US LA VAL
 
 
     
 

Reuniun generala 2016

Stampa PDF

Immagine

L’Uniun Sport Amatoriala à tigni le vëndres ai 18 de merz süa reuniun generala anuala. La reuniun generala é stada na ocajiun por ćiarè zoruch al’ativité dl ann 2015 y por portè dant le program preodü por l’ann corënt.

 

 



Le presidënt Alex Alton á danfora saludé l’Ombolt y i mëmbri che à tut pert ala reuniun por passè spo a traté l’ordin  dla sëra. Ala fin dl ann passé pò la uniun mostrè sö 181 scric ite. Le scrivan dl’uniun Marco Castlunger é spo passé a la letüra dl protocol dl'ultima sentada, che é gnü aprové cun alzada de man.

An é spo passá al cunt consuntîf 2015 y al bilanz de previjiun, gnüs aprová al’unanimité cun alzada de man. Al é gnü ciaré zeruch al’ ativité dl ultim ann, vigni caposeziun é riferí  sön l’ativité, i resultac arjunc y le program tl dagnì. La seziun cun la maiú ativité é indô chëra dl jüch dl palé.  Le caposeziun Micki Frenes é fat na picia introduziun y á tigní na picia relaziun sön i resultac y ativité dles 7 scuadres dl palé ulache al tôö üert sogadus da La Val. N gran giulan ti va ai responsabli y geniturs por só gran laûr, che se crüzia de alené y acompagné i mituns a les partides. L'ativité cun i mituns, che rapresentëia le dagnì dl'uniun é tres sté n punt prinzipal dl l'ativité sportiva a La Val, nia ma pro le jüch dl palé mo ince pro la seziun lüsa y l’ativité de arpizé, de conseguënza vëgnel dé gran pëis a chësc punt. A gauja de n interesc da pert de geniturs de mët sö na scuadra ciamó plö jona co l’U10, gnaral bunamënter metü sö na scuadra U8 le proscim ann. En punt d’importanza tl bilanz de previjiun é ince ste le bojëgn de arjigné en nü pulmin, por mené incërch le gran numer de mituns ai alenamënc y partides. A dütes les scuadres di campionać daulache al süga sogadus da La Val i vëgnel fat les miûs aodanzes por n bun campionat de retüda. Le tradizional torné de nöt 2015 é ince gnü menzioné, ruvé uramai a süa 17ma ediziun. Le scuadres scrites ite é te chësta ediziun stades 16 y le trofé é ruvé a Montan.

Na novité de chësc ultim ann é dessigü stada l’organisaziun dla prüma ediziun dl A.C. Chievo Verona Summer Camp, tignì amez messé a La Val. Grana é stada la partezipaziun cun plö de 70 mituns da vigni pert dla valada. L’iniziativa é garatada y porchël él bel fissé ince por l’isté 2016 la secunda ediziun dl Summer Camp.

Pro les ativitês desvalies él gnü portè dant da pêrt dla responsabla Monica Ploner i cursc organisá tartan l’ann 2015. Dër aprijá é gnüs i cursc por mituns organisé tl'ann 2015, danter i atri le curs de schi, da nudé y le program sportîf da d’isté. Düć i cursc é gnüs tignis y organisá en colaboraziun cun la Scora de Schi Dolomites, Simon Dapoz, Alex Verginer y Davide Moling. L’Uniun se cruziará sambëgn ince tl 2016 de ofrì cursc desvalies, de chisc ince en curs de ginastica arstistica por mitans,na odlada ciafen tla prejentaziun in injunta.

Pro la seziun dla lüsa él gnü porté dant i punć prinzipai dl’ativité. Responsabli dla seziun é Diego Tschaffert adüm a Carlo Miribung y Merch Vallazza. Sciöche prüm punt él gnü mostré les tutes nöies dla seziun, che é dessigü der garatades. Ince tla sajun 2015/16  pon indo mostré sö adüm a düta la seziun i bugn plazamënć di atleć dla scuadra da La Val. Punt saliënt dla sajun è dessigü sté le iade a Oberperfuss tl’Austria por i campionać mondiai. Gran valur ti él inće gnü dé ai atleć plö jogn che vëgn dô ca, ince i manco jogn à te chësta sajun pudü se mosoré cun atri atlec de düt le raiun. Por ultim él ciamó gnü baié sura les “Raika - Jugendrennen”, la competiziun de 5 gares, daulache 4 atlec plö jogn da La Val á tut pert y pó mostré sö de bugn plazamënc. N gran giulan ti va dal' atra pêrt ai organisadûs y ai acompagnadûs dla seziun, che cun só gran laûr y sostëgn dà dessigü n gran contribut a tignì alâlt le sport dla lüsa a La Val. La seziun lüsa, adüm al US Lungiarü tularà pert sciöche candidat por l’assegnaziun di campionac europeics tl 2019 sön la pista “Do Juvel” a Lungiarü. L’ultim fin dl’edma, ai 13 de merz è gnü organisé na gara de schi alpinism y lüsa sön Armentara, por recordé i jogn Alexander Ellecosta e Manuel Moling. La seziun dla lüsa s#à de da fa arjignan na pista dla lüsa sot la ütia “Ranch da André”, la gara de schi da tourn è gnüda tignida sön le trú tradizional Spëscia-Armentara.

Porté dant él ince gnü i laurs de manutenziun ala plaza sportiva ia n Plans. Tl 2014 él gnü cuncé y puzené le ciamp da jüch da pert de na dita spezialisada, chësc, por ciafé le renovamënt dl’omologaziun dl ćiamp por trëi agn, che é efetivamënter gnü aprové tl’ann 2015. Al mumënt ne ciarera nia fora bun cun le tractor, che é bel gnü aduré tröp y che al mumënt é rót, a chësta manîra saral da ciafé na soluziun. Les lüms incer la plaza dal palé ne gnarà nia plö omologades, porchël mëss ince chëstes gní cambiades. Le bar sport é ince gnü decoré danü, Egon Frenes à cruzié de ti dé nöia vita al bar. Atri laurs de manutenziun é gnüs fać incër le implant sportif.

Program 2016:

Le prüm punt sön le program 2016 é l’organisaziun dl A.C. Chievo-Verona Camp, che gnarà tignì indo amez le mëis de messé 2016. N ater punt sön le program é la cumpra de aparać de pröm aiüt por implanć sportifs. Por le 2016 él oblig de se arjigné n defibriladù por vigni implant, y de pité la formaziun ai responsabli, le termin por se mete en regola é gnü sposté ai 19 de messé 2016.

En punt important che é gnü presenté cun plajëi ai presënc ala reuniun é le “proiet” por la restruturaziun dla zona sportiva “Plans”. En grüm é stá i faturs y les gaujes che á porté a formé n grup de laur che se dará jö cun chësc proiet, cun le fin de presenté n concurs a idees, che darà la poscibilité ai architec de lauré fora les idees y de presenté süa proposta. La realisaziun de chësc proiet jarà a vantaje a deplö uniuns dl paisc da La Val, lapró ince l’intenziun de realisé na pista da la lüsa da Armentara cina jö dala zona sportiva. Le trú por concretisé le proiet ne é dessigü nia cürt y saurí, l’important è pié ia vare por vare.

Ala reuniun é inće sté presënt l'ombolt da La Val Angel Miribung, che à tignì n discurs sön l'ativité dla uniun y à alzè fora l' importanza dl'ativité sportiva. Al à ringrazié i funzionars dla uniun por le laûr y por le impëgn demostré te chësc ultim ann. I complimënć al fat deperpo a les scuadres dl palé y ai bugn resultać arjunć da pert di atlec dla lüsa. Al á ince injunté val parora al proiet dla restruturaziun dla zona sportiva che é bel gnü presenté al comun. Le presidënt à tut l'ocajiun por ringrazié le ombolt por le sostëgn finanziar che vëgn vigni ann conzedü da pêrt dl comun ala uniun.

Cun le discurs dl’ombolt s’à stlüt jö la reuniun anuala dl’Uniun dl Sport La Val, dedo é ciamó düć stà adüm pro val da mangé y da bëre. N bel giulan a düc i presënc y a proscim ann!


Por ciarè ala prejentaziun drüca sön le linch injuntè: prejentaziun

 

 

P1050254 P1050259


 

Sponsoren

logo_M2_Srl posta raika1.plata seve decor1.plata Logo_moritz_01 patrick1.plata helmut1.plata ploner1.plata

Login



      Uniun Sport Amatoriala La Val, San Senese 1, I-39030 La Val
      info@uslaval.it - C.F. 81009280215 - ©