US LA VAL
 
 
     
 

3˚ y 4˚ post- La Val cuntra Ritten

Stampa PDF

IMG_5638

Dô la sconfita dla partita de dezijiun cuntra le Montan da in sabeda, é i sogadûs da La Val jüs a Freienfeld a porvè de arjunj le terzo post cuntra la scuadra da Ritten, bel incuntada te Copa Provinzia in chësc ann. A La Val ne ti gareta nianca le secunda “chance”, le Ritten é bugn de ti fa n gol ti pröms menüć y de defënn bun le resultat fina ala fin.

 

 

 

 

 

Ince sce la terna arbitrala à sciuré le imposcibel cuntra la scuadra ladina, ne à i sogadûs bria de se trà dant nia, al é gnü porvè cina ala fin de stiché I’ aversar.

La partida mët man sot na plöia lisîra y atira é le Ritten co mët i sogadûs ladins sot a druch. Al vëgn conzedü massa y i atacanć é bugn de trà fora n gröm de fai al limit dl’area. Bele do 10 menüć ti gareta le gol a l’atacant sterch da Ritten, pericul numer un por la defenjiun da La Val. Chësc ciafa n bel pasaje al limit dl’area y cun n bel control él bun de se rodè y de trà sön le palo lunch de porta, la strata de Luki ne ti permët nia de abiné le pal. 1 a 0 por le Ritten. Dô le gol é spo ince la scuadra de Floriani che se lascia bel plan udëi, al vëgn indô costruì aziuns cun de beles combinaziun danter mezćiamp y atach. Le ultimo pasaje vëgn scialdi sciuré demez y atira é indô les ripartenze di aversars dassënn prigoroses. Le arbiter fej ince gnì düć nervöj te ćiamp, cinamai é n sogadù aversar che ti dà arjunj ai sogadûs ladins por val protesta. Dan le prom tëmp é ciamò Romeo che à na bela ocajiun. Sön n cros de Alex E. röia le pal amesa la defenjiun fora sön le pé a Romeo, por desfortüna ne él nia bun de abiné la porta y tira le pal sura fora.


Dô chësc episode sciüra le arbiter la fin dl prom tëmp sön le resultat de 1 a 0 por le Ritten.


Tl secundo tëmp röia i sogadûs cun plö convinziun te ćiamp, l’alenadù alza la scuadra y passa indô, sciöche la sabeda, a n modulo plö offensiv por jì a chirì la parité. Tla pröma pêrt ne suzedl nia gran tröp, le mezćiamp da La Val se stënta ince a mët jö le pal y al partì fora sön les fasces. Le arbiter pegiorëia ciamò deplö la situaziun y fej por ejëmpl proseguì le jüch cun sogadûs ia por tera y conzed puniziuns inejistëntes. Le alenadù Floriani vëgn ince desgôrt dal ćiamp por protesta.

Le Ritten fala ince de püch l’ocajiun de radopié le resultat, l’atacant röia sù dan porta, la trata vëgn deviada da Luki y cogura bel plan te porta, Elmar V. é ciamò bun “in extremis” de tignì sö le pal sön la riga. I sogadûs da La Val é plö tendënć y a sughé le pal âlt tla secunda pêrt, cîs cun i rinvi de Luki, che ciara de scavalchè la defenjiun por l’inserimënt de n atacant. La Val à ince ciamò val ocajiuns dan porta mo sënza ester prigorûsc. Dan le sciüra dla fin é ciamò Romeo che ciafa n bel pal âlt da Dorigo sön le pé amesa area. Al ne pënsa nia sura dui iadi y tira na trata al jôre, che vëgn naôta deviada dal defensur y spo é ciamò le portier bun dl tignì sö cun i dëic sön la riga.

 

Nia da nen fa plü, le arbiter sciüra la fin y la scuadra da La Val pêrd definitivamënter la ferata por ruvé te secunda. Le trù é stè lunch y impegnativ, mo les bries ne à ala fin nia portè a la promoziun. De gran complimënć ti và impò ala scuadra y a sò alenadù Floriani.  Al vëgn sperè te na buna colaboraziun cun l’alenadù ince ti proscimi agn.

Dal atra pêrt ti va ciamò n iade n gran y bel giulan a düć i sostenidûs dl’U.S. La Val, pici y gragn, che ne à mai lascè la scuadra ladina sënza sò publich y a motivé i sogadûs vigni partida, sides pro chëres davagnades y sides pro chëres pordüdes. GIULAN!


 

I sogadûs jarà sëgn tla palsa estiva, le mët man dla preparaziun por la sajun nöia é preodüda ai pröms de agost.

Formaziun titolara: Lukas Eder, Egon Frenes, Paolo Vallazza, Alex Alton, Elmar Valentin, Stefan Sottara, Max Nagler, Alex Elzenbaumer, Romeo Rubatscher, Alexander Miribung y Emanuel Dorigo.

Alenadù: Floriani Claudio

 


Sostituziuns:

Marco Rossini gnü ite imped Egon Frenes  (45^ menüt)

Freddy Sottara gnü ite imped Alexander Miribung (65^ menüt)

 

Insëra, mercui ai 23 de aurì él gnü sughé l’andata dla semifinala de Copa Provinzia cuntra la scuadra da Ritten, che süga le campionat três te 3 categoria mo te n ater girone. La scuadra da La Val à incuntè na scuadra sterscia, che à lascè udëi sües cualitês portan a ciasa la devënta por 2 a 0. Ai 7 de mà gnaral sughé le ritorno sön le ćiamp dl Ritten.

 

Sponsoren

logo_M2_Srl raiffeisen miribung seve decor auto_vallazza Frenes_Patrick Plana_Ladina

Login



      Uniun Sport Amatoriala La Val, San Senese 1, I-39030 La Val
      info@uslaval.it - C.F. 81009280215 - ©