US LA VAL
 
 
     
 

5ª partida de campionat rit. - Perca

Stampa PDF

scuadra_20161

I aversars da Perca mostra na bela prestaziun sön le ciamp a La Val mo se fej sciampé ite bëgn dui iadi le palé te porta dai padruns de ciasa.







Do avëi lascé sön trú punc importanc tles ultimes trëi partides à La Val reagí cuntra le Perca, mostran determinaziun a defënn le vantaje arjunt dl pröm tëmp. Purmò ala fin dla partida mët i ladins al sigü la devënta.

En pröm tëmp asuié por La Val, che favorësc le jüch dl Perca cun pücia conzentraziun y agresivité. I aversars davagna n grüm de contrasc y le tëgn alt tl mezciamp ladin. Tratan la pröma cherd’ora pëia ia n grüm de trates cuntra porta, gran protagonist é le portier Sepl che ne pormët nia le vantaje. Al 20^ röia Franz da na pert ite y preparëia le palé por la trata debla de Samuel che röia tles mans dl portier. Fora de n sarëgn vëgn püch do arlungé le palé cuntra porta, le portier pro de antizipé mo se fej sciampé le curan, l’atacant Alexander é  chilò asvelt da rové lassura por apogé te porta y porté le vantaje. Spetacolara la parada de Sepl al 40^ canche na crossada vëgn rebatüda de cé cuntra porta, le numer un ladin deloj chiló te ciantun cun les pizes di dëic.


Le pröm tëmp se stlüj jö sön le 1 a 0 por La Val.


Le mëteman dl secundo tëmp ne é nia damì co le pröm, La Val subësc de vigne sort de ripartënzes, bëgn dui iadi é la defenjiun fora de posiziun  se fej sciampé i asvelc atacanc pustri cuntra porta. Ciamó n iade é Sepl che ne ti lascia nia concretisé l’aziun. Al 60^ se fej Franz lerch dassú cuntra porta, la trata dal limit röia indere amez por le portier. La sotituziun cun sogadusc frësc ti da n gran aiüt ala scuadra che tëgn sö i palês dant y fej insciö trà le flé ai cumpagns. A stlü jö definitivamënter la devënta é Samuel Winkler al’ultim menüt. Le palé arlungé cuntra porta vëgn abiné dal’atacant che pro le palonët sura le portier fora, chësc gareta y fej sciuré l’arbiter la fin di nonanta menüc. Na devënta asuiada por La Val che se porta insciö al terzo post de tlassifica a dui punc dal Mühlwald.


La Val – Perca  2-0


Formaziun La Val: 1. Josef Kantioler, 2. Marco Sottara, 3. Werner Sottara, 4. Paolo Vallazza, 5. Marco Castlunger, 6. Christian Dapoz, 7. Franz Tolpeit, 8. Max Nagler (dal 70^ Luca Pescollderung), 9. Samuel Winkler (dal 90^ Martin Ploner), 10. Stefan Sottara - capitan, 11. Alexander Miribung (dal 75^ Felix Nagler)


Goi Por La Val: Alexander Miribung al 25^ y Samuel Winkler al 89^

Proscima partida: In sabeda ai 6 de mà dales 16:30 a Prettau cuntra la scuadra de ciasa.


Atri resultac:


Juniores (Val Badia): Kiens – Val Badia: 1-4

Allievi (La Val): La Val – Gherdëina: 2-3

Giovanissimi (La Val): Feldthurns – La Val: 6-2

U11 (La Val/San Martin): Mareo – La Val: 1-2

U8 (La Val) – torné a La Ila: La Val – Alta Badia: 4-0 / La Val – Burnech vërd: 3-0

 

 

Sponsoren

logo_M2_Srl raiffeisen miribung seve decor auto_vallazza Frenes_Patrick Plana_Ladina

Login



      Uniun Sport Amatoriala La Val, San Senese 1, I-39030 La Val
      info@uslaval.it - C.F. 81009280215 - ©