US LA VAL
 
 
     
 

2ª partida de campionat rit. - Niederdorf

Stampa PDF

IMG_5010

In domënia ai 06 de aurì él gnü sughé la secunda partida de campionat por la scuadra de 3ª categoria da La Val te ćiasa cuntra le Niederdorf. Na partida dër combatüda, mo ala fin é La Val che à la miù y porta a ćiasa la devënta cun le resultat de 1 a 0.

 

 

 

 

La partida mët man nia cis bun por la Val che se stënta dassën a fa jüch, le Niederdorf é plö iadi prigorusc dan la porta de ćiasa. Na gran ocajiun dla scuadra aversara é stada sön na puniziun. La bela trata röia sön la stangia de porta y le atacant aversar röia sön le pal rebatü, che vëgn por gran fortuna trat spo sura porta fora. I sogadûs da La Val se fej êrt a costruì les beles aziuns lasciades udëi dles partides passades y la presciun dla scuadra aversara se fej sintì te vigni posiziun dl ćiamp. Mo impò ti garêtel val ocajiun, üna de chëstes é Alex E. che à, sön n bel cross de Micky tira Alex na bela trata che ti rüva ados al portier. La scuadra da La Val se adatëia ince al jüch dl Niederdorf, che süga tröp cun le pal por aria y insciö é ince i atacanć che stënta da tigni sö le pal.


Le arbiter sciüra le pröm tëmp y i sogadûs va a palsè a rëis inviolades.


I sogadûs de Floriani röia te ćiamp tl secundo tëmp plö determinà. Le gol toma bel do da püć menüć. Alex vëgn lancè sön la fascia y se indirizëia cuntra porta, le bel preparativ ti röia a Micky che pò apogé le pal te porta. Insciö ciafa indo la scuadra nöies forzes, al vëgn indo lascè udëi n bel jüch y i aversars vëgn antizipà deplö.  Mo ara ne düra nia dî che le Niederdorf lascia indô udëi sües forzes. N defensur da La Val se chërda le pal al limit y insciö é l'arbiter che sciüra la puniziun. La bela trata dl atacant dl Niederdorf abina la stangia de porta. Da alzè fora é dessigü la segurëza y les beles uscite dl portier Lukas E., che à fat na gran partida. Ince Adrian, apëna gnü te ćiamp à söa ocajiun, sön n bel assist de Emanuel D. röiel su dan porta, mo la trata basa vëgn deviada dal portier y va fora. I ultimi menüć dla partida é le pal ma plö da udëi tl'aria, la luzidité di sogadûs da La Val é ince diminuida y le bel jüch é dl düt asënt. Le arbiter mostra sö 6 menüć de recuper, te chësc tëmp ne él da recordè nia gran ocajiuns prigoroses da trames pêrts. La partida và insciö a piz sön le resultat de 1 a o por la scuadra de ćiasa.

La Val davagna insciö por le cuarto iade cuntra le Niederdorf te chësta sajun. La scuadra de Floriani à bel incuntè chësta scuadra ai cuarti de Copa Provinzia, daulache ara à passè le turno.

La proscima edma é les 2 scuadres a cé dla tlassfica che se incuntarà. La Val sugarà le derby cuntra Rina in dumënia ai 13 de aurì dales 16:00 fora de ćiasa.

 

MUDAZIUN DLA PARTIDA:

La data dl recuper dla partida cuntra le Sexten (nia sugada ai 23 de merz a gauja de nëi) é gnüda spustada, chësta partida gnarà sugada le proscimo mercui ai 16 de aurì dales 20:00 te ćiasa.


Formaziun titolara: Lukas Eder, Egon Frenes, Alex Alton, Paolo Vallazza, Marco Castlunger, Alex Elzenbaumer, Stefan Sottara, Romeo Rubatscher, Micky Frenes, Alexander Miribung y Emanuel Dorigo.

Alenadù: Floriani Claudio

 


Sostituziuns:

Max Nagler por Alexander Miribung (45^ menüt)

Werner Sottara por Marco Castlunger (65^ menüt)

Adrian Miribung por Alex Elzenbaumer (75^ menüt)

 

Por odëi i resultac dles atres partides drüca RESULTAĆ


IMG_5013 IMG_5014 IMG_5012 IMG_5011 IMG_50161
 

Sponsoren

logo_M2_Srl raiffeisen miribung seve decor auto_vallazza Frenes_Patrick Plana_Ladina

Login



      Uniun Sport Amatoriala La Val, San Senese 1, I-39030 La Val
      info@uslaval.it - C.F. 81009280215 - ©