US LA VAL
 
 
     
 

5ª partida de campionat rit. - Raas

Stampa PDF

IMG_5083

Te chësc fin dl'edma de Pasca é les partides dl campionat de 3ª categoria gnüdes spustades ala sabeda. Ince sce la nëi s'à fat udëi é le ćiamp dal sport da La Val gnü sparè fora por che la partida cuntra le Raas pudess gnì sugada. La scuadra da La Val à la miù cun 3 goi y pò se mët indô 3 punć te gaiofa.

 

 

 

Le pröm tëmp ne mët bëgn no man bun por la scuadra, le bel jüch cun le pal bâs é prësc dal düt asënt, tröć pai ne vëgn nia anuzà bun y trać demez. L'impostaziun dl jüch ne ti gareta nia ai sogadûs ti pröms 30 menüć yIMG_5085insciö é ince la nervosité che se fej udëi.

Na bela aziun ti gareta a La Val, n bel cambio de fascia ti fej pormët a Micky de ruvé da na pêrt jö y de crosè n bel pal por Emanuel, por desfortüna ne abinel chësc nia le pal de cé. Le Raas à na buna ocajiun sön na trata dal ciantun che röia cuntra porta, n atacant abina le pal de cé che röia sön la stangia de porta.Püch dô é spo indô le jüch da La Val che vëgn rianimé, sön na bela suraposiziun de Stefan y le medemo che mët le pal ite bâs a mez y Micky, che rüva in velozité cuntra le portier pò apogé insciö le pal te porta. Finalmënter é le resultat sblochè y le jüch ciafa indô vita.

Al ne pasa nia tröp tëmp dô le gol che l'arbiter sciüra la fin dl pröm tëmp.


I sogadûs va a palsè sön le resultat de 1 a 0 por La Val.


Tl secundo tëmp vëighen n gran cambiamënt , sides por ci che reverda le jüch che por la cativeria agonistica di sogadûs. Al vëgn sughé tröp cun pasaji dan l'area dl Raas mo i sogadûs stënta de jì a contlujiun. A radopié le resultat é spo Emanuel che pënsa, al é bun de controlè le pal, se ôsc, y cun na bela trata da 30 metri röia le pal sot la stangia de porta, n beliscimo gol.

La scuadra de Floriani rischiëia bel atira de se ciafè n gol, naota sön na puniziun al limit dl'area, daulache le portier Lukas à fat n paratun. La trata é indirizada tl set de porta y Lukas cun n bel stach abinel le pal é le para sura porta fora. Atira dedô sön n fal te area é l'arbiter che conzed n önescmetri al Raas. Le atacant se prejënta dan Lukas, mo chësc ne é nia bun dl trasformé tl gol. Lukas rebat la trata dai önescmetri cun na gran parada.L'arbiter à ince fat söa pêrt de chësta partida, sciuran n grüm de fai che ne foss nia stà y sënza dè spiegaziuns por sües dezijiuns. Se lascè sö y protestè ne porta nianca a nia, l'unico meso por se calmè é ciarè de jì cuntra porta a segné. Insciö é ince Alex E. che à punsè, sön n assist da mezćiamp röiel sù cuntra porta y bat le portier cun na trata bâsa. Al mancia nia plö tröp ala fin dla partida y cun chësc gol é la devënta assigurada.

Le arbiter stlüj jö la partida y i sogadûs pò indô incassè 3 punć da somè ai 38 punć. La Val resta al secundo post do le Rina cun che mostra sö 43 punć.

In mercui él l'andata dla semifinala de Copa Provinzia cuntra le Ritten sön le program, al gnarà sughé dales 20:00 sön le ćiamp da La Val. Arjunj chësta semifinala é bel stè n bel travêrt, l'Uniun ti aoda ai sogadûs de ruvé te finala, sciöche al é bel suzedü dan da 2 agn...

 

L'Uniun dl Sport da La Val tôl l'ocajiun por ti auguré a düć na bona Pasca.

 

Formaziun titolara: Lukas Eder, Martin Ploner, Alex Alton, Paolo Vallazza, Werner Sottara, Alex Elzenbaumer, Stefan Sottara, Romeo Rubatscher, Micky Frenes, Adrian Miribung y Emanuel Dorigo.

Alenadù: Floriani Claudio

 


Sostituziuns:

Alexander Miribung por Adrian Miribung (45^ menüt)

Egon Frenes por Martin Ploner (75^ menüt)

Marco Rossini por Alex Elzenbaumer (80^ menüt)

 

Por odëi i resultac dles atres partides drüca RESULTAĆ


IMG_5082 IMG_5084 IMG_5086

 

Sponsoren

logo_M2_Srl raiffeisen miribung seve decor auto_vallazza Frenes_Patrick Plana_Ladina

Login



      Uniun Sport Amatoriala La Val, San Senese 1, I-39030 La Val
      info@uslaval.it - C.F. 81009280215 - ©