US LA VAL
 
 
     
 

Ritorno Derby Ladin

Stampa PDF

IMG_5045

Incö dumënia ai 13 de aurì él gnü sughé le derby ladin danter la scuadra da La Val y le Rina. Le ćiamp da jüch é in chësc iad stè chël da Rina, daulache al é rové adalerch n grüm de jënt a de sostëgn a söa scuadra. Le derby ti é in chësc iad jü al Rina, che à albü la miù sön la scuadra da La Val cun le resultat de 1 a 0.

 

 

 

N derby dër sintì, deplö ciamò sce les scuadres che se mosöra é a cé dla tlassfica. Da recordè che le resultat dl'andata é jü fora in parité cun le resultat de 1 a 1. Na partida dër aspetada ince da pert di sostenidûs dles scuadres, che é rovà adalerch cotanć a fa da cornisc al evënt.

La determinaziun di sogadûs a portè a ćiasa la devënta é grana y porchël ne pol nia falè la mascima conzentraziun y la luzidité pro na te partida. Apëna che la partida mëtes man pon atira notè che chëstes döes carateristiches ne fala nia, vigni pal vëgn atachè, concuisté y scariché bun.

I sogadûs da La Val tëgn bun la posiziun y é bugn de antizipé i atacanć dl Rina che se fej plö iadi prigorusc. Dui iadi ti él gnü conzedü al atach dl Rina de trà dal limit dl'area, mo le portier Lukas à tres archité sö le pal. La defenjiun da La Val fej n gran laûr, i dui terzini fej bela parüda cun de bì antizipi y cun le recuper de vigni pal ciari de fa pié ia indô l'aziun. I atacanć da La Val é bugn de tignì sö le pal y de le partì fora sön les fasces mo da alzè fora ocajiuns prigoroses ne él nia. De beles combinaziuns y aziuns ne vëighen nia te chësta pröma pêrt dla partida, i sogadûs combat sön vigni pal por le concuisté mo à spo dificultè a impostè le jüch y le ultim pasaje por rové te porta ne röia prësc mai a destinaziun. Dan la fin dl pröm tëmp é ciamò le arbiter che conzed na puniziun al limit dl'area dla scuadra da La Val, do che n atacant à subì n fal da pêrt de n defensur da La Val. I sogadûs protestëia cuntra la dezijiun dl'arbiter, che n' à nia conzedü le önescmetri.IMG_5044


Le arbiter sciüra le pröm tëmp. I sogadûs va te cabina a palsè sön le resultat de 0 a 0.



Le secundo tëmp mët man cun n gran druch dl Rina. Sön les trates dai ćiantuns é i atacanć bindebo prigorusc mo ala fin röia impò i defensurs da La Val sön le pal. La scuadra de Floriani lascia ince udëi de beles combinaziuns cun pasaji bâsc danter i zentrocampisć y les fasces, Micky röia plö iadi jö sön le ćiantun de ćiamp y mët amez le pal, de beles ocajiuns che ne é nia gnüdes anuzades. Dal atra pêrt dl ćiamp é le Rina che à na ocajiun d'ôr, l'atacant é bun de se trà da na pêrt it cuntra porta y cun na finta de superè le defensur, mo la trata bâsa vegn tignida sö dal portier Lukas. La scuadra da La Val mëss plütosc aretrè a daidé defënn y se stënta da tignì sö le pal y da impostè indô le jüch. La nervosité crëscia y le arbiter partësc ince fora gheles a gauja de proteste.

A püć menüć dala fin tomel spo le gol dl vantaje por le Rina. Le atacant David H. é bun de se smarchè amesa la defenjiun y le mezćiamp y vëgn insciö delizié cun n bel pasaje, al se gira cuntra porta y cun na bela trata tl set portel le Rina in vantaje. Le gol subì ti taia le giames ala scuadra da La Val che mëss a vigni moda porvè de recuperè le resultat. Micky tira ince ciamò na bela trata al jôre che ne ti sciampa nia al portier dl Rina. Le assedio dla scuadra da La Val a chirì le gol ti ultimi menüć ne à nia bastè, le sciür dl'arbiter ti tôl la speranza de segné. La scuadra da Rina resta insciö a cé dla tlassifica cun 39 punć y la scuadra da La Val al secundo post cun 34 punć.

La Val süga söa proscima partida in mercui ai 16 de aurì dales 20:00 cuntra le Sexten (recuper dla partida che ess messü gni sugada ai 23 de merz).

 


Formaziun titolara: Lukas Eder, Egon Frenes, Alex Alton, Paolo Vallazza, Marco Castlunger, Alex Elzenbaumer, Stefan Sottara, Max Nagler, Micky Frenes, Romeo Rubatscher y Alexander Miribung.

Alenadù: Floriani Claudio

 


Sostituziuns:

Werner Sottara por Egon Frenes (65^ menüt)

Adrian Miribung por Alexander Miribung (75^ menüt)

Marco Rossini por Micky Frenes (85^ menüt)

 

Por odëi i resultac dles atres partides drüca RESULTAĆ


IMG_5046 IMG_5047 IMG_5048 IMG_5049 IMG_5050
 

Sponsoren

logo_M2_Srl posta raika1.plata seve decor1.plata Logo_moritz_01 patrick1.plata helmut1.plata ploner1.plata

Login



      Uniun Sport Amatoriala La Val, San Senese 1, I-39030 La Val
      info@uslaval.it - C.F. 81009280215 - ©