US LA VAL
 
 
     
 

2ª partida de campionat rit. - Niederdorf

Stampa PDF

_MG_9684scuadra

En gol por La Val che toma amez le pröm tëmp y che mëss gnì defenü cina l'ultim menüt, rischian plö iade a ciafé le gol dla parité. Gran spordüda por le portier Sepl, che subësc n toc al ce y mëss gnì condüt demez cun la crusc blancia.





En le fin dl'edema de Pasca vëgn scialdi te düc i campionac sugá la sabeda santa, insciö ince por La Val, che á incunté le Niederdorf te ciasa por la secunda de campionat. Temperatüres d'aisciüda ti á fat da cornisc ala partida.

Ti prüms menüc dal mëteman é i aversars che tôl la partida tles mans, meton sot a druch la defensciun. Na trata de puniziun rebat sön la stangia de porta, chësc iade é i defensurs ladins plö asvelc a ruvé a trá demez le palé. Bel plan é I padruns de ciasa che se descëda y atira é Christian Dapoz che á sön le pé n'ocajiun d'or: Max se delibrëia da na pert jö y mët amez na gran crossada por le cumpagn Christian, che pro la trata al jore mo ne atoca nia bel le curan che ti sprinza dlungia ia. Ciamó é Alex che dal ciantun dl'area pro da giré le palé sön le pé lunch, la trata indere röia dlungia ia. Al vëgn le 23^ menüt, canche la defensciun arlungëia sön l'atacant Franz, chësc controlëia bun le palé al limit y cun le ciamp veghel le palonët cuntra porta che ti röia sura le portier ite, a Franz ti garetel insciö n beliscimo eurogol. I aversars davagna plö puniziuns al limit por fai che ne ess nia messü ester, les trates indere ne é nia prigoroses. Dan le sciür dl prüm tëmp manacia Paolo de radoplé le resulat. Sön na trata dal ciantun röia chësc sú a rebat de ce cuntra porta, le curan indere ti fej le pulan al pé de porta y röia fora.

N prüm tëmp che ess podü ruvé cun val gol deplö, i sogadus va te cabina por la palsa sön le 1-0 por i ladins.

N secundo tëmp atramënter co le prüm, cun manco intensité y agresivité, La Val se stlüj plöcoater zeruch a defënn. Ince sce la defensciun dl Niederdorf é plö descurida, ne ti gareta impone nia ai atacanc de taié fora y ruvé cuntra porta, trö massa iadi ne röia le ultim passaje nia a contlujiun.

Amez le secundo tëmp na gran spordüda por düc i presënc,  na trata cuntra le portier Sepl vëgn parada te dui tëmpc, atira pro ciamó l'atacant de tra te porta mo abina le ce de Sepl. Por nosc portier tumé ia por tera y gnü da nescia, vëgn atira dé le pröm aiüt y cherdé la crusc blancia, por gran fortüna é do val menüt Sepl indo pro ël instëss, por la sigüda vëgnl mené te spitol. Do che Sepl fej aldì indo süa usc se lascia jö la gran spordüda y le jüch pó proseguí por l'ultima chert d'ora. Sciöche tres segnëia chisc mumënc l'andamënt dla partida, i sogadus cun le pinsier pro Sepl é impó bugn de se sughé fora i ultims menüc. Al é Julian che tôl le post de Sepl, al defënn bun la porta, rovan a desfanté döes gran trates dl Niederdorf. Marco Castlunger é ciamó bun de antizipé n palé a püc metri dan porta, denant che l'atacant ruvass a apogé le curan te porta. Do trëi menüc de recuper fej l'arbiter ruvé i nonanta menüc. Do la partida pon aldí che a Sepl i vara miú, al s'la "cava" cun na comuziun zelebrala y n gran me de ce. A nosc Sepl ti auguruns che al röia indo zeruch sterch a defënn nosta porta!

La Val – Niederdorf: 1-0

Formaziun La Val: 1. Sepl Kantioler (dal 75^ Julian Moling), 2. Luca Pescollderung (dal 70^ Egon Frenes), 3. Marco Castlunger, 4. Paolo Vallazza, 5. Werner Sottara, 6. Max Nagler (dal 60^ Michele Campei), 7. Christian Dapoz (dal 65^ Marco Sottara), 8. Freddy Sottara, 9. Franz Tolpeit (dal 70^ Adrian Miribung), 10. Stefan Sottara - capitan , 11. Alex Elzenbaumer

Goi por La Val: Franz Tolpeit al 23^

Proscima partida: La Val süga süa proscima partida de campionat in dumënia ai 03 de aurì dales 16:00 a Dietenheim cuntra la scuadra de ciasa

 

 

Sponsoren

logo_M2_Srl posta raika1.plata seve decor1.plata Logo_moritz_01 patrick1.plata helmut1.plata ploner1.plata

Login



      Uniun Sport Amatoriala La Val, San Senese 1, I-39030 La Val
      info@uslaval.it - C.F. 81009280215 - ©