US LA VAL
 
 
     
 

Spareggi - La Val cuntra Montan

Stampa PDF

IMG_5638

In sabeda ai 14 de jügn él gnü sughé a Vahrn la partida de dezijiun danter la scuadra ladina da La Val y la scuadra da Montan. Le pest por la devënta de chësta partida é la promoziun de 2ª categoria.

 

 

 

 

A la scuadra da La Val ne ti gareta nia le salt inant y mëss ti lascè le post al’aversar, che à la miù sön la scuadra ladina por 2 a 1. A dì l’ultima parora sce La Val restarà definitivamënter te 3ª categoria é la partida da in mercui por le terzo y cuarto post, che pudarà ester dezisiva.

Al é stè la finala de Copa Provinzia a determiné les partides de dezijiun por jì sö te categoria. Dô le titul, davagné dal “Ritten Sport”, él gnü sughé 2 partides sëcies, trames la sabeda domisdé. Les döes scaudres che à consuisté l’ azes ala categoria dessura é le Montan y le Laugen (che à davagné cuntra le Ritten ai önescmetri). La determinaziun y la convinziun de podëi stlü jö bun chësc bel campionat, un di miûs disputà cina sëgn por La Val, ne à mancé dessigü nia. N grüm de sostenidûs é rovà adalerch a ti fa da cornisc ala partida y a motivé ciamò deplö i sogadûs. Ince sce la scuadra é bel atira jüda sot de dui goi, an udü na bela prestaziun, cîs tla secunda pêrt dla partida, daulache al é gnü mostrè n gran jüch offensiv y na gran grinta a recuperè.

I sogadûs da La Val é atira da mët man dla partida dër compać y ne lascia nia passè saurì l’aversar, Ia luzidité ne sgara nia y la posiziun  te ciamp vëgn tignida bun. Al ne passà nia tröp tëmp che Emanuel D. à na gran ocajiun. Sön n retropasaje de n defensur aversar a sò portier, ti röia le pal bel sön le pé a Emanuel, mo imped de trà prôl a driblé le defensur che é bun de le tignì sö al ultim momënt. Atira dedô é spo la scuadra ladina che mëss subì le pröm gol. Sön na rebatüda dl verdaporta aversar, rimbalza le pal sura la defenjiun fora y ti röia avisa al atacant, che cun n bel palonët sura Lukas E. fora fej balè la rëi. 1 a 0 por le Montan. Ince l’ arbiter fej süa pert y sciüra de vigni sort de fai inventà cuntra la scuadra da La Val. Chësc influenzëia dër la partida, La nervosité se fej atira sintì pro I sogadûs y la calma ne vëgn nia plö tignida sot a control. Le gol dl 2 a 0 toma püch dô, te area é n atacant che ciafa le pal y n defensur da La Val pro de ne ti fa nia udëi la porta. Chësc se sciüra ia por tera y le arbiter sënza punsè sura sciüra atira le önescmetri, che vëgn trasformé tl gol. N önescmetri dër tl dübe, che l‘ arbiter ess podü se sparagné.

Sëgn mëss i sogadûs trà fora düt por remuntè le resultat, le alenadù Floriani fej ince val modaziuns tla formaziun por passè a n modulo plö offensiv  a chirì atira le pröm gol. Sciode che al mancia ma plö püch ala fin dl pröm tëmp y tröp ne suzedl nia plö.


Le arbiter sciüra la fin dl pröm tëmp che se stlüj jö sön le 2 a 0 por le Montan .


Le secundo tëmp é dessigü stè plö rich de aziuns y de ”suspense” por le publich. Ti pröms 10 menüć é la partida dër ecuilibrada y al vëgn ciarè de sughé tröp cun le pal bâs y de costruì val aziuns. Na bela ocajiun ti gareta spo a Alexander M., apëna rove te ćiamp a rafforzè l’atach ladin. Dorigo é bun de ti dè jö n bel pal bâs al limit, mo la trata de Alexander röia sura porta fora. Ince le Montan devënta indô prigorûs dan la porta de Lukas E.. Cun sües uscite sogüdes röia três le verdaporta denant a antizipé l’aversar.

A segné le pröm gol pënsa Alex E., sön na bela aziun abinel le pal al limit tl’area y cun na bela trata dlungia le palo it ti dal indô speranza ala scuadra. Dô le gol vëgn I ritmi detà dai ladins, cun de bì pasaji röi plö iadi a contlujiun y mët a düra prôa la defenjiun dl Montan. Te chësc momënt é Marco C. che subësc n burt contrast cun n aversar. Da jì sö de će se ciafel n comedun che ti procurëia n tâi sura l’ edl, le jüch vëgn archité y le medemo mëss por na sigüda gnì portè demez cun la crusc blancia. A Marco ti vara indô bun y al sla cava cun val punt y n edl brüm. Chësc episode à n pü rot le druch y le bel jüch dla scuadra da La Val. Le arbiter fej proseguì la partida y i sogadûs ciara ciamò cun trates fora dl’area de arjunj la parité. Al mancia ma plö püć menüć ala fin y al é ciamò le Montan che ciafa n önescmetri, n atacant vegn rusedè tl’area. La trata vëgn architada sö cun na gran parada de Luki. Do chësc ultim episode ne é i sogadûs nia plö bugn de odëi la porta. Le arbiter sciüra la fin y i sogadûs mëss lascè le ćiamp maledët da Vahrn sön le resultat dl 2 a 1. Por se consolè pon sughé ciamò in mercui por le terzo post y sperè che al sides ciamò n post lëde por ji sö.


Formaziun titolara: Lukas Eder, Marco Castlunger, Paolo Vallazza, Alex Alton, Elmar Valentin, Stefan Sottara, Max Nagler, Alex Elzenbaumer, Romeo Rubatscher, Micky Frenes y Emanuel Dorigo.

Alenadù: Floriani Claudio

 

 

Insëra, mercui ai 23 de aurì él gnü sughé l’andata dla semifinala de Copa Provinzia cuntra la scuadra da Ritten, che süga le campionat três te 3 categoria mo te n ater girone. La scuadra da La Val à incuntè na scuadra sterscia, che à lascè udëi sües cualitês portan a ciasa la devënta por 2 a 0. Ai 7 de mà gnaral sughé le ritorno sön le ćiamp dl Ritten.

 

Sponsoren

logo_M2_Srl posta raika1.plata seve decor1.plata Logo_moritz_01 patrick1.plata helmut1.plata ploner1.plata

Login



      Uniun Sport Amatoriala La Val, San Senese 1, I-39030 La Val
      info@uslaval.it - C.F. 81009280215 - ©