US LA VAL
 
 
     
 

Tornei dla Val Badia de "calcetto"

Stampa PDF

 

N'alternativa al vedl campionat dla Val Badia

Dô che le campionat dla Val Badia ne gnê nia plü soghé, êl tröc sogadus, dant­adüt i plü vedli, che punsâ dô cun n pü' de incherscimun ai agn passá, ales domë­nies d'isté, olache al gnê mâ plü ponsè al palè. Chëstes partides danter les scuadres dla valada â dagnëra na saû particolara y ê dër sintides, sides dai sogadus sciöche ince dai spetaturs, pro vigni partida gnêl indô en mënt momënc’ dles gares di agn passá, les vedles rivalitês che ê por la partida sciöche le sè tla jopa, gnê indô a lüm.

Deache al n'ê nia plü poscibl da or­ga­ni­sé n campionat sciöche laôta, él gnü pon­sè de tigní n mini-campionat de "cal­cet­to" por les scuadres dla Val Badia. Bele tl ann 1990 êl gnü tigní a Al Plan n te’ tornê y tl 1991 él stè l’U.S. La Val che á tut la scomencia­día.

Da d'ainsciüda él gnü cherdè adüm i ra­pre­sentanc’ dles scuadres de düta la valada. Te chësta ocajiun él ince gnü me­tü sö le regolamënt y metü adüm i dui grups por soghé les partides de cualifica­ziun. Dea­che a La Val n'êl nia ciamò na plaza dal palè, é les partides gnüdes sogades sön Badia, söla picia plaza de saurun. La domë­nia, ai 7 de messè 1991, éra spo stada tan inant: 10 scua­dres dla valada s'á abiné adüm y dales 9 daduman fina les 9 dasëra, te partides de 20 menüc l'üna, se ares mo­so­ré por de­ter­miné la scuadra che podô se portè a ciasa le trofê metü a despo­siziun dala Cassa Raiffei­sen Val Badia.

 

L'albo d'or

Antermëia

4 tornei (1991, 1992, 1995, 1996)

La Ila

1 tornê (1994)

Al Plan

1 tornê (1993)

Por les 8 dassëra êl finalmënter saltè fòra les döes scuadres finalistes, S. Martin y Antermëia. Les döes scuadres s'á afrontè te na bela partida finala y inultima él stè la scuadra d'Antermëia - che á ince albü cun Paul Chizzali le miú goleadú dl dé - che á davagné por 3 a 2.

Dütes les scuadres che á tut pert á laldè la scomenciadía por chësta manifestaziun y an á odü che chësta idea podô veramënter ester na buna alternativa al vedl campionat dla Val Badia.

Ti agn dô él spo sté le SC Mareo che á surantut l'organisaziun dl tornê dla Val Ba­dia, denominé "Memorial Richard Pitscheider", en recordanza de n sò mëmber che é mort te na desgrazia cun i schi da Nadè dl 1989.

 

Tornê de "calcetto" dla Val Badia

Scuadra

91

92

93

94

95

96

Al Plan

4.

 

1.

5.

11.

7.

Antermëia

1.

1.

3.

3.

1.

1.

Badia

5.

 

4.

6.

6.

9.

Corvara

9.

 

8.

8.

10.

6.

La Ila

6.

 

5.

1.

2.

3.

La Pli

7.

 

7.

7.

8.

12.

La Val

8.

9.

9.

2.

12.

13.

Rina

3.

 

12.

 

9.

2.

S. Ciascian

10.

 

11.

11.

4.

14.

S. Martin

2.

 

2.

4.

3.

4.

Lungiarü

 

 

10.

9.

 

10.

Old Stars Val B.

 

 

 

10.

5.

8.

Colfosch

 

 

6.

12.

7.

11.

Barantli La Ila

 

 

 

 

 

5.

Por l'ann 1992 mancel la documentaziun

 

 

Partezipaziun a tornei


 

Tornei tla Val Badia

Bele ti agn 70 gnêl soghé intratan la palsa che le campionat dla Val Badia fajô vigni ann a mez agost, de vigni sort de tornei danter n mënder numer de scuadres. Un de chisc tornei ê le "Trofê Naonis" che gnê soghé a S. Martin. A chësc tornê tolôl pert indüt cater scuadres y les partides gnê sogades te dui dis (a mez agost).

N ater tornê gnê soghé jö Al Plan, en recordanza de Lois Craffonara da Rina, che ê mort da jí cun la lüsa. La prüma ediziun de chësc tornê é finamai gnüda davagnada dala scuadra da La Val.

Tl ann 1989 á la scuadra da La Val tut pert a n tornê organisé dal'U.S. Lungiarü, se portan a ciasa le prüm pest.

An á ince tut pert a deplü manife­sta­ziuns che gnê organisades fòra dla Val Badia. Tl ann 1993 é n valgügn sogadus da La Val jüs söl Renon a tó pert a n tornê de "calcetto", rovan al 3. post. Te chisc ultims agn á la scuadra da La Val tut pert n val­gügn iadi al tornê de "calcetto" organisé vigni ann da d'aisciüda dal Milan Club da Bornech, se comportan ince valgamia bun.

 

Le tornê interladin

Le tornê interladin va zoruch ai agn 70 y al gnê soghé dlungia le campionat dla Val Badia. A chësta manifestaziun tolôl pert scua­dres de Gherdëna, Fascia, Fodom y Ba­dia. Nosta valada gnê rapresentada imprü­ma mâ da scuadres de val'paîsc, danter chëres ch'al ê ince La Val, y plü tert da na seleziun de sogadus tuc’ fòra dales scuadres de düta la Val Badia. Chësta "nazionala" dla Val Badia á davagné le trofê ti agn 1972 y 1973.

 

Iade a Nürnberg

La scuadra da La Val é finamai jüda a Nürn­berg a soghé cuntra na scuadra dl tëmp lëde (scuadra de "Gärtner"). An cone­sciô n scior che gnê a La Val en vacanza y an s'â metü a üna, ch'al gniss íte cun düta la scuadra a soghé cuntra chi da La Val. Insciö éra stada y la scuadra tudëscia é gnüda íte tl ann 1975. L'ann dô ai ëi invié i sogadus da La Val da jí fòra, che ne s'á nia lascè invié dui iadi. Da d'altonn éson sentà te auto y piá ía y fòra. Da gní zoruch ánse ciamò podü anuzè l'ocajiun por storje prò a München y da vijité l'Oktoberfest. Ala scu­adra tudëscia ti âl salpü tan bel chilò La Val, ch'ai é ciamò gnüs íte n iade tl ann 1977.

 

FIL00932

Scuadra da La Val cun n valgügn sogadus de Badia, en ocajiun de na partida d'amizizia cuntra Urtijëi (1972) - impé da man ciampa: Erwin Frenes, Guido Granruaz, Giuvani Frenes, Tone Alton, Sepl Tavella, Scebio Sottara. Cufá: Vinzenz Pizzinini, Renato Costa, Pepi Crepaz, Ubi Valentini, Rinaldo Ploner, Giuvani Rives.

 

FIL12448

Tl ann 1987 él gnü soghé söla plaza dal palè a Al Plan na partida danter La Val y Pidrô. En chësta ocajiun él gnü dër tröpa jënt a ciarè prò y, sciöche an vëiga, él finamai gnü arjigné bandires aposta. La partida é gnüda davagnada da chi da Pidrô por 3 a 1. Söl retrat les scuadres dô la partida.

 

Tornê dles uniuns


 

N dé dl jüch dl palè por la jënt dl paîsc

Tl mëis de agost 1993, püch tëmp dô che an á podü mëte man de anuzé la plaza dal palè "Plans", á l'Uniun dl Sport organisé le prüm tornê danter les uniuns dl paîsc. Le gran suzès albü da chësta manifestaziun á portè prò che le tornê é ince indô gnü organisé ti agn dô. Tratan che ti prüms dui agn é dütes les partides gnüdes sogades te n dé su, ân tl ann 1995 bele metü man cun les prümes partides la sabeda sëra.

En ocajiun de chësc "dé dl jüch dl palè" röiel adüm vigni iade passa cënt sogadus da düt le paîsc. Sce al é ciamò bel tëmp, pon passè n bel dé deboriada tla bela zona dl sport "Plans", inanter devertimënt y sam­bëgn ince fadíes. Por abiné adüm so­ga­dus assá, él deplü uniuns che se mët adüm. Insciö él vigni ann 6 o 7 scuadres che tôl pert al tornê.

 

Tornê dles uniuns da La Val

Scuadra

93

94

95

Bruadri La Val

 

5.

4.

Iagheri / Pëiapësc

3.

2.

5.

Lia da Munt / Aiüt Alpin

5.

4.

3.

Musiga

4.

6.

6.

Stüdafüc’

2.

3.

2.

Uniun dl Sport

1.

1.

1.

Uniun teater / Ciantadus

6.

7.

 

 

Sponsoren

logo_M2_Srl raiffeisen miribung seve decor auto_vallazza Frenes_Patrick Plana_Ladina

Login



      Uniun Sport Amatoriala La Val, San Senese 1, I-39030 La Val
      info@uslaval.it - C.F. 81009280215 - ©