US LA VAL
 
 
     
 

10ª partida de campionat rit. - Prettau

Stampa PDF

IMG_5393

Inier, domënia ai 25 de mà él gnü sughé la penultima partida de campionat de 3ª categoria sön le ćiamp da La Val cuntra la scuadra da Prettau. Na bela prestaziun dla scuadra, che arjunj cun chësta bela devënta de 4 a 1 i 50 punć tla sajun 2013/14. Dô chësc fin dl’edma de campionat ti va ala scuadra da Rina de gran complimënć da pêrt dl U.S. La Val por la promoziun te 2ª categoria.

 

 

 

Les temperatöres cialdines à fat da cornîsc a chësc bel domisdé ia dala plaza dal sport “Plans” a La Val. Na bela partida plëna d’ emoziuns, che à fat sperè fina ala fin de podëi ciamò arjunj le Rina al pröm post de tlassifica. La Val ne é nia plö buna de arjunj la scuadra a cé de tlassifica, le Rina davagna te ćiasa cuntra le Niederdorf y se assigurëia insciö le titul cun 55 punć. Sciöche secundo post de tlassamënt, pò La Val sughé les partides de dezijiun dô le campionat y crëi insciö ciamò tla promoziun.

IMG_5394

Al é la scuadra da La Val che à scialdi düta la partida tles mans. Da odëi él stè n grüm de ocajiuns da pêrt di sogadûs ladins, ci che à n pü mancé é stà i ultimi pasaji por rové a contlujiun, scialdi massa lûnć o massa cürć.

Bele da mët man dla partida é la scuadra ladina che fej n gran druch, al vëgn scialdi sughé tl mezćiamp aversar cun le pal bâs. Menüt por menüt rüva i sogadûs três plö dlungia porta, al ne pasa nia tröp che Alexander M. fej spo le pröm gol. Sön n bel cross de Micky abina le atacant le pal de će y le indirizëia cuntra le palo lunch dla porta. N bel gol por Alexander, che porta le pröm gol dla partida. La medema ocajiun à ince Stefan püć menüć dedô. In chësc iade él indô Micky che deliziëia le centrocampist cun n bel cross, Stefan indêre sfiorëia le pal cun l će mo ne abina nia la porta. Ince Paolo Vallazza à süa ocajiun,indô sön na trata dal ciantun (da recordè sò bel gol cuntra la scuadra da Mühlwald). Al se posizionëia bun te area y abina le pal de pé , che rüva indêre sön le palo de porta.

I püć iadi che le Prettau devënta prigorûsc é scialdi sön les ripartenze, la defenjiun  da La Val resta plö tôsc alta por dè sostëgn y continuité al atach y insciö é i aversars che é bugn de ti sciampè. Sepl fej bun so laûr y abina scialdi les trates sön porta. Le pröm di 3 goi de Micky te chësta partida toma al 35^, al ciafa le pal amesa l’ area y cun n bel control deliziëiel le publich cun n bel palonët sura le verdaporta it, che ne rüva nia a devié fora le pal. 2 a 0 por La Val. Dan le pröm tëmp él ciamò da alzè fora na bela ocajiun de Alex E., al se fej inant da na pêrt jö y röia al limit dl’area, la bela trata röia de püch dlungia la palo lunch ia.


Les scuadres va a palsè sön le resultat de 2 a 0 por i ladins.


I sogadûs ciafa val coreziuns da pêrt dl’alenadù Floriani sön piceres dijatenziuns dl pröm tëmp y dal atra pêrt na gran carica por stlü jö la partida. Micky à fan de goi in chësta domenia, y bele do püć menüć dl mët man dl secundo tëmp trasformëiel n önescmetri a gauja de n fal sön Alexander M.

Da spavënt sciode é i grüm de ultimi pasaji sciurà demez dai sogadûs, che pudess saurì gnì gestîs plö bun y che pudess ester dezisifs por rové a trà te porta. La luzidité ne dà nia dô, sön vigni pal vëgnel ciarè de antizipé l’aversar y de partì fora i pai ai compagns che che se infiltrëia jö por les fasces  cuntra porta. Micky é un de chîsc y indô n iade pon  fa sò inom sön n le cuarto gol. Le medemo tira na bela trata a 30 metri dala porta, sön chësc é ince Alexander M. che dà so contribut, al ti cür la visuala al verdaporta che ne é nia bun de abiné le pal, la cogura röia bel plan dlungia le palo ite. 4 a 0 por La Val y triplëta de Micky.

Le gol dla bandira  por Prettau toma spo atira dedô, al vëgn lascè crosè amez y l atacant lascè sù cun n bel stach, él bun de apogè le pal de će te porta. Na gran dijatenziun che podô gnì evitada. Le centrocampist Felix N., apëna gnü te ćiamp, fej ince gran parüda y davagna n grüm de “duei tl’aria”, de će ne ti la stica degun aversar. Chësc à ince süa gran ocajiun incö, süa trata da plö de 30 metri cuntra le set de porta vëgn de püch deviada sura fora dal verdaporta. Ti ultimi menüć él ciamò da arcordè val trates te porta da pêrt de trames scuadres, scialdi ruvades dlungia ia.

La partida se röia sön le 4 a 1 por La Val, in ocajiun dl’ultima partida te ćiasa él gnü fat festa cun düć i sostenidûs dla scuadra. A chisc ti va in primis n grandiscimo giulan por ester presënć a vigni partida. Vigni fin dl’edma é chësc sostëgn fondamental y ti da na gran motivaziun y forzes ai sogadûs. Giulan!

 

La Val süga söa ultima partida d campionat in domënia ai 01 de jügn dales 16:00 fora de ćiasa sön le ćiamp a Vahrn cuntra la scuadra da Neustift.

 


Formaziun titolara: Sepl Kantioler, Marco Castlunger, Alex Alton, Paolo Vallazza, Elmar Valentin, Romeo Rubatscher, Max Nagler, Stefan Sottara, Alex Elzenbaumer, Micky Frenes y Alexander Miribung.

Alenadù: Floriani Claudio

 


Sostituziuns:

Martin Ploner gnü ite impede Elmar Valentin (60^ menüt)

Felix Nagler gnü ite impede Stefan Sottara (70^ menüt)

Werner Sottara gnü ite impede Paolo Vallazza (75^ menüt)

Egon Frenes gnü ite impede Micky Frenes (80^ menüt)

 

Por odëi i resultac dles atres partides drüca RESULTAĆ


IMG_5372 IMG_5385 IMG_5386 IMG_5387 IMG_5388
IMG_5389 IMG_5390 IMG_5391 IMG_5392 IMG_5395
IMG_5396 IMG_5397 IMG_5398 IMG_5399 IMG_5400
Foto: Ester Elzenbaumer
 

Sponsoren

logo_M2_Srl raiffeisen miribung seve decor auto_vallazza Frenes_Patrick Plana_Ladina

Login



      Uniun Sport Amatoriala La Val, San Senese 1, I-39030 La Val
      info@uslaval.it - C.F. 81009280215 - ©