US LA VAL
 
 
     
 

Trofê banca populara

Stampa PDF

 

Finalmënter ân podü tó pert a n campionat provinzial

La proposta da mëte ince sö a La Val na scua­dra che toless pert al campionat pro­vin­zial ê stada bele da tröc’ agn argomënt de discusciun danter i mëmbri dl'Uniun dl Sport. Le maiú problem, por gauja de chël che la proposta ne n'é mai gnüda concreti­sada, ê zënz’ater la mancianza de na plaza dal palè. L'Uniun dl Sport ne s'la odô nia fòra bela da messëi jí foradecá a se afité na plaza dl palè, cî che ess imprümadedüt si­gni­­fiché n gran sforz finanziar mo ince de gran bríes por i sogadus da messëi jí vigni iade foradecá a se alenè y a soghé. Al ne n'ê gnanca saurí da ciafè envalgó daimprò na plaza dal palè da podëi afité.

Tl ann 1993 éra finalmënter stada tan inant. Tratan le mëis de jügn él gnü rové i laûrs prò la plaza dal palè tla zona dl sport "Plans" y atira s'á i funzionars dl'Uniun dl Sport dè da fá, lascian scrí íte la scuadra al campionat "Trofê Banca Populara".

 

Les origins de chësc campionat

Chësc campionat ê gnü metü a jí por le prüm iade tl ann 1980, sön scomenciadía de set scuadres dl raiun da Porsenú, sciö­che alternativa al campionat federal, sot­metü al organich dla F.I.G.C. (Federa­zione Italiana Giuoco Calcio). Le campionat "Trofê Banca Populara" á atíra albü n gran suzès y ê bëgnodü dantadüt danter les mëndres uniuns sportives, che ne podô nia se por­mëte la partezipaziun al campionat federal. Mo ince tröpes de maius uniuns che â bele na scuadra ti campionac’ federai, tolô pert cun na secunda scuadra a chësc campio­nat, ince deache i medemi sogadus podô soghé paralel te trames les competiziuns. Ann por ann s'âl slarié fòra sura düt Südtirol, arjunjon ti agn 90 le bel numer de 60 scuadres partezipantes. Plücoater â i orga­nisadus ponsè ala partezipaziun de scuadres dl tëmp lëde, mo le livel de jüch y la determinaziun dles scuadres ne se desfa­renziëia nia tröp dal campionat federal de 3. categoría.

 

Ciudí pa nia l'iscriziun al campionat federal?

La preferënza dl'U.S. La Val por chësc campionat dan da chël federal pò gní moti­va­da dantadüt por conscidraziuns de cara­ter finanziar. Al basta ponsè che l'iscriziun al campionat federal costâ 5 iadi tan co al ater campionat. An mëss ince dí che al gnê metü sö na scuadra nöia, y degügn ne savô sce ara jê bun o mal y insciö ne orôn nia riscé massa na gran soma d'iscriziun. N'atra gauja ê chëra, che tla zona dl sport "Plans" n'êl te chël momënt nia ciamò gnü stlüt jö i laûrs por la costruziun dl frabicat sportîf cun i locai da se mudé. Por l'iscriziun al campio­nat federal ne foss chësta situaziun nia saurí gnüda azetada.

Insciö ân ponsè che por mëte man jêl dessigü bun la partezipaziun al campionat "Trofê Banca Populara", dantadüt porchël che i tröc sogauds jogn podess naôta se fá n pü' d'esperiënza y ch'al podess se "formè n grup", sciöche al vëgn dít. I sogadus che ti agn passá - fina che La Val ne n'â ciamò degüna scuadra - â soghé pro les scuadres di paîsc vijins che tolô pert ai campionac’ fede­rai, ê sëgn indô gnüs zoruch. Ince tröc jogn che â soghé ti agn passá pro scuadres joniles dl'Alta Badia, da S. Martin, Rina y Mareo fajô sëgn pert dla scuadra nöia y l'espe­riënza di agn passá ti á dessigü jovè a düc’. Podëi soghé por la scuadra de sò paîsc nadè tí dá ai sogadus dessigü na maiú so­de­sfaziun co soghé por na scuadra foresta.

 

 

Campionat 1993/94

 

La scuadra é piada ía dër bun

La scuadra gnê alenada da Pio Ploner che s'â fat na gran esperiënza sogan tröc agn pro la scuadra dl'Alta Badia. La scua­dra ê gnüda partida íte tl "girone" dla bassa Val de Puster, a chël ch'al tolô pert ciamò döes scuadres dla valada, Antermëia y La Plí.

L'entusiasm da mëte man ê sambëgn dër gran. Bele tla prüma partida, sogada a La Val cuntra la scuadra da Kiens che â da­va­­gné le campionat dal ann denant, á la for­ma­ziun jona da La Val desmostrè so valur sogan fòra n resultat de parité. La prüma por­düda é gnüda tla 5. partida cuntra Vintl, che ê te chël mo­mënt a ce dla tlassifica. Mo por­chël ne s'á la scuadra nia lascè sciuré jö de moral, dava­gnan la domë­nia dô le derby cuntra Anter­mëia. Ala fin dla prüma pert dl campionat é la scuadra rovada al 5. post tla tlassifica, tóch dô les mius scuadres. Le bi­lanz de 4 partides dava­gnades, 3 parejades y mâ döes pordüdes pò zënz’ater se lascè odëi.

 

FIL10668

La scuadra che á tut pert al prüm campionat „Trofê Banca Populara“ - impé da man ciampa: Sepl Frenes, Sepl Miribung, Romeo Rubatscher, Silvester Campei, Siegfried Miribung, Rinaldo Ploner, Erich Costabiei, Pio Ploner, Walter Stampfer. Cufá: Simon Dapoz, Carlo Miribung, Norbert Costabiei, Sepl Comploi, Otto Ploner, Patrick Frenes, Vito Miribung, Christian Videsott, Reinhard Deiaco, Norbert Valentin.

 

                              

Ciamò damí s'á la scuadra comportè tla se­cun­da pert dl campionat

La preparaziun ales partides da d'ai­sciü­da comportâ sambëgn de gran dificul­tês, sce an pënsa che chilò da nos é les pla­zes dal palè curides de nëi fina ala fin de merz. Implü n'êl laôta nia ciamò gnü metü en funziun l'implant d'iluminaziun por la plaza dal palè.

Insciö é la prüma partida cuntra i prüms te tlassifica gnüda pordüda mala­mën­ter, mo spo ne n'él plü mai gnü pordü fina la fin dl campionat. Tles partides da d'aisciüda á la scuadra da La Val arjunt le secund miú numer de punc’ de dütes les scua­dres. Cun 6 partides davagnades, 2 pa­re­jades y 1 na pordüda á la scuadra desmo­strè d'éster buna da ti tigní pormez ince ai mius aversars.

 

 

 

La partida plü bela

Na partida che ne gnará nia desmen­tiada tan atira é chëra cuntra la scuadra da Natz, sogada söla plaza dl sport "Plans". Dô le prüm tëmp soghé dër mal pordô la scuadra da La Val por 3 a 0. Tl secund tëmp á i sogadus da La Val mostrè carater y á ôt sotissura la partida, dava­gnan inultima cun le resultat de 6 a 3 cun cater goi de Norbert Costabiei y dui de Arthur Frenes.

Ala fin dl campionat s'á la scuadra plazè al 3. post, adüm cun la scuadra da Natz. Cun n pü' plü de fortüna y magari cun n pü' plü d'esperiënza, conscidran che la scuadra ê dër jona, fóssera zënz’ater jüda da rové ti prüms dui posc’ y da se cualifiché in­sciö por les finales provinziales. An mëss in­ce dí, che la scuadra n'á pordü intratan düt le campionat degüna partida söla plaza de ciasa.

 

Tlassifica finala y resultac’ campionat 1993/94 (clicca)

 


 

Campionat 1994/95

Dô la bela esperiënza fata l'ann denant, á l'U.S. La Val tut pert le secund ann al campionat "Trofê Banca Populara". La scua­dra é indô gnüda alenada da Pio Ploner che fajô ince pert dla scuadra sciöche sogadú. Le travêrt che an s'â metü dant al scomen­cia­mënt dl campionat ê chël de arjunje al­man­co indô le 3. post concuisté l'ann da de­nant. Mo tan bun ne n'éra nia plü jüda.

 

La prüma pert dl campionat

Dô che la formaziun da La Val â stlüt jö dër bun le campionat 1993/94, se compor­tán dër bun dantadüt tles partides da d'ai­sciü­da (6 davagnades, 2 parejades y 1 na por­düda), se aspetâ tröc che la scuadra jíss ince indô tl campionat nü inant cun le medem ritm. Ince sce cun la prüma partida, da­vagnada 2:0 a Welsberg, che ê üna dles fa­vo­rides, é la scuadra atira piada ía cun le dër pé, s'ân tles proscimes partides tosc intenü che ara ne jê nia plü tan saurí co l'ann da denant. Dô la prüma pert dl campionat s'á la scuadra plazè al 6. post cun 12 punc’: 3 partides davagnades, 3 pa­re­jades y 3 pordüdes (les partides dava­gna­des vêl 3 punc’). Le comportamënt püch costant dla scuadra é magari stè n pü' colpa dla desfortüna, mo al ê dessigü ciamò val' d'ater che falâ. Magari s'ân aspetè les côs­ses massa saurides, o magari él val' soga­dus che ne s'á nia impegné indortüra, dant­adüt tla preparaziun ales partides.

 

La secunda pert dl campionat

Por les partides da d'aisciüda â la scuadra la poscibilité da se alenè sciöch'al alda, deache al ê intratant gnü metü en fun­ziun l'implant d'iluminaziun söla plaza dal palé "Plans". Chësc ê dessigü n vantaje, che la scuadra n’â nia albü fina sëgn.

Mo ince tla secunda pert dl campionat ne s'á le comportamënt instabil dla scuadra nia miorè. An jê da na partida sogada dër bun a n'atra pordüda malamënter, zënza capí indortüra les gaujes. Implü él ciamò stè val' dezijiuns arbitrales dër discutables che á roviné deplü partides che ess dessigü mirité n ater resultat. Fajon les somes, á la scua­dra cun les partides da d'aisciüda (5 da­va­gnades, 1 parejada, 3 pordüdes) impò miorè la posiziun te tlassifica y á stlüt jö le campionat al 4. post. Sce an é impò rová tan alalt te tlassifica ince cun resultac’ nia dër bugn, pò chësc gní splighé cun le fat che te chësc campionat ti ara a dütes les scua­dres scechè n iade o l'ater. Porchël éssel bastè n pice sforz implü por arjunje n bun plazamënt te tlassifica. Ala fin essel bastè na partida davagnada implü por arjunje le 2. post.

Al dess ince gní dit, che tla secunda pert dl campionat él stè dui di mius soga­dus, Simon Dapoz y Romeo Rubatscher che é jüs a soghé pro la scuadra da S. Martin, che tolô pert al campionat federal de 2. ca­te­goría. Ince sce te val' partides an conesciü süa mancianza, pon dal'atra pert sambëgn ester cuntënc’ che ëi á albü l'ocajiun da soghé te na categoría plü alta y da daidé portè prò al bun comportamënt dla scuadra dl paîsc vijin.

 

Tlassifica finala y resultac’ campionat 1994/95 (clicca)

 

 
 

Sponsoren

logo_M2_Srl raiffeisen miribung seve decor auto_vallazza Frenes_Patrick Plana_Ladina

Login



      Uniun Sport Amatoriala La Val, San Senese 1, I-39030 La Val
      info@uslaval.it - C.F. 81009280215 - ©