US LA VAL
 
 
     
 

10ª partida de campionat - Raas

Stampa PDF
11267317_10205365743715731_2119019186_n

La Val fej le jüch cun de bunes ocajiuns mo é püch determinanta dan porta y se stënta da signé. Le impëgn vëgn impó premié cun i trëi punc.


Sön la plaza dl sport “Plans” a La Val s’á mosoré l’ultim fin dl’edma la formaziun de ciasa cuntra chëra dl Raas, atualmënter al’ultim post de tlassifica. Na partida acompagnada da n gran cialt y na devënta asuiada, purmó metüda al sigü ala fin. Trëi scuadres, de chëstes ince La Val, se bat sëgn pro l’ultima de campionat por le secundo post, che ó dì partides de dezijiun.

I ladins scomëncia bun, bel do val menüc é le sogadú a mezciamp Max che à sön le pé le palé dl vantaje. Sön aziun se fej chesc lerch al limit y pro la trata basa che passa püch dlungia porta ia. Al ne passa tröp che n bel preparatif da pert de Michi amez por le compagn Max ne vëgn nia anuzé sciöch al toca y da püc metri dan porta röia le palé svirgolé dlungia ia. Ince sce le jüch é tles mans di padruns de ciasa, é le curan scialdi tl’aria, insciö anüza bun la defenjiun aversara la tënora dl forajüch, che ti gareta ince. Al 24^ le vantaje di ladins, sön na passaja filtranta de Stefan, röia le nü Alexander M. sú dan le portier y vega la trata sön le pé lunch che ti gareta por le 1 a 0.

Püch dô é Max che se refesc, al röia da na pert cuntra porta y bel sú ti gareta la trata sot la stangia ite. Le radopl é arjunt y sce la formaziun de ciasa tëgn inant le ritm messass garate ciamó val gol laprò. La presciun vëgn tres plö debla y por val indezijiun di sogadus de ciasa ti gareta ince al Raas val ocajiun. Dezisif é le rifles dl’atacant Carminati al 35^, sön na trata de puniziun ti sciampa le curan fora dles mans a Sepl y ti röia sön le pé al asvelt sogadú dl Raas che à ma plö bria dl’ apogé te porta. Na saíta dan le pröm tëmp che ti fej derzé les antënes ai ladins.


L pröm tëmp se stlüj jö sön le 2 a 1 por la scuadra de ciasa


Por La Val ól ester val marcia en plö co le pröm tëmp, les aspetatives de jüch ne é  daldöt nia gnüdes respetades. Les intenziuns por le secundo tëmp é chëres de mët le plö snel poscibl le resultat al sigü, mo chësc gareta pormó plö inant. Le sorëdl lorënt ti tôl forzes ai sogadus che ne garantësc nia plö presciun alta, sön les aziuns de cuntrapé se prejentëia scialdi i atacanc müs a müs cun le mür defensif y ne ciaf nia sostëgn por rové a contlujiun. Cotan prigorus ne é le Raas impone nia, val palé arlungé te aria vëgn archité sigü dal numer un ladin. Da alzé fora na rebatüda de ce de Michi sön trata de ciantun amez le secundo tëmp, le portier se stira a devié te ciantun. Al 70^ toma finalmënter le gol tan chirí. Sön n’aziun de cuntrapé vëgn Michi sorví cun na passaja da pert de Max, le atacant röia müs a müs cun le portier y ti sciampa dlungia ia por apogé le curan te porta.

I sogadus plö stanc vëgn sostituîs cun forzes frësches por tigní le resultat. Chësc porta bun y i nonanta menüc va a piz. Cun plö determinaziun ess le resultat ciaré fora atramënter, cun val gol inplö.


La Val - Raas : 3 - 1


Formaziun La Val: 1. Sepl Kantioler, 2. Elmar Valentin, 3. Egon Frenes, 4. Paolo Vallazza, 5. Marco Castlunger, 6. Freddy Sottara (dal 85^ Martin Ploner), 7. Alexander Miribung (dal 85^ Andreas Miribung), 8. Stefan Sottara - capitan, 9. Michi Frenes,10. Max Nagler (dal 70^ Felix Nagler), 11. Alex Elzenbaumer

Goi por La Val: Alexander Miribung (al 24^), Max Nagler (al 27^), Frenes Michael (al 68^)

 

Proscima partida: en domënia ai 24 de mà dales 16:00 a Sest cuntra la scuadra de ciasa 

 

Resultać dles atres partides: RESULTAĆ


Insëra, mercui ai 23 de aurì él gnü sughé l’andata dla semifinala de Copa Provinzia cuntra la scuadra da Ritten, che süga le campionat três te 3 categoria mo te n ater girone. La scuadra da La Val à incuntè na scuadra sterscia, che à lascè udëi sües cualitês portan a ciasa la devënta por 2 a 0. Ai 7 de mà gnaral sughé le ritorno sön le ćiamp dl Ritten.

 

Sponsoren

logo_M2_Srl raiffeisen miribung seve decor auto_vallazza Frenes_Patrick Plana_Ladina

Login



      Uniun Sport Amatoriala La Val, San Senese 1, I-39030 La Val
      info@uslaval.it - C.F. 81009280215 - ©