US LA VAL
 
 
     
 

8ª partida de campionat - Mühlwald

Stampa PDF

foto_scuadra

N bun punt à i ghesć ladins condüt a ćiasa l’ultima sabeda. La Val s’à indormedì ia le pröm tëmp, mo à spo mostrè carater y determinaziun a avalié le resultat.

 




Tignì le comane a će de tlassamënt se fej intres plö rî, mo n punt é miù co degügn. Bele la sabeda s’à i śogadus ladins metü sön trù por jì a Uttenheim a se mosorè cun le Mühlwald. Decuntra s’à la formaziun de Floriani bele stentè de Copa Provinzia y porchël esun cosciënć che al ne se trata nia de na spazirada .

Por La Val mët man mal la partida, deperpo che i pustri se mostra atira plö stersc y plö aggresifs, insciö i garetera bele al 19^ le gol dl vantaje. Le śogadù a mezćiamp arlungia le palê al atacant Oberhuber che prô le palonët al verdaporta Julian. Chësc ti gareta y insciö se porta le Mühlwald sön le 1 a 0. Sön le gol mantëgn i śogadus ladins i nerfs y reagësc atira cun na gran ocajiun. Stefan  prolungiëia le palê sön la fascia de Alex E., chësc se infiltrëia tla defenjiun aversara y subësc n fal te area de straufunga. Le mandl fosch mostrà sön le punt di önescmetri sënza śighité. Le rigorist Michi se presentëia sön le punt, mo ala trata é le verdaporta bun de individué la direziun y rebat le palê fora de porta. Atres ocajiuns da gol ne é tl pröm tëmp nia da alzè fora.


La reaziun da pert dla scuadra ladina tla pröma mesora tla secunda fraziun é ejemplara. I śogadus a mezćiamp adüm ai atacanć ciafa crëta de sè instësc y da dant le ritm de jüch. L’atach ladin se fej intres plö prigorûs cun de vigni sort de inserimënć. Sön na crossada de Michi abina Stefan le palê al jôre mo le splundra sura porta fora. Püch dô sön na rebatüda dl verdaporta ne röia Michi nia a dert’ora sön le palê che vëgn ćiamò desfantè dal defensur puster al’ultim mumënt. An mëss porchël aspetè al 69^ por udëi la realisaziun dl pêr: Al limit dl’area vëgn la trata de Stefan rebatüda dal mür defensif, al dërt post é Alex E. che ciafa le palê sön le pé y cun na bela trata sön le pé lunch de porta ne à le portier degüna poscibilité a parè. Le resultat é avalié mo sëgn é la formaziun dl Mühlwald che se descëda. Prigorosa é la crossada al 80^, daulache le palê passa bel plan ia la linea de porta, por fortüna ne röia le atacant puster nia a apogè la cogura te sach. Ti ultims menüć se fej la nervosité te ćiamp inće udëi, influenzada dai scrai dl publich y dales incomprenjiuns dl arbiter, che ti fej perd la luzidité y les ultims forzes ai śogadus. Sön vigni palê vëgnel impò ćiamò combatü por chirì le vantaje mo le resultat ne müda impone nia.


Le pêr ti va bun a trames scuadres y an pò ester cuntënć de avëi remuntè le resultat. Insciö se fej le comane a će de tlassamënt do la setima partida de campionat tres plö rî.



Formaziun La Val:

1. Julian Moling, 2. Elmar Valentin, 3. Marco Castlunger, 4. Paolo Vallazza, 5. Egon Frenes , 6. Freddy Sottara, 7. Michi Frenes, 8. Max Nagler, 9. Manuel Stampfer, 10. Stefan Sottara – capitan 11. Alex Elzenbaumer

 


Alenadù: Claudio Floriani


Proscima partida: en domënia te ćiasa a La Val dales 14.30 cuntra le Gais.



Sostituziuns:

 

Felix Nagler gnü ite imped Max Nagler (45^ menüt)

Adrian Miribung gnü ite imped Manuel Stampfer (45^ menüt)

Alexander Miribung gnü ite imped Egon Frenes (75^ menüt)


Resultać dles atres partides: RESULTAĆ

 

Insëra, mercui ai 23 de aurì él gnü sughé l’andata dla semifinala de Copa Provinzia cuntra la scuadra da Ritten, che süga le campionat três te 3 categoria mo te n ater girone. La scuadra da La Val à incuntè na scuadra sterscia, che à lascè udëi sües cualitês portan a ciasa la devënta por 2 a 0. Ai 7 de mà gnaral sughé le ritorno sön le ćiamp dl Ritten.

 

Sponsoren

logo_M2_Srl raiffeisen miribung seve decor auto_vallazza Frenes_Patrick Plana_Ladina

Login



      Uniun Sport Amatoriala La Val, San Senese 1, I-39030 La Val
      info@uslaval.it - C.F. 81009280215 - ©