US LA VAL
 
 
     
 

Copa Provinzia 2˚ turno - retüda cuntra Raas

Stampa PDF
copa2012

La Val paregëia 2 a 2 te Copa Provinzia cuntra le Raas, scuadra batüda al’andata por 2 a 0. Insciö passa la scuadra ladina le secundo turno.






La partida che ess messü gni sugada la sabeda é gnüda spustada sön damana di aversars al vëindres sëra, tres sön le ciamp tl biotop a Raas. Da recordè che La Val á bel sughé la dumënia denant te campionat a Raas, ulach ara á condüt a ciasa un en punt sù. I ghesc pëia ia cun n pice vantaje, do avëi batü le Raas te ciasa al’andata por 2 a 0, mo l’arbiter ostacolëia dassën la gestiun de chësc resultat.

Na partida rica de ocajiuns, jüch y combatüda cina la fin. Jun daimprò ia. Cun le sciür dl’arbiter mët man i aversar cun en gran druch y davagna bel dô püc menüc n önescmetri sön n fal dassën tl dübe. La trata vëgn trasformada por le 1 a 0. Bele cun chësta “scincunda” mët La Val le resultat tl prigo. Püch dô é ince i ladins che se fej udëi, Alex vëgn sorví cun n palê alt y prô le palonët sura le portier fora, trata che ti fej indere le pulan al pé de porta. Le Raas, sterch sön les situaziuns standard, rebat al 20^ le palê cuntra l’incrujiada de porta sön na trata dal ciantun. Tla proscima chert’ora tëgn La Val n ritm alt y fej rode bun le curan, al é indere le mandl fosch che sciüra trëi posiziuns de forajüch daldöt inesistëntes y fej pié ia n gran cajin te ciamp. Al 30^ vëgn la defenjiun de ciasa taiada fora cun n palê arlungé sön Alex E. che ti sciampa y röia sú cuntra le portier, la trata bassa sön le pé de porta lunch avaliëia le resultat.

Atres gran ocajiuns ne é nia da udëi y le arbiter sciüra le pröm tëmp sön le resultat de 1 a 1.

I ghesc ladins prô de tigní inant le sceter dl jüch tla man mo mëss bel til surandé ai aversars al scomenciamënt dla secunda pert. Al ne passa tröp che na trata de puniziun fej alzé l’atacant che rebat sëch le palê naota tla stangia de porta y spot la rëi. 2 a 1  y le Raas ciafa indô plö coraje. Tosc vëgn desgort dal ciamp Max Nagler adüm a n sogadú dl Raas, degügn ne capësc ciudí che le sogadú ladin mëss lascé le ciamp dô ester gnü contrasté dal aversar. Le arbiter ne dá degüna motivaziun y les protestes ne jô a nia. Al 60^ vëgn indo le resultat avalié da Alex: le medemo vëgn sorví da Franz y dal piz de area veghel na trata sëcia sura le portier ite, en bel gol che alisirëia la tenjiun te ciamp. Le druch dl Raas se destüda ince bel plan y al é la formaziun ladina che se alza y davagna n grüm de pai. Gran ocajiun é indô Alex che á, Franz consuistëia n bel palê a mezciamp y fej ruvé Alex dan porta cun na passaja filtranta, sú dan le portier prôl la trata che röia indere dlungia ia. Al ne passa nia tröp che Stefan prô na trata dal limit, chësta vëgn deviada dal defensur y röia sön le pé de Felix, al momënt amesa area, na trata sëcia ne abina indere nia le sach. Le arbiter fej spo tosc ruvé la partida. Le resultat é iüst, ince sce La Val ess mirité la deventa. Impó passa i ladins ai cuarc de finala che gnará sugá dan le scomanciamënt dla sajun de retüda. Cun chësta partida se stlüj ia definitvamënter la sajun da d’altonn por la terza categoria. Ringrazié vëgnel dandadöt i sostenidûs tres presënc, che da na gran forza ai ünesc te ciamp! A s’udëi d’aisciüda.

Raas – La Val : 2 - 2

Formaziun La Val: 1. Julian Moling, 2. Andreas Miribung (dal 70^ Egon Frenes), 3. Luca Pescollderung 4. Paolo Vallazza, 5. Ploner Martin, 6. Max Nagler, 7. Felix Nagler, 8. Stefan Sottara - capitan, 9. Franz Tolpeit (dal 75^ Alexander Miribung), 10. Alex Elzenbaumer, 11. Michele Campei (dal 75^ Christian Dapoz)

Goi por La Val: Alex Elzenbaumer al 20^ y 60^

Alenadù: Floriani Claudio

 

Insëra, mercui ai 23 de aurì él gnü sughé l’andata dla semifinala de Copa Provinzia cuntra la scuadra da Ritten, che süga le campionat três te 3 categoria mo te n ater girone. La scuadra da La Val à incuntè na scuadra sterscia, che à lascè udëi sües cualitês portan a ciasa la devënta por 2 a 0. Ai 7 de mà gnaral sughé le ritorno sön le ćiamp dl Ritten.

 

Sponsoren

logo_M2_Srl raiffeisen miribung seve decor auto_vallazza Frenes_Patrick Plana_Ladina

Login



      Uniun Sport Amatoriala La Val, San Senese 1, I-39030 La Val
      info@uslaval.it - C.F. 81009280215 - ©