1ª gara de Südtirolcup

Bele da val dis é i atlec ladins sentá sön i liöstri a se mosoré tles competiziuns de lüsa alta. La pröma competiziun a daurí la sajun nöia 2016/17 é gnüda tignida ai 27 de dezëmber a Longiarü, na gara de cualificaziun ala nazionala por lüsa bassa. I atlec de lüsa alta à tut l’ocajiun por fa n bun alenamënt y se mosoré competitivamënter un cun l’ater. Da alzé fora te chësta gara i prüms bugn tëmps garatá di ladins.

Sciöche vigni ann é ince les tradizionales trëi gares de Südtirolcup sön le program, trofé der combatü y urü anter i atlec de lüsa alta de Südtirol. La prüma competiziun é gnüda tignida le ultim fin dl’edma a Funes sön la pista “Ranuier Rungg”.N gran l’âlt al comité d’organisaziun por le gran laur a arjigné ca na pista de condiziuns otimales por garejé. I atlec ladins à indo desmustré de ester stersc mostran sö chisc plazamënc: tla categoria dles aspirantes se posizionëia Nagler Luisa da Lungiarü al 4 post dan da l’atleta da La Val Rubatscher Manuela (6 post). Tla categoria di aspiranc fej i fredesc Serafini Saniele y Lorenzo respetivamënter le 18. y 20. post cun amesa ite le atlet jonn da La Val Campei Marco. Le 4. y 5. post tla categoria Mater B1 i va deperpo a Alton Anton y Tavella Robert.

A se tó na bela sodesfaziun é le talent Diego Tschaffert da La Val, do n bel ann de palsa y de preparaziun pôl bel mostré sö döes medaies d’or te chësc mët man dla sajun. La pröma a  Longiarü y la secunda pro la pröma de Südtirolcup (temp 1’01.49), tres te söa categoria Master A.

A mostré sö le miú tëmp dl dé é indere le campiun da Lijun Kaser Roman (1’00.09), che pó alzé sö na sfilza de primac tla sajun passada.

Resultac, tlassifiches y atres informaziuns plö detaliades pon jì a consultè sot la nöia plata  http://www.sportrodel.it/