan la fin dl prüm tëmp, sön na bela aziun da pert di atacanć é Emanuel D. che mët n bel pal ite sön porta, n defensur aversar ò le trà demez y le tira bel avisa te süa porta.
Le arbiter sciüra püch do le prüm tëmp y i sogadus và a palsè sön le resultat de 3 a 0 por La Val.
Do la palsa é la scuadra da Olang che fej druch, i sogadus aversars vëgn lascià dasusc y po sughé de bì pai sënza gnì pressà. Le Olang röia plö gunot al tiro, mo le portier Merch che da na gran segurëza, é tres bun de se fà aldì y de parè chisc tiri. La nervosité crësc mo i sogadus da La Val é bugn de stè conzentrà y de gestì bun le resultat. Le arbiter mët ince man de partì fora gheles y se fej influenzè dai scrai di sogadus. Na ocajiun é ince Stefan che à, sön n preparativ de Alex E. tirel n tiro bas che ti röia avisa ados al portier. Dedô él ince Alexander M. che vëgn lancè da na pert jö cuntra porta, mo le cross vëgn dè cun massa forza y Emanuel ne é nia bun dl controlè de cé.
A purvè de siglé le resultat é ciamò Micky che pro. Al ciafa le pal amesa l'area , bel sù tirel de pröma sön le palo cürt mo le portier da Olang röia cun la piza dl pé a trà demez le pal.
Le gol dla bandira ne ti gareta nia ala scuadra aversara y insciö se rüvel ince la partida. Trëi punć importanć por la scuadra da La Val, che se posizionëia insciö al secundo post cun 13 punć do da la scuadra da Rina che nun à 14.
La proscima partida de campionat é in dumënia fora de ćiasa sön le ćiamp dl Gais dales 15.30.
La formaziun titolara: Merch Vallazza, Werner Sottara, Alex Alton, Paolo Vallazza, Marco Castlunger, Alex Elzenbaumer, Stefan Sottara, Romeo Rubatscher, Marco Rossini, Micky Frenes, Emanuel Dorigo
Sostituziuns:
Marco Castlunger por Egon Frenes
Marco Rossini por Alexander Miribung
Manuel Stampfer por Emanuel Dorigo
Romeo Rubathscer por Freddy Sottara
Felix Nagler por Alex Elzenbaumer
Por udëi i resultać de chësta dumënia de campionat drüca: risultati.pdf
