US LA VAL
 
 
     
 

7ª partida de campionat rit. - Gais

Stampa PDF

IMG_5234

In domënia ai 4 de mà él gnü sughé la setima partida de campionat de 3ª categoria por la scuadra da La Val. Sughé él gnü te ćiasa cuntra la scuadra da Gais. La reaziun do la pordüda dl’ultim fin dl’edma é stada positiva, la scuadra lascia udëi na bela prestaziun y davagna la partida cun le resultat de 2 a 1.

 

 

 

Chësta devënta é dessigü stada de gran importanza por la scuadra da La Val, che resta insciö al secundo post de tlassifica cun 43 punć y le distach dales scuadres ia dedô vëgn três maiù. La temperatöra cialdina y le bel tëmp ti à fat da cornîsc ala partida. Te chësta partida é Adrian che surantôl le compit de verdaporta, a gauja dl’asënza di atri dui portiers.

I sogadûs da La Val süga n bel pröm tëmp, fat de gran druch y cun de beles aziuns. Deplö é stades les ocajiuns, mo tröć iadi é le ultim pasaje che ne röia nia a destinaziun, por fa jì i atacanć sûsc cuntra le portier. In cürt les ocajiuns dl pröm tëmp; Cun n bel cambio de fascia da pêrt de Dorigo röia Alex E. al limit dl’area y cun na bela trata de girata röia le pal de püch dlungia la stangia de porta ia. Püch dedô manacia la scuadra de Floriani de püch de jì in vantaje. Alex A. abina le pal al limit dl'area y tira sön porta, chësc vëgn devié sön le cé de Romeo, le pal röia naota sön la stangia de porta y spo é le portier aversar che é bun dl’archité sö sön la linea.

La scuadra é bona de stè alta y conzed püch ai aversars, la defenjiun fej bun sò laûr y ciara insciö le plö poscibl de daidé le verdaporta Adrian.

IMG_5241

Al 35ejim é spo Miki che sbloca le resultat. Le medemo vëgn delizié cun n bel assist de Emanuel y röia sù cuntra porta, la trata bâsa fej balè la rëi y ti porta le 1 a 0 a La Val. Da recordè é ince ciamò na ocajiun de Max, sön n bel preparatîv dl atach röiel sù al limit dl’area mo la bela trata röia de püch sura porta fora.


Le arbiter sciüra la fin dl pröm tëmp, te chisc 45 menüć é la scuadra de ćiasa che detëia i ritmi. I sogadûs va a palsè sön le 1 a 0.


 

Por se assiguré la devënta ôl ester ciamò n secundo gol. Atira é la scuadra che ciarà de fa inant druch por ruvé sön porta. Dô da 15 menüć é indô Miky che fej esulté sü cumpagns adüm a düć i sostenidûs cun n eurogoal, sön n lancio se portel le pal sön le ciantun dl’area y cun na bela trata de forfesc batel le verdaporta; Le pal ti röia sura le portier ite, naota sön la stangia y spo ia por tera. Adöm a chësc gol é ince n sogadù dl Gais che vëgn desgort dal ćiamp cun la cherta cöcena a gauja de na protesta.Al ne passa nia tröp tëmp che ince le Gais se lascia udëi. La scuadra aversara devënta ince prigorosa cun de beles combinaziuns y i atacanć ti sciampa plö iadi ala defenjiun, mo daimpröma sënza ester dër prigorûsc. Sön na trata dal ciantun é le atacant aversar che abina le pal y la trata di röia avisa sön la man de Stefan. Le arbiter ne pëns nia sura dui iadi y fischiëia insciö le önescmetri. Chësc vëgn spo trasformè por le 2 a 1.

 

Le resultat é indô al prigo mo la luzidité di sogadûs ne da nia dô, al vëgn tignì bun la posiziun y sughé inant. Da alzè fora é na gran ocajiun de Alex E., che é bun de controlè le pal te area aversara, al se gira y tira na bela trata de potënza, chësta vëgn de püch deviada dal portier sura porta fora. Alexander M. apëna ruvé te ćiamp ciafa sön le pé n bel pasaje da mezćiamp y cun n bel palonët scavalchëiel le portier, la trata rüva por n pulan dlungia porta ia. Dorigo à ince ciamò la poscibilité de stlü jö la partida cun na ocajiun d’or, le cros de Alexander é indirizé cuntra sò cé, mo le sogadù superëia le defensur cun na finta y cun n bel palonët indirizëiel le pal te porta, chësc vëgn ciamò archité sö in extremis dal portier. Le Gais é ciamò prigorûs al’ultim menüt, sön na gran mischia te area ladina é le pal che abina naôta la stangia de porta, chësc vëgn ciamò rebatü n iade cuntra porta de cé mo le portier Adrian archita sö le pal y al vëgn cometü n fal.

Ince sce i sogadûs aversars é un demanco à la scuadra de Floriani messü de düt por portè a ćiasa i 3 punć. La bela prestaziun ti dà moral positiv ai sogadûs por jì a se sughé le ritorno dla semifinala de Copa Provinzia in mercui ai 7 de mà dales 20:00 sön le ćiamp dl Ritten.

La proscima partida de campionat é in dumënia ai 11 de mà dales 16:00 fora de ćiasa cuntra le Mühlwald.

 


Formaziun titolara: Adrian Miribung, Elmar Valentin, Alex Alton, Paolo Vallazza, Werner Sottara, Max Nagler, Stefan Sottara, Alex Elzenbaumer, Micky Frenes, Romeo Rubatscher y Emanuel Dorigo.

Alenadù: Floriani Claudio

 


Sostituziuns:

Felix Nagler gnü ite imped Alex Elzenbaumer (70^ menüt)

Marco Castlunger gnü ite imped Romeo Rubatscher (75^ menüt)

Alexander Miribung gnü ite imped Micky Frenes (75^ menüt)

 

Por odëi i resultac dles atres partides drüca RESULTAĆ


IMG_5242 IMG_5232 IMG_5235 IMG_5236 IMG_5237
IMG_5233 IMG_5231 IMG_5239 IMG_5240
 

Sponsoren

logo_M2_Srl posta raika1.plata seve decor1.plata Logo_moritz_01 patrick1.plata helmut1.plata ploner1.plata

Login



      Uniun Sport Amatoriala La Val, San Senese 1, I-39030 La Val
      info@uslaval.it - C.F. 81009280215 - ©