Te ciamp cun le FC Südtirol

In dumënia ai 30.04.2017 é i jogn sogadus da La Val gnüs invià dala scuadra dl FC Südtirol ala partida cuntra le Padoa por acompagné i sogadus sön le ciamp y por assistì daimprò le jüch.

En dé tan aspete por i 30 mituns y mitans, che s'a incunfurté adüm ai geniturs bel da plö tëmp de podëi passé chësc dé particolar al "Stadio Drusus" a Balsan, daulache le Südtirol à afronté i aversars dl Padoa, partida davagnada por 1 a 0 dai i padruns de ciasa. Sön invit dla scuadra dl FC SÜDTIROL, che süga atualmënter te Lega Pro, à podü n grup de mituns acompagné i sogadus sön le ciamp por le salüt al publich, deperpo che l'ater grup de mituns à podü assistì ala partida toch dlungia le ciamp da jüch, cun le compit de vardé sön i palês che röia fora dales linees de jüch.

A formé le bel grup é i mituns dl U8, dl U10 y dl U11, daulache ince val sogadù da San Martin a tut pert. Bëgn 30 mituns, 15 geniturs y l'acompagnadëssa Gemma à tut pert al'iniziativa. I mituns à insciö podü ciarcé l'emoziun de sté amez le ciamp cun i sogadus profescionisc y tra l'ater assistì a na partida de alt livel, a ci che vigni jonn de chisc presënc é ispiré. I presënc à ince albü la fortüna de podëi incunté y tra le palé personalmënter cun val sogadú dl FC Südtirol. Do la partida é le grup gnü derevers a ciasa, cuntënc dl bel dé y dl'esperiënza vissüda. N gran giulan ti va ai geniturs y ala Gemma che s'á cruzié de acompagné i mituns.Ala scuadra dl FC Südtirol n gran giulan por l'oportunité che ëi s'á dé y les mius aodanzes por le campionat.