US LA VAL
 
 
     
 

6ª partida de campionat - Aicha

Stampa PDF
_Q1B6810

Do döes partides debles se lascia La Val ince tó dal’Aicha i trëi punc y toma insciö zeruch te na posiziun de tlassifica.

 


 



N bela domënia cun na temperatöra da d’isté i á fat da cornisc ala sesta partida de campionat de retüda. Sön le papier é le Aicha cotan plö zeruch co La Val, mo sön le ciamp á chësta scuadra desmostré le contrar. Plö iadi é La Val msü sughé sot la direziun de n arbiter jonn, ince in chësc iade ara msü se confronté cun dezijiuns influenzades dai scrai di sogadus y da n gran cajin da pert dl mandl fosch.

La alenadú racomanëia ai sogadus de partí ite bun les forzes y de ne perd nia la luzidité, ince sce le vantaje ne dess nia atira gnì arjunt. Atira é i patruns de ciasa che mëss fa i cunc cun val infiltraziuns dl atach aversar, por fortüna nia prigoroses. Cun en modul de jüch plö ofensif se alza sëgn la scuadra ladina a porvé cun Alex y Michi de ruvé da na pert jö a preparé la cogura amez, val iade garetera ince, mo la spizurada ne é scialdi nia dezisiva.

Ala mesora vëgn le grop slié, la cogura arlungiada al atacant aversar vëgn controlada tl’aria de straufunga, le defensur da La Val é bun de intervení mo te n gran cajin röia ciamó le atacant cun na ciumpedada sura les giames dl defensur fora y l’arbiter ne sighita nia, al mostra sön le punt di önescmetri sënza ascuté sö les retlamaziuns. Le sogadú Heidenberger se prejentëia ala trata che ti gareta spo. Bel plan se desceda ince le indo le bel jüch di ladins, cun druch y ince de beles combinaziuns vëgnel porvé de chirì le pêr, le palé vëgn scialdi preparé al limit por les trates sëces de Michi y Max Nagler, indere nia prigoroses por le portier.


Le pröm temp se röia sön le 1 a 0 por la scuadra da Aicha.


Plö interessanta é la secunda pert dla partida, caraterisada di pröms vint menüc da na gran presciun di ladins, sënza indere ester bugn de spizuré la palé te sach aversar. I aversars ne vëiga te chësc tëmp nia la porta ladina y mëss se sotmët al druch fina che al ti gareta spo le radopl dl resultat. Protagonist é chiló le arbiter, che vëgn indô influenzé a sciuré n fal püch fora dl sëdesc sënza avëi udü le sozedü y ti mostra ciamó la cherta ghela a Max N., impormó do avëi aldí i scrai dl sogadú  a tera. Le abiter confus dles retlamaziuns fej trà la puniziun. La trata strinada al 61ejim fej inciurní sides la defenjiun che le portier Sepl, che ne valutëia nia la direziun dërta y mëss ti ciaré dô ala cogura, ormaia te sach. Le radopl ti taia les giames ai sogadus de ciasa che pro de inserí atri sogadus frësc  a raforzé l’atach. Alex E. röia sön na crossada püc metri dan porta a porvé la trata, le palé vëgn indere splundré sura le publich fora. I ultims diesc menüc é le scenar de jüch che se sposta ma plö tl mezciamp aversar, cun vigne meso prô i sogadus de chirí almanco le gol dla bandira, indere sënza resulat. Le arbiter conzed atri cinch menüc de recuper y sciüra spo la fin. Na pordüda antia por La Val, che se fej sciampé dant dal Sest y toma insciö zeruch al terzo post de tlassifica.


La Val  – Aicha  0 - 2


Formaziun La Val: 1. Sepl Kantioler, 2. Elmar Valentin, 3. Luca Pescollderungg (dal 70^ Egon Frenes), 4. Paolo Vallazza, 5. Marco Castlunger, 6. Freddy Sottara  (dal 75^ Felix Nagler), 7. Michi Frenes, 8. Max Nagler, 9. Alexander Miribung, 10. Stefan Sottara - capitan , 11. Alex Elzenbaumer


Proscima partida: en domënia ai 26 de aurì dales 16.00 a San Martin por le derby ladin

 

Altherren: Na bela sodesfaziun é la scuadra di Altherren che nes scinca, le bun scomenciamënt dl campionat de retüda i à porté la secunda deventa, cuntra le Dietenheim él jü fora le resultat sön le 2 a 0. Segné à  le capitan Alton Alex al 34ejim y Verginer Franzi al 70ejim!


Resultać dles atres partides: RESULTAĆ


Insëra, mercui ai 23 de aurì él gnü sughé l’andata dla semifinala de Copa Provinzia cuntra la scuadra da Ritten, che süga le campionat três te 3 categoria mo te n ater girone. La scuadra da La Val à incuntè na scuadra sterscia, che à lascè udëi sües cualitês portan a ciasa la devënta por 2 a 0. Ai 7 de mà gnaral sughé le ritorno sön le ćiamp dl Ritten.

 

Sponsoren

logo_M2_Srl raiffeisen miribung seve decor auto_vallazza Frenes_Patrick Plana_Ladina

Login



      Uniun Sport Amatoriala La Val, San Senese 1, I-39030 La Val
      info@uslaval.it - C.F. 81009280215 - ©