Campionać de lüsa alta a Valdaora

Chësc fin dl'edma él gnü tignì i Campionać dl Monn de lüsa alta sön la pista „Panorama“ a Valdaora. A chësc evënt al partezipé plü de 100 atleć de deplö nazionalitês. L'atleta Daniela Erlacher dla scuadra da La Val pò pié dô le titul mondial de söa categoria y Diego Tschaffert fej le terzo miù tëmp.

Ince sce le tëmp de chësc fin dl'edma à portè tröpa nëi y plöia, él stè la Uniun dl Sport da Valdaura che à preparè na pista de buniscimes condiziuns por la gara. Nia ma la buna organisaziun, mo ince le program partì sö sön i 3 dis ne podô nia ester damì.

Le gran laûr é ince gnü laldè dal presidënt dl „ISSU“ (federaziun internazionala dla lösa alta) Tobias Moretti, che é rové sön l post y à porvè fora la pista por pröm.

De gran complimënć ti va ai atleć da La Val che à partezipé ala gara y à arjunt de buniscimi resultać.

Bele la sabeda éle gnü surandè i pröms titui mondiai. Chilò él stè l'atleta dla scuadra da La Val Daniela Erlacher, che à podü jì sön le scalin plö âlt dl podest a pié dô la medaia d'or te söa categoria master w. Cun le tëmp de 02:44.75 ara arjunt le pröm post dan da la austriaca Bucher Margit y Tolar Tina dla Slovenia. Tla tlassifica generala dles erës é Daniela rovada al 4º post. N bel resultat por vëra, che pò mostrè sö n ater bel titul adöm a chël de Campionëssa taliana te söa categoria.

Tla categoria Juniores é ince l'atleta Iris Erlacher che é jüda al start. Cun le tëmp de 02:49.63 ara arjunt le bun otavo post.

La categoria di ëi é gnüda partida sö de 3 pêrts, döes la sabeda, daulache le atlet da La Val Tschaffert Diego ê romagnü a cé dla tlassifica dan l'austriach Strickner Thomas. Les finales di ëi é spo gnüdes daurides la dumënia dales 12.00. Diego Tschaffert é rové al travert mostran sö le tëmp de 4:01.94, a chësc tëmp ti vëgnel assegnè le buniscimo terzo plazamënt do da Stockner Helmuth y le campiun dl monn Ehammer Andreas dal Austria, che à fat le tëmp de 4:01.30.

Da alzè fora é sënzater ince le bun resultat de Miribung Carlo da La Val, che pò mustrè sö le 11° post cun le tëmp de 4:05.04.

Tla tlassifica generala dles nazionalitês, daulache al vëgn trat la soma di trëi miûs tëmps, é stada la scuadra austriaca la favorita. Al secundo post spo la Talia cun le tëmp de 4:05.48.

Chilò pon ciafè düc i resultać di 3 dis de gara: Resultać

L'U.S. La Val uress ti fà i mius complimënć ai atleć por i bogn resultać portà a ćiasa.