US LA VAL
 
 
     
 

Ritorno 2° turno Copa Provinzia 2013/14

Stampa PDF

copa2012

In sabeda ai 16 de Novëmber él gnü sughé le ritorno dl 2° turno dla Copa Provinzia 2013/2014 de 3° categoria por La Val. Do la bela devënta dl'ultima dumënia te campionat y le bel plazamënt de tlassifica, é la scuadra da La Val bona de passè le turno davagnan te ćiasa cuntra le Neustift por 3 a 1.


 

La sabeda da duman ê le ciamp ćiamò curì dala nëi, porchël él stè Micky y Alex A. che se à tut la bria de desparè fora y à arjigné ca n bel ćiamp vërt. Le laûr é gnü premié, noma cun la bela parüda sön le ćiamp da pêrt di sogadus mo sambëgn ince dai tröc sostenidus che é gnüs a ciarè pro la partida.


La partida mët man dër bun por La Val, i prüms 20 menüć ne vëiga i aversar nianca un en iade la porta. La Val lascia udëi n bel jüch, scialdi vigni pal vëgn concuisté y sughé fora bun, insciö röia i atacanć ince deplü iadi a contlujiun.
A mez le pröm tëmp tomel spo le gol dl 1 a 0. Sön na rebatüda dal ćiantun él Freddy al limit dl'area che tira na bela trata che röia sön le palo y spo tla rëi. Dedô éle ince ciamò Manuel S. che controlëia n bun pal te area mo le tiro vëgn parè sön la riga dal portier.
Bel plan é spo l'assedio da pêrt dla scuadra da La Val che da dô, les dijatenziuns vëgn paiades y insciö devënta ince le Neustift plö prigorus.
Sön n cross éle n atacant aversar che se fej furbo, al se cüfa jö y le pal ti röia sön la man al defensur da La Val, le arbiter mostra atira le punt di önescmetri. Le atacant se prejënta dan Sepl y le trasformëia tl 1 a 1. Cun na parité é i sogadus da La Val sambëgn no cuntanć, ai mëss a düć i cosć jì in vantaje por passè le turno.
Bel plan é spo la scuadra che ciafa indô l'intensité de jüch da denant, al ne passa nia tröc menüć do le rigore che Emanuel D. fej n bel gol. Sön n lancio da mezćiamp éle bun de se tignì le pal sot a control y cun n bel palonët scavalchëiel le verdaporta y apogëia le pal de cé te porta. Le 2 a 1 ti dà indo de nöies forzes ala scuadra y arbasa insciö la nervosité te ćiamp.
Dan le pröm tëmp él ciamò na ocajiun da recordè, Emanuel é bun cun na bela finta de superè la defenjun aversara y de jì cuntra porta, le tiro vëgn però devié ćiamò da n defensur, le pal ti röia indô sön le pé mo la secunda trata vëgn spo parada dal portier.

 

Le pröm tëmp se stlüj insciö sön le resultat de 2 a 1 por La Val.


Le secundo tëmp vëgn indo scialdi sughé dala scuadra de ćiasa. I pai rebatüs dala defenjiun dl Neustift vëgn tröc recuperà a mezćiamp y partis fora a les fasces o ai atacanć. Le ćiamp ne pormët nia che vigni pal röies a destinaziun a gauja dl terëgn bindebo dlacè.
Mo impò é i sogadus che süga tröp sön les fasces y chisc é bugn de abiné i pai y de se azentrè a dè le preparativ por i atacanć. Na ocajiun d'or é ince Alex E. che ciafa, sön n bel cross de Micky tirel na bela trata al jore mo chësta rimbalza mal, da impröma ia por tera y dedô sura porta fora.
Dal atra pêrt dl ćiamp é scialdi Sepl che mëss fa movimënt por se tignì ćialt, de gran ocajiuns da gol dl Neustift ne pon nia cumpedè.
A segné le 3 a 1 é spo Romeo, apena rové te ćiamp, co pënsa. Sön na bela combinaziun danter Emanuel y Stefan él le pal che ti röia al atacant che cun n bel palonët scavalchëia le verdaporta da Neustift.
Dô le gol é spo la scuadra che pò se posizioné bun te ćiamp y sogadus frësć vëgn te ćiamp a daidé tignì le resultat.
Le alenadù da La Val à ince messè se alontanè dal ćiamp por na protesta cuntra l'arbiter. De atres gran ocajiuns da pêrt de trames scuadres ne é nia da recordè fina ala fin dla partida.
Insciö sciüra l'arbiter tosc la fin y i sogadus adüm ai sostenidus pò esulté por avëi passè le turno.
Les proscimes partides gnarà bunamënter sugades dan le scomanćiamënt dl campionat da d'ainsciüda.

 

Do la partida él gnü festejè la devënta te Copa y le bun plazamënt de campionat adüm a düc i sostenidus dla scuadra.
IMG_3994
Insciö é les partides da d'altonn por la scuadra da La Val definitivamënter ruvades. I sostenidus dla scuadra adüm a düć chi che dëida arjigné
ca na bela cornisc vigni domënia se inconforta a n bel ritorno plëgn de emoziuns!

 

 

Formaziun titolara: Sepl Kantioler, Martin Ploner, Werner Sottara, Paolo Vallazza, Egon Frenes, Alex Elzenbaumer, Stefan Sottara, Freddy Sottara, Micky Frenes, Manuel Stampfer y Emanuel Dorigo

 

Sostituziuns:

 

Romeo Rubatscher por Manuel Stampfer (60ˆ)

Marco Castlunger por Egon Frenes (65ˆ)

Adrian Miribung por Micky Frenes (70ˆ)

Felix Nagler por Stefan Sottara (77ˆ)

Alex Alton por Freddy Sottara (86ˆ)


Alenadù: Floriani Claudio

 

Por odëi i atri resultać de Copa drüca sön risultati Coppa


 

Sponsoren

logo_M2_Srl raiffeisen miribung seve decor auto_vallazza Frenes_Patrick Plana_Ladina

Login



      Uniun Sport Amatoriala La Val, San Senese 1, I-39030 La Val
      info@uslaval.it - C.F. 81009280215 - ©