2ª partida de campionat - Dietenheim
La Val y Dietenheim se partësc i punc do na partida sugada ala pêr. Les ocajiuns da gol pon arcumpedé sön na man sora.
Sot a na plöia lisiera mët man la partida cuntra i aversars da Dietenheim, che fej só le jüch cun gran duch. I sogadus de ciasa ne se ciafa nia bun te ciamp y i aversars ti sciampa insciö saurí. Al vëgn davagné deplö puniziuns al limit dl'area ladina, Sepl mëss bëgn dui iadi se destrà a desfanté les trates. L'ocajiun por Michele toma al 20^, le mezciamp arlungëia sön l'atacant che se presënta sú dan le numer un mo ne atoca nia dërt le curan por la trata. Por ne lascé nia giré le palé se prô i ladins de fa atira druch sön le mür defensif, insciö ti tôl Max la cogura al defensur y la mët amez por le cumpagn Alexander che se presënta indere massa tert ala trata. Tl'ultima cher d'ora é le jüch da trames pert daldöt asënt, cun le palé scialdi ma plö por aria ne gareta degöna aziun prigorosa.
La Val röia te ciamo cun na marcia in plö y impostëia damí le jüch, cun n bel passaje vëgn Michele C. metü sú da na pert ite cuntra porta, la trata vëgn de püch delota dal verdaporta dlungia ia. Bel plan se osc indo le bun momënt por La Val y passa ai aversars che drüca dassën cuntra i defensurs, prigorusc é chilé i palés alc che röia amez. Al mancia ma plö püch tëmp por porvé de tra fora ciamó i trëi punc, i ladins mord ti dënz y rischiëia val in plö. I sogadus fej sü i contrasc mo mët trö massa forza tl'ultim passaje, che é scialdi trö massa lunch o massa cört. Cun le sciür dl'arbiter mëss La Val la zede y jí te cabina nia daldöt cuntënc cun le resultat. Sce an ciara al'andamënt dla partida é le pêr dërt por trames les scuadres dessigü dërt.
La Val – Dietenheim 0-0
Formaziun La Val: 1. Josef Kantioler, 2. Martin Ploner (dal 75^ Felix Luca Pescollderung), 3. Werner Sottara , 4. Marco Castlunger , 5. Christian Dapoz, 6. Max Nagler, 7. Freddy Sottara, 8. Michele Campei (dal 75^ Egon Frenes), 9. Alexander Miribung (dal 65^ Adrian Miribung), 10. Stefan Sottara - capitan, 11. Samuel Winkler
Proscima partida: In dumënia ai 18 de setëmber dales 15:30 a Gais cuntra la scuadra de ciasa.
Atri resultac:
Altherren: Terenten – La Val: 0-1
Juniores (Val Badia): Ridnauntal – Val Badia: 4-0
Allievi (La Val): La Val – Taufers: 0-3
Giovanissimi (La Val): La Val – Taufers: 0-3
U11 (La Val/San Martin): San Laurënz – La Val/San Martin: 1-2
U10 (San Martin / La Val): Mareo – San Martin/La Val: 0-8
