US LA VAL
 
 
     
 

9ª partida de campionat - Mühlwald

Stampa PDF
partida_Mhlwald

La Val mëss se sotmët a na direziun arbitrala da spavënt debla y mëss ince lascé le ciamp cun nü sogadus


 

 

 

 

La partida cuntra le Mühlwald é tres stada dër aspetada por i ladins, che incunta y se mosöra intres cun na scuadra che bataliëia cina l'ultim por la devënta. Insciö é ince stada la partida dl'ultim fin dl'edma, rica d'ocajiuns y combatüda cina le sciür dla fin. Gran protagonist é sté l'arbiter jonn Mölgg, che á pité na prestaziun eclatanta y ti á tut de plëgn la poscibilité a remunté le resultat ai ladins.

Pro la defenjiun vëgnel bel dal mëteman aporté na mudaziun, a gauja de n infortüne de Marco C. dl’ultima dumënia, mëss chësc gní sostituí cun Werner che é chít bel da plö edemes cuntra na strata ala cössa. Ince sce i  ghesc ladins röia indurmedîs te ciamp, é la prüma ocajiun chëra de Stefan: sorví da Michele al limit veghel na trata sëcia cuntra porta che röia indere sön le pé bass. Atira dô é le ot dl Mühlwald che pëia jö por na pêrt y ti sciampa a dui defensurs por sorví le cumpagn amez, la trata te porta porta le vantaje. Al ne passa nia tröp che l'arbiter conzed n önescmetri nia motivé, le diretur á udü n fal de man daldöt nia esistënt, la trata é alta y le tiradú ne atoca nia la porta. La Val respogn y avaliëia atira dô le resultat, na passaja filtranta de Freddy fej ruvé Alex dan le portier che trasformëia la trata por le 1 a 1. Inant fej La Val druch, mo vëgn archité plö iadi dal arbiter por posiziuns de forajüch nia esistëntes, le medemo mët ince man de trá fora le tacuin y partësc fora plö chertes gheles. Al 30^ castighëia ciamó n iad le sterch Oberhuber sön puniziun: la crossada amez fej alzé le atacant che rebat le curan de ce tl'incrujiada de porta. Sënza ruvé da esulté se prejentëia Alex dan le portier é prô le palonët che ti gareta ince mo vëgn desfantë sön la linea de porta dal defensur aversar. Le terzo y ultim gol de chësc dé toma al al 35^, sön n palé arlungé vëgn chësc devié de ce a mezciamp y l’asvelt Gasser anuzëia la posiziun massa inant dla defenjiun por ti sciampé y salté cuntra porta por la trata bassa sön le pé lunch.


Le pröm temp se röia sön le resultat de 3 a 1 por i padruns de ciasa, le Mühlwald!


La Val röia te ciamp cun n ater spirit y se tôl zeruch la partida tles mans, tosc vëgn le bun momënt archité dal mandl fosch, chësc ultim perd daldöt le control dla direziun y partësc fora gheles y cöcenes por fai scëmpli. Adrian, ataché da dui aversars toma a tera y vëgn desgort dal ciamp por dopla amoniziun. Al ne passa tröp che Freddy vëgn inc condüt sot la duscia por dopla amoniziun por n fal daldöt nia grô.  A protesté é düta la scuadra adöm al gran publich ladin rové adalerch, nia da nen fá, l’arbiter Mölgg tëgn la süa y ne motivëia nia sües dezijiuns. Cun nü sogadús te ciamp rischiëia i ladins ciamó de rové pro porta. Alex se fej lerch da na pert y mët n bel palé amez, i atacanc ne röia indere nia a tra te porta. La Val tëgn inant le sceter dl jüch tla man, les ripartënzes dl Mühlwald vëgn scialdi architades dala defenjiun. Ince sce le jüch ladin é miú cun manco sogadus tl secundo tëmp, mëssi ti la zede ai aversars pustri che á defenü bun le vantaje mirité dl prüm tëmp. Insciö sciüra le diretur la fin dla partida sot i scrai dl publich y les protestes te ciamp. Al foss sté na partida saurida da arbitré, mo cun tan de gheles por fai da nia y na direziun nia iüsta ti cunfrunc di ghesc, al fat gnì düc i sogadus nervusc y malsigüsc.


Mühlwald – La Val : 3 - 1

Formaziun La Val: 1. Sepl Kantioler, 2. Egon Frenes (dal 65^Felix Nagler), 3. Luca Pescollderung 4. Paolo Vallazza, 5. Werner Sottara (dal 10^ Max Nagler), 6. Freddy Sottara, 7. Alex Elzenbaumer, 8. Christian Dapoz (dal 45^ Franz Tolpeit), 9. Adrian Miribung, 10. Stefan Sottara - capitan, 11. Michele Campei (dal 45^ Marco Sottara)


Alenadù: Floriani Claudio

Gol por La Val: Alex Elzenbaumer al 25^

Proscima partida:

La Val süga en sabeda ai 31 de otober dales 14:30 a La Val cuntra le Vierschach

 

Insëra, mercui ai 23 de aurì él gnü sughé l’andata dla semifinala de Copa Provinzia cuntra la scuadra da Ritten, che süga le campionat três te 3 categoria mo te n ater girone. La scuadra da La Val à incuntè na scuadra sterscia, che à lascè udëi sües cualitês portan a ciasa la devënta por 2 a 0. Ai 7 de mà gnaral sughé le ritorno sön le ćiamp dl Ritten.

 

Sponsoren

logo_M2_Srl raiffeisen miribung seve decor auto_vallazza Frenes_Patrick Plana_Ladina

Login



      Uniun Sport Amatoriala La Val, San Senese 1, I-39030 La Val
      info@uslaval.it - C.F. 81009280215 - ©