US LA VAL
 
 
     
 

10ª partida de campionat rit. -Vierschach

Stampa PDF

_MG_9684scuadra

Te na partida rica de ocajiuns y dominada lunć y lerch, à la La Val albü la miù sön la scuadra da Vierschach che se presentëia te ciamp cun diesc sogadus.

 

 

 


Do les trëi pordüdes passades mëss la scuadra da La Val se refá cun le Vierschach, aversar al’ultim post sön le papier mo dessigü nia da sotvaluté. Düc i atri concurënc á condüt a ciasa punc dal ciamp da Vierschach y insciö ince la scuadra da La Val ne á orü ester da manco. I aversars se presentëia ma cun diesc sogadus sön le ciamp strënt y vëgn pestada sot dai ladins, che dominëia i nonanta menüc. Costruí vëgnel n grüm de ocajiuns da gol, che ne vëgn indere nia anuzades bun, de chëstes ince döes puniziuns mascimes nia trasformades.

Bele al scomenciamënt mëss i padruns de ciasa aretré a defënn, i ladins pitá n bel jüch y bele ti prüm diesc menüc röia le atacant Alexander sú dan porta ala trata , che vëgn tignida sö dal numer un. Al 16^ é Max che se fej lerch te area y vëgn contrasté da dui aversars, le arbiter mostra atira sön le punt di önesc metri daulach al se presentëia Alex che fej pié ia na trata sön la pert ciampa, le portier á na gran reaziun y se destirá a deloj le palé te ciantun. Püch dô röia en palé amez por Alexander y cun na morvëia de spiné rebat chësc le palé sön le prüm pé de porta, ince chiló röia ciamó le un da Vierschach a salvé le resultat.  Al 25^ menüt de jüch se refesc Alex sön le önescmetri sbalié, giulan al bel laûr de Max che ti sciampa al defensur y mët amez n preparatif, röia Alex sú sön le palé y á ma plö bria de apogé te porta por le 1 a 0. Le medemo vegn püch do sorví cun na passaja filtranta dal mezciamp che taia fora la defenjiun, de ciamp prô Alex na trata sön le prüm pé, che ne röia indere nia a dërt post. Al 35^ l’atra conzesciun de na puniziun mascima, Alexander vëgn tigní y metü a tera al limit di cinch metri, sëgn é le capitan Stefan che tôl le curan tles mans y se fej dant ala trata. Al prô ince ël la medema pert ciampa mo ince chësc iade individuësc le portier la direziun dl palé y le para, Max pro ciamó a ruvé lassura mo la trata röia sura porta fora. Dan le pröm tëmp ti gareta ciamó al Vierschach na ripartënza cun na passaja filtranta al’atacant, che se fej lerch y röia sú cuntra le portier Julian, chësc mëss se destrà por desfanté la trata.

Ince sce le mezciamp partesc fora de bugn palés ai sogadus susc sön les perts, mancel gonot le ultim passaje fatal che pudess fa rové i atacant a püc metri dan porta. A chësta moda resta le resultat sön le megher 1 a 0 ala fin dl pröm tëmp.


Le pröm tëmp e röia sön le resultat de 1 a 0 por La Val

I pröms diesc menüc dla secunda fraziun se lascia i ladins n mumënt do fora y ti lascia le ciamp por l’avanzamënt aversar, i atacanc pustri fej pié ia ince val trata indere nia prigorosa. Al 55^ mët Marco S. n bel preparatif amez por Alex che le fej passé inant por Stefan, la trata è indere debla y le portier ne á nia gran dificolté al’archité sö. Tosc é le atacant frësch Adrian ruvé te ciamp che fej balé la rëi. L’aziun pëia ia cun Christian Dapoz che arlungëia a Max Nagler, al mët le palé amez por Adrian che vega en ciamp de prüma sön le pé lunch de porta. Chësc ti gareta ince y le resultat radoplëia. Tosc é ince le decim sogadú dl Vierschach che mëss lascé le ciamp por infortüne, insciö ti sciampa i atacanc ladins ti büsc y röia a contlunjiun. Ala trata de na puniziun conzedüda al limit se desmarchëia Max y ciafa sön le pé le curan, cun en bun control veghel de pröma na trata bassa sön le pröm pé de porta. La furbizia y la velozité dla passaja de Alex premiëia insciö la scuadra cun le terzo gol. Al 75^ ciamó döes ocajiuns d’or de Adrian che naota fej só le palé al limit y vega n palonët a giré sura la defenjiun ite, le curan rebat indere tla stangia de porta. Püch dô sön na crossada de Marco prô le medemo n’acrobazia de forfesc amez area, che ti gareta in pert y fej rové le palé sura porta fora. Le resultat vëgn spo definitivamënter metü al sigü da Stefan al 83^, che mëss ince se refà sön la mascima punizun sbaliada. Alex vëiga a dërt’ ora le movimënt dl capitan y taia fora la defenjiun cun na passaja. Stefan sú dan le portier controlëia le palé y le mët sön le prüm pé de porta por le 4-0. Tosc fej le arbiter ruvé la partida, i sogadus stanc y cun i pîsc lorënc é ince cuntënc de pudëi jí te cabina. Na devënta plö che miritada cun en resultat megher che ess podü salté fora cotan plö toch sce le gran numer de ocajiuns foss gnüdes anuzades sciöche al toca.


Vierschach – La Val : 0-4


Formaziun La Val: 1. Julian Moling, 2. Luca Pescollderung (dal 75^ Martin Ploner), 3. Paolo Vallazza, 4. Werner Sottara, 5. Marco Castlunger, 6. Christian Dapoz, 7. Marco Sottara, 8. Stefan Sottara – capitan, 9. Alexander Miribung (dal 60^ Adrian Miribung), 10. Max Nagler, 11. Alex Elzenbaumer


Proscima partida: In dumënia ai 29 de má dales 16:00 ultima partida te ciasa cuntra le Raas

Atri resultac:

Altherren: Dietenheim – La Val – spostada ai 28.05 dales 18:30 a Dietenheim
Juniores: Gherdeina - Val Badia : 4 - 2
U-15: Mareo/LaVal – Sest : 0 - 1
U-10: La Val – Valdaora: 1 - 7

 

 

Sponsoren

logo_M2_Srl posta raika1.plata seve decor1.plata Logo_moritz_01 patrick1.plata helmut1.plata ploner1.plata

Login



      Uniun Sport Amatoriala La Val, San Senese 1, I-39030 La Val
      info@uslaval.it - C.F. 81009280215 - ©