US LA VAL
 
 
     
 

9ª partida de campionat rit. - Mühlwald

Stampa PDF

13230796_10208067606580614_1560771048_o

Do döes partides debles se lascia La Val ince tó dal Mühlwald i trëi punc. Cotan á mancé la determinaziun dan porta a segné.

 


 


La scuadra da La Val ne á mai albü gran simpatia por i aversars da Mühlwald. Gonot é les partides decuntra caraterisades da en jüch gro y da stritaries, avisa ince tla partida de andata, de chëra che La Val á pordü cun na prestaziun eclatanta da pert dl’arbiter ti cunfrunc di ghesc y n comportamënt sportif nia iüst da pert de chi da Mühlwald. Por i ladins na motivaziun inplö por davagné la revanche sot le publich de ciasa, mo sciöche an á podü udëi, castighëia i aversars amez le secundo tëmp sön üna dles püces ocajiuns conzedüdes y condüj insciö i trëi punc fora en puster.

Les scuadres scomëncia ala pêr, ti prüms menüc ne éle nia gran ocajiuns da spié. Impormó ala cherd’ora é n palé arlungé dala defenjiun che fej pié ia Franz dassú cuntra porta, de püch it dal limit de area fejel pié ia na trata bassa che vëgn deviada dal’un dl Mühlwald cun na gran parada te ciantun. Al ne passa tröp che Alex sciampa da na pert jö y crossëia la cogura amez: Franz röia a püc metri dan porta, controlëia bun y chir le pröm pé, la gran reativité dl portier archita indo sö le curan. Do chësc vëgn la formaziun de ciasa tignida zeruch dala presciun di pustri che röia tres plö cuntra porta. Al 35^ i vëgnel conzedü dal arbiter n önescmetri, le atacant se fej tomé a tera do ester gnü tigní dal defensur ladin. Le medemo sogadú che procurëia le önescmetri se presentëia ince ala trata, in chësc ciade á i ladins fortüna, le curan vëgn splundré sura porta fora. Ti ultims menüc é La Val che manacia de sbloché le resultat cun val ocajiun sön situaziuns standard o trates dalunc. Le verdaporta puster é tres sigü sön vigni palé y defënn insciö le resultat.

 

Le pröm tëmp se röia sön le  0 - 0


A mët man bun le secundo tëmp é i pustri, bele do püc menüc vëgn la defenjiun de ciasa taiada fora cun n palé alt, le portier Julian mëss gni adincuntra por abiné denant le curan y le devié te ciantun. Bel plan é indo i ladins che ciafa coraje y se alza cun en modul plö ofensif, chësc porta atira sü früc, le atacant Adrian vëgn sorví dal mezciamp y röia a püc metri dan le portier che prô de antizipé la trata  che röia indere de püch dlungia ia. Al 65^ é Stefan che archita n palé âlt al limit, se fej lerch cuntra porta y ne vëiga nia a dërt mumënt le cumpagn Werner ia dô, insciö prôl la trata che ne gareta nia y röia ince dlungia ia. Cun l’intenziun de renforzé l’atach röia te ciamp Michele C., che mëss indere bele do ma dui menüc de jüch lascé le ciamp por n tai sura l’edl, procuré sön n contrast de ce, la ferida mëss gní cujida. Al 75^ suzedera anfat sciöche la partida da denant cuntra les Gsies, dô tröp tëmp che i aversars ne röia nia te area ladina, vëgn metü amez na crossada por le atacant Steiner, che rebat le palé sön le pé lunch cun n gran stach de ce.  Na saîta fora de n sarëgn por i patruns de ciasa che mëss ciaré de rosedé le resultat tla ultima cherd’ora dla partida. Al vëgn rischié ciamó deplö cun l’inserimënt de n atacant inplö. Ince sce La Val fej na gran presciun sön i portadus dl palé y cuncuistëia n grüm de palés tl mezciamp aversar, mancel impó la iüsta determinaziun y le carater por avalié le resultat, le impëgn ne vëgn cina l’ultim menüt nia premié. Cun la terza pordüda indolater se fej La Val ince sciampé dant dal Mühlwald y se archita al cuinto post a döes partides dala fin dl campionat. 

La Val – Mühlwald: 0-1

Formaziun La Val: 1. Julian Moling, 2. Luca Pescollderung, 3. Werner Sottara (dal 70^ Felix Nagler), 4. Paolo Vallazza, 5. Marco Castlunger, 6. Christian Dapoz, 7. Max Nagler, 8. Stefan Sottara - capitan, 9. Adrian Miribung, 10. Alex Elzenbaumer, 11. Franz Tolpeit (dal 65^ Michele Campei y dal 70^ Martin Ploner),

Proscima partida: In dumënia ai 22 de má dales 16:00 a Vierschach cuntra la scuadra de ciasa

 

Atri resultac:

Altherren: La Val - Falzes: 2-0
Juniores: Val Badia - Burnech: 6-1
U-15:  Val Badia – Mareo/La Val: 0 –1
U-13: La Val – Mühlwald: 1-1
U-10: Rasen/Antholz I – La Val: 4-0

 

 

Sponsoren

logo_M2_Srl posta raika1.plata seve decor1.plata Logo_moritz_01 patrick1.plata helmut1.plata ploner1.plata

Login



      Uniun Sport Amatoriala La Val, San Senese 1, I-39030 La Val
      info@uslaval.it - C.F. 81009280215 - ©