US LA VAL
 
 
     
 

8ª partida de campionat rit. - Gsiesertal

Stampa PDF

_MG_9684scuadra

Prestaziun nia da bravé cuntra i aversars dl Gsies, che anuzëia bun les püces ocajiuns y mët al sigü le resultat tl secundo tëmp.





Na pordüda antia chëra dl’ultim fin dl’edema ite a Gsies, ulache i patruns de ciasa lascia udëi superiorité por ci che reverda la determinaziun y l’agresivité. Ince sce i ghesc ladins se prejentëia cun en gröm de ocajiuns dan porta, mancel deplëgn la dezijiun da fa le gol, deperpo che i aversars rebat le palé te porta amez le secundo tëmp sön üna dles püces ocajiuns y se asigurëia insciö i trëi punc.

La partida mët man cun val menüt de retard, a gauja de na incomprensciun cun l’arbiter por ci che reverda l’orar de scomenciamënt. Atira dal mëteman anuzëia le Gsies la gran lerch amesa les lines dla formaziun ladina por fa le jüch y ruvé sënza gran dificoltes te area. Insciö toma ince la prüma gran ocajiun por le Gsies, le mezciamp aversar vëiga bun le defensur fora de posiziun y fej pié ia na passaja filtranta por l’atacant sú dan porta, por fortüna röia la trata de chësc dlungia porta ia.  La spordüda fej desdé i ladins, che é bugn de imposté val aziun cuntra porta, al 20^ vëgn le atacant Alexander sorví cun n palé alt y prô le palonët sura le portier fora che ne ti gareta indere nia. Ince val trata pëia ia dal limit cuntra le portier malsigü, che stënta a se tigní le curan ti brac, impone ne ó le palé ruvé dait ala linea. Tl’ultima pert dl pröm tëmp é la defenjiun da La Val sot a presciun, i pai ne röia nia plö sura le mezciamp y i ladins mëss se confronté tres indo cun i portadus dl palé che röia cina sö dan area. I sogadus va tosc tla palsa a tra le flé y a se ciarié sö por la secunda pert.


Le pröm tëmp se röia sön le  0 - 0


I aversars sënt atira le druch di sogadus da La Val dal scomenciamënt dl secundo tëmp, che partësc fora damì i pai sön les perts y ciafa plö saurí le trú cuntra porta. Al 55^ ti sciampa Franz ala defenjiun mo se tira massa da na pert fora, al vega impó la trata che röia indere dlungia ia. Püch do se prejentëia le medemo Franz dal’ atra pert te area aversara y pro ciamó n iade la trata, chësc iade é le un dl Gsies che tëgn sö le curan. I aversars respogn al druch ladin cun val ripartënza prigorosa, chiló é al comane le defensur amez Marco C. che fej bun só laur architan tl dërt mumënt i atacanc y devian le palé da na pert fora. Al 70^ menüt n’atra ocajiun por La Val, Max N. fej só le palé, driblëia bun la defenjiun y mët amez na bela crossada che ne vëgn indere nia anuzada dai atacanc. Tosc suzedera spo sciöche ara é gunot tl jüch dl palé, fora de n sarëgn, do n avëi odü indî nia plö le Gsies te area ladina, sön na ripartënza vëgn le palé crossé amez por le atacant Pizzinini che cun n bel stach de ce rebat le palé te porta por le 1 a 0. Na saíta por La Val che mëss ciaré de oje le resultat ti ultims 10 menüc. Cun coraje se alza la scuadra, Adrian vëegn sorví al limit dl’area, imped se fa lerch cuntra porta fejel pié ia na trata dal limit che é indere massa alta. A ti mët le bastun tra les giames ai sogadus é ince le arbiter, plö iadi ne vëgn contrasc evidënc nia conzedüs al limit dl’area, nia de morvëia sce i sogadus vëgn nervusc y mët man de strité tra de vëi. I sogadus dl Gsies se fej ciamó prigorus cun val inserimënc di atacanc mo por fortüna ne vëgn le resultat nia radoplé, mo dal’atra pert ne vëgn chësc nianca avalié.

L’arbiter fej tosc ruvé i nonanta menüc de jüch, La Val mëss insciö dlotí na pordüda ajia che i fej tomé zeruch de posiziun. Ince sce la matematica ne tradësc ciamó daldöt nia le trú por le secundo post, mëss i ultims 9 punc poscibli gní concuistá deplëgn speran de na ciumpedada di aversars dl Dietenheim y dl Sest, atualmënter dant. Ala scuadra dla Val Badia ti va dal’atra pert i mius complimënc por la concuista dl pröm post de campionat a trëi partides dala fin cun la promoziun miritada te secunda categoria.

 

Gsiesertal – La Val : 1 - 0


Formaziun La Val: 1. Sepl Kantioler, 2. Luca Pescollderung (dal 70^ Paolo Vallazza), 3. Egon Frenes (dal 55^ Werner Sottara), 4. Martin Ploner, 5. Marco Castlunger, 6. Christian Dapoz, 7. Marco Sottara (dal 45^ Max Nagler), 8. Stefan Sottara – capitan, 9. Alexander Miribung (dal 75^ Adrian Miribung), 10. Michele Campei (dal 45^ Franz Tolpeit), 11. Alex Elzenbaumer

Proscima partida: In dumënia ai 15 de má dales 16:00 te ciasa cuntra le Mühlwald


Atri resultac:

Altherren: Terenten - La Val :  2 - 0
Juniores: Natz - Val Badia : 2 - 3
U-15: Mareo/LaVal – Raas : 1 - 2
U-13: Pro Team Blau - La Val: 6 - 0
U-10: La Val – Rasen/Antholz II: 2 - 0

 

 

Sponsoren

logo_M2_Srl raiffeisen miribung seve decor auto_vallazza Frenes_Patrick Plana_Ladina

Login



      Uniun Sport Amatoriala La Val, San Senese 1, I-39030 La Val
      info@uslaval.it - C.F. 81009280215 - ©