NQ Lungiarü - 27.12.2015
L' ultim fin dl'edema é la sajun di liöstri piada ia cun la pröma competiziun a Lungiarü
Ince in chësc ann é la scuadra dla lüsa da La Val arjignada a se mosoré adüm ai atri atleć pro les competiziuns desvalies che gnarà tignides fora por i mëisc de jenà, forà y merz. Rich é le program preodü por chësta nöia sajun, sciöche la gara por i campionac mondiai che gnará tignis a Oberperfuss tl'Austria. La pröma competiziun por la cualificaziun ala nazionala de lüsa alta y bassa á daurí la sajun dla lüsa. Plö avisa é chësta competiziun gnüda organisada l'ultim fin dl'edma da pert dl'uniun dl sport La Val y tignida sön la bela pista "Do Juvel" a Lungiarü.
I protagonisc é sta i atlec de lüsa bassa, che á garejé por la cualificaziun ala nazionala, l'atlet talenté Florian Clara á fat le bun cuarto plazamënt tla categoria senior, ruvan al travert püch do Patrick Pigneter. I dui cumpagns fej spo gran parüda dl dopl mostran sö le miú tëmp.
I atlec ladins de lüsa alta pó ciaré zoruch a n fin dl'edema cun de bugn resultac, dal mëteman cun i plö jogn, che crësc asvelc y fej les pröms esperiënzes pro les competiziuns. A fa só prüm debut pro les gares de lüsa alta é in chësc ann i cater atlec jogn da La Val Serafini Lorenzo, Serafini Daniele, Campei Marco y Peccei Lukas, che garejeia tla categoria di alievs.Le pröm di pröms posc ladins vëgn arjunt dala jona Manuela Rubatscher dla categoria dles aspirantes. Pro la categoria master B é l’atlet da La Val Miribung Carlo che röia sön le scalin plö alt podon mostré sö le secundo miú tëmp dl dé. Le medemo plazamënt é ince le atlet dla scuadra da Lungiarü Clara Matteo tla categoria Senior che fej, mostran le miú tëmp dl dé sön lüsa alta, tla medema categoria arjunj Florian Rubatscher le setim post. Te chësc dé söi liöstri é ciamó da alzé fora les döes medaies de brom por Alex Ploner tla categoria aspiranc y Knollseisen Kurt tla categoria master A. Tla categoria master B1 arjunj ciamó Alton Anton le 5° post y Tavella Robert le 6° post. Nia da desmentié é le secundo plazamënt de Shamira Brunner tla categoria Senior, che garejëia in chësc ann por la scuadra da La Val.L’atlet y alenadù da La Val Diego Tschaffert s’à dediché adüm a Merch Vallazza y Miribung Carlo por l'organisaziun y le garaté dl’evënt. A Clara Matteo i val en rengraziamënt por avëi arjigné ca na pista te condiziuns otimales por la gara. A düc i volontars che s'á tut dlaurela por de na man a fa garaté le dé i val n gran giulan, ai atlec les mius aodanzes por na buna sajun plëna de sodesfaziuns.
I atri resultać y plazamënć dla gara ciafen chilò: risultati
Por deplö informaziuns, por ci che reverda resultać, novitês y le program dla lüsa pon vijité la plata internet sot a chësc linch: http://www.sportrodel.it/
 |
 |
 |
 |
|
 |
 |
 |
|
 |
 |
 |
 |
Por atres foto: Dropbox
